.png)
.jpg)
.jpg)
ភ្នំសំពៅ ឯកភ្នំ បាណន់ និងប្រាសាទបាសែត ជាតំបន់ទេសចរណ៍វប្បធម៌សក្តានុពលនៅបាត់ដំបង
- ថ្ងៃសុក្រ ទី៧ ខែមីនា ឆ្នាំ២០២៥ ម៉ោង ៨:៥៩ នាទី ព្រឹក
ភ្នំពេញ៖ ខេត្តបាត់ដំបង ជាខេត្តដែលមានសក្ដានុពលទេសចរណ៍បែបវប្បធម៌ប្រវត្តិសាស្រ្ត និងធម្មជាតិ ហើយក៏ជាមូលហេតុដែលធ្វើឲ្យខេត្តនេះសម្បូរបែបនៃកន្លែងទេសចរណ៍ផងដែរ។ ការរក្សាប្រពៃណីវប្បធម៌ ប្រាសាទ និងសំណង់ចាស់ៗ បានធ្វើឱ្យខេត្តនេះ ជាទីទេសចរណ៍ដ៏ទាក់ទាញសម្រាប់ភ្ញៀវទេសចរជាតិ និងអន្តរជាតិ។ សម្រាប់ភ្ញៀវទេសចរបរទេសនិយមទៅកម្សាន្តតាមរមណីយដ្ឋានបែបវប្បធម៌ប្រវត្តិសាស្ត្រ ដូចជាប្រាសាទបាណន់ ប្រាសាទឯកភ្នំ ប្រាសាទបាសែត និងភ្នំសំពៅជាដើម។ រីឯ ភ្ញៀវជាតិ និយមទៅកម្សាន្តកន្លែងទេសចរណ៍បែបធម្មជាតិ កន្លែងលេងទឹក និងឡូរីបាត់ដំបង។
ខេត្តបាត់ដំបងសម្បូរ តំបន់ទេសចរណ៍ល្បីៗជាច្រើន ជាពិសេសតំបន់ទេសចរណ៍វប្បធម៌ ជាផ្នែកមួយដ៏សំខាន់ក្នុងការជំរុញភាពទាក់ទាញទេសចរឱ្យមកកន្សាន្តក្នុងខេត្តបាត់ដំបង។ តំបន់ទេសចរណ៍វប្បធម៌ក្នុងខេត្តបាត់ដំបង មានចំនួន ១១កន្លែង ក្នុងនោះវប្បធម៌ប្រវិត្តសាស្រ្ត ៥កន្លែង, វប្បធម៌ធម្មជាតិ ៣កន្លែង, សហគមន៍ទេសចរណ៍វប្បធម៌១កន្លែង និងសារមន្ទីរ២កន្លែង។
លោក ហម អរុណ អនុប្រធានមន្ទីរទេសចរណ៍ខេត្តបាត់ដំបង លើកឡើងថា ៖ «តំបន់ទេសចរវប្បធម៌ក្នុងខេត្តបាត់ដំបង ជាផ្នែកមួយដ៏សំខាន់ក្នុងការទាក់ទាញចិត្តទេសចរឱ្យមកកម្សាន្តជាហូរហែ។ ទេសចរនិយមទៅកម្សាន្តតាមរមណីយដ្ឋានបែបវប្បធម៌ប្រវត្ថិសាស្ត្រ ដូចជាប្រាសាទបាណន់ ប្រាសាទឯកភ្នំ ប្រាសាទបាសែត និងភ្នំសំពៅជាដើម។ តំបន់ទេសចរណ៍វប្បធម៌ភ្នំសំពៅ ដ៏ចំណាស់នៅបាត់ដំបង ជាទីទេសចរណ៍វប្បធម៌ទាក់ទាញទេសចរជាងគេក្នុងខេត្តបាត់ដំបង»។
លោក ហម អរុណ អនុប្រធានមន្ទីរទេសចរណ៍ខេត្តបាត់ដំបង
រមណីយដ្ឋានវប្បធម៌ប្រវត្តិសាស្ត្រភ្នំសំពៅ ស្ថិតនៅឃុំភ្នំសំពៅ ស្រុកបាណន់ តាមបណ្តោយផ្លូវជាតិលេខ៥៧ ចម្ងាយ១២គីឡូម៉ែត្រពីទីរួមខេត្តបាត់ដំបង។
ចំណែក ប្រាសាទឯកភ្នំ ដែលមានរចនាបថស្រដៀង ទៅនឹងប្រាសាទអង្គវត្ត ដោយមានកសិន្ធុព័ទ្ធជុំវិញ ក៏ជាតំបន់ទេសចរណ៍វប្បធម៌មានទេសចរទៅកម្សាន្តច្រើនផងដែរ។ ប្រាសាទឯកភ្នំ ជាប្រាសាទមានអាយុកាលដ៏វ័យចំណាស់មួយ ស្ថិតនៅភូមិស្រុកឯកភ្នំ ខេត្តបាត់ដំបង។
ម្យ៉ាងទៀតប្រាសាទនេះ នៅតែជាកន្លែងរមណីយដ្ឋានវប្បធម៌ ដែលមានធម្មជាតិស្រស់ បំព្រង ដើមឈើ ដុះជុំវិញជាច្រើនដើម បង្កើតជាម្លប់ដ៏ត្រឈឹងត្រឈៃ ទាក់ទាញភ្ញៀវទេសចរជាតិ និងអន្តរជាតិមកកម្សាន្ត។
តួយ៉ាង ពហុតំបន់ទេសចរណ៍វប្បធម៌ បានចូលរួមយ៉ាងសំខាន់ក្នុងការលើកកម្ពស់សេដ្ឋកិច្ចខេត្ត ស្របទៅនឹងការរៀបចំផែនការទីក្រុងវៃឆ្លាតផងដែរ។ បច្ចុប្បន្ន មន្ទីរទេសចរណ៍ខេត្តបាត់ដំបង ក៏បានពង្រឹងសេវាកម្មតំបន់ទេសចរណ៍វប្បធម៌ទាំងអស់ តាមបណ្ដាស្រុក ជាពិសេសស្រុកបាណន់ និងស្រុកសំឡូត ដើម្បីធ្វើឱ្យភ្ញៀវទេសចរស្នាក់នៅខេត្តបាត់ដំបងរយៈពេលយូរ។
រូបភាពពី៖ លោក លន់ សុប៊ែរ
ក្រៅពីនេះ មន្ទីរទេសចរណ៍ខេត្តបាត់ដំបង បានពង្រឹងលើវិស័យទេសចរណ៍ប្រកបដោយគុណភាព គឺការបណ្តុះបណ្តាលវិជ្ជាជីវៈ ផ្តល់ការងារ ដល់ប្រជាជនដែលបម្រើការតាមមូលដ្ឋានទេសចរណ៍ និងប្រយោលប្រមាណជាង២ម៉ឺននាក់។ តំបន់ទេសចរណ៍បែបវប្បធម៌ ស្ទឹង ទន្លេ ភ្នំ កសិទេសចរណ៍ អេកូទេសចរណ៍ ប្រពៃណីវប្បធម៌ អាគារ វត្តបុរាណ ម្ហូបប្រចាំតំបន់ រមណីយដ្ឋានធម្មជាតិ និងកែច្នៃច្រើនកន្លែង ក៏ជាភាពទាក់ទាញ របស់ខេត្តបាត់ដំបងដែរ។
រដ្ឋបាលខេត្តបាត់ដំបង ក៏បានរៀបចំសោភ័ណភាពក្នុងខេត្ត និងតំបន់គោលដៅទេសចរណ៍រួចរាល់ ដើម្បីត្រៀមទទួលទេសចរផងដែរ។ លោក ហម អរុណ អនុប្រធានមន្ទីរទេសចរណ៍ខេត្តបាត់ដំបង បញ្ជាក់ថា៖ « ភ្ញៀវទេសចរតែងសម្រុកមកលេងនៅខេត្តនេះ ច្រើនកុះករ យើងបានរៀបចំតំបន់គោលដៅទេសចរណ៍រួចរាល់ ដើម្បីទទួលភ្ញៀវទេសចរ។ ខ្ញុំសង្ឃឹមថា ឆ្នាំនេះខេត្តបាត់ដំបង នឹងទទួលបានទេសចរកាន់តែច្រើន ជាងឆ្នាំមុនៗទៀត។»។
សូមជម្រាបថា ទិវាវប្បធម៌ជាតិ ៣មីនា លើកទី២៧ ឆ្នាំ២០២៥ នឹងធ្វើឡើងរយៈពេល ១ខែក្រោមប្រធានបទ «យុវជនដើម្បីវប្បធម៌ជាតិ»។ ក្នុងឱកាសនោះ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា ចាត់ទុកទិវានេះ ជាការបំផុសឱ្យប្រជាពលរដ្ឋកម្ពុជាគ្រប់រូប ជាពីសេសយុវជន ចូលរួមកម្លាំងគ្នាក្នុងកិច្ចអភិរក្ស លើកស្ទួយ និងអភិវឌ្ឍវប្បធម៌ជាតិ វប្បធម៌ចម្រុះសហគមន៍ជនជាតិដើមភាគតិចកម្ពុជា។
ទិវាវប្បធម៌ជាតិ គឺជាទិវាដ៏មានសារៈសំខាន់មួយរបស់ប្រជាជាតិកម្ពុជា ដើម្បីរំឭកដល់គុណូបការៈបុព្វបុរសខ្មែរគ្រប់ជំនាន់ ដែលបានពលីទាំងកម្លាំងកាយ កម្លាំងចិត្ត កម្លាំងបញ្ញា និងអាយុជីវិត ក្នុងការបង្កើត ថែរក្សា និងការពារសម្បត្តិវប្បធម៌ ដ៏សម្បូរបែប និងមានតម្លៃ មិនអាចកាត់ថ្លៃបាន បន្សល់ទុកមកដល់កូនចៅជំនាន់ក្រោយ៕
© រក្សាសិទ្ធិដោយ thmeythmey.com
Tag:
