.png)
.png)
.jpg)
.jpg)
សម្ដេច ហ៊ុន ម៉ាណែត សម្រេចលុបមជ្ឈមណ្ឌលសិក្សាទំនើប នៅសាលាបឋមចំនួន ១២
- ថ្ងៃពុធ ទី២៦ ខែកុម្ភៈ ឆ្នាំ២០២៥ ម៉ោង ៨:៥៩ នាទី យប់
ភ្នំពេញ៖ ពីពិធីបិទសន្និបាតអប់រំឆ្នាំ២០២៥ សម្ដេច ហ៊ុន ម៉ាណែត បានប្រកាសលុបមជ្ឈមណ្ឌលសិក្សាទំនើប ដែលមាននៅសាលាបឋមសិក្សាចំនួន១៨ ដោយលុបចំនួន ១២សាលាចោលទាំងស្រុង និង៦ទៀត បន្តដល់ចប់ឆ្នាំសិក្សា។ ការលុបមជ្ឈមណ្ឌលសិក្សាទំនើបនេះ ដោយសារសម្ដេចនាយករដ្ឋមន្រ្តីកម្ពុជា មិនចង់ឃើញសាលារៀនមានស្ដង់ដាពីរ។
សម្ដេច ហ៊ុន ម៉ាណែត នាយករដ្ឋមន្រ្តីកម្ពុជា បានលើកឡើងពីការដំណើរការមជ្ឈមណ្ឌលសិក្សាទំនើប ដែលមាននៅក្នុងសាលាបឋមសិក្សាចំនួន ១៨។ ជុំវិញការអនុវត្តកម្មវិធីរបស់មជ្ឈមណ្ឌលសិក្សាទំនើប ដែលជាដៃគូរវាងរដ្ឋ និងឯកជននាពេលនេះ សម្ដេចនាយករដ្ឋមន្រ្តីថា ការដំណើរការមិនអាចទៅរួចនោះទេ។
ពាក់ព័ន្ធនឹងបញ្ហានេះ សម្ដេច ឱ្យក្រសួងអប់រំ ត្រូវធានាភាពជាម្ចាស់ការរបស់រដ្ឋ នៅក្នុងការគ្រប់គ្រងមូលដ្ឋានរបស់ខ្លួន។ «សូមកុំបង្កើតស្ដង់ដាពីរ ប្រព័ន្ធពីរ ក្នុងសាលាតែមួយ គឺកុំឱ្យសោះ»។ នេះជាការលើកឡើងរបស់សម្ដេចនាយករដ្ឋមន្រ្តី ដោយសម្ដេច មិនចង់ឱ្យមានការញែកសាលារដ្ឋ ទៅជាសាលាដែលមានស្ដង់ពីរ និងសិស្សពីរផ្សេងគ្នា។
ក្រោយលុបមជ្ឈមណ្ឌលសិក្សាទំនើបនៅតាមសាលាបឋមសិក្សា សម្ដេច ហ៊ុន ម៉ាណែត បានសុំការយោគយល់ពីអាណាព្យាបាល។ សម្ដេច សង្កត់ធ្ងន់លើការចូលរួមរបស់វិស័យឯកជនដូច្នេះ៖«ភាពជាដៃគូរវាងរដ្ឋ និងឯកជន មិនអាចយករូបមន្តណា ដែលបាត់ម្ចាស់ការរបស់រដ្ឋនៅក្នុងមូលដ្ឋានរបស់រដ្ឋនោះទេ»។
សូមបញ្ជាក់ថា មជ្ឈមណ្ឌលសិក្សាទំនេីប បានចាប់ផ្ដេីមដំណេីរការនៅក្នុងឆ្នាំ២០២០ ដែលបច្ចុប្បន្នមានក្នុងសាលាបឋមសិក្សាចំនួន១៨ នៅរាជធានីភ្នំពេញ និងខេត្តមួយចំនួន។ មជ្ឈមណ្ឌលសិក្សាទំនើប ជាកម្មវិធីដែលផ្តល់ការសិក្សាពេញមួយថ្ងៃ ចាប់ពីកម្រិតមត្តេយ្យ៕
© រក្សាសិទ្ធិដោយ thmeythmey.com
Tag:
.gif)