.png)
.png)
.jpg)
.jpg)
នាយករដ្ឋមន្ដ្រី ជំរុញឲ្យសហព័ន្ធ បន្ដពង្រឹងការផ្សព្វផ្សាយពីកិត្តិនាមគុនខ្មែរ នៅឆាកជាតិ និងអន្តរជាតិ
- ថ្ងៃសុក្រ ទី៧ ខែមីនា ឆ្នាំ២០២៥ ម៉ោង ១២:២៩ នាទី រសៀល
កិច្ចសំណេះសំណាលជាមួយសហព័ន្ធកីឡាប្រដាល់គុនខ្មែរ រូបពីហ្វេសប៊ុក សម្ដេច ហ៊ុន ម៉ាណែត
ភ្នំពេញ៖ សម្ដេច ហ៊ុន ម៉ាណែត បានជំរុញឱ្យសហព័ន្ធកីឡាប្រដាល់គុនខ្មែរ បន្តខិតខំអភិវឌ្ឍវិស័យគុនខ្មែរ ឱ្យកាន់តែរីកចម្រើន និងខិតខំផ្សព្វផ្សាយអំពីកីឡានេះ ឱ្យកាន់តែទូលំទូលាយថែមទៀត។ ការជំរុញបែបនេះ របស់សម្តេចនាយករដ្ឋមន្ត្រីកម្ពុជា ធ្វើឡើងក្នុងពេលដែល លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរ និងសហការីជាថ្នាក់ដឹកនាំសហព័ន្ធ ចូលជួបសម្តែងការគួរសម កាលពីថ្ងៃទី៦ ខែមីនា។
បើតាមទំព័រហ្វេសប៊ុកសម្តេច ហ៊ុន ម៉ាណែត នៅក្នុងជំនួបនេះ ប្រមុខរាជរដ្ឋាភិបាល បានកត់សម្គាល់ថា កីឡាប្រដាល់គុនខ្មែរ កំពុងទទួលបានការគាំទ្រជាខ្លាំងពីមហាជន ដែលធ្វើឱ្យវិស័យគុនខ្មែរ កាន់តែមានភាពលេចធ្លោ និងកាន់តែមានឈ្មោះ នៅលើឆាកអន្តរជាតិ។
ដើម្បីពង្រីកសក្តានុពលរបស់កីឡាគុនខ្មែរ ប្រមុខរាជរដ្ឋាភិបាល ក៏បានលើកទឹកចិត្តដល់សហព័ន្ធ ឱ្យបន្តសហការជាមួយក្រសួង ស្ថាប័ន និងអាជ្ញាធរដែនដី ឱ្យកាន់ល្អថែមទៀត ជាពិសេសក្នុងការរៀបចំព្រឹត្រិការណ៍សំខាន់ៗប្រចាំឆ្នាំ។
នៅលើឆាកអន្តរជាតិវិញស សម្តេច ហ៊ុន ម៉ាណែត បានលើកទឹកចិត្តឱ្យសហព័ន្ធ ខិតខំពង្រឹងកិច្ចសហប្រតិបត្តិការ ជាមួយបណ្ដាប្រទេសនានាលើពិភពលោក សំដៅពង្រីកការបណ្ដុះបណ្ដាលកីឡាប្រដាល់គុនខ្មែរ និងផ្សព្វផ្សាយរូបភាពគុនខ្មែរឱ្យកាន់តែល្បីរន្ទឺ។
ទំព័រហ្វេសប៊ុករបស់នាយករដ្ឋមន្ត្រី បានសរសេរទៀតថា នៅក្នុងជំនួបនេះ លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរ បានលើកឡើងពីសកម្មភាពការងារជាច្រើន ដែលសហព័ន្ធ បាននិងកំពុងធ្វើ ដើម្បីពង្រឹង និងពង្រីកកិត្តិនាមរបស់ កីឡាប្រដាល់គុនខ្មែរ ទាំងនៅឆាកជាតិ និងនិងអន្តរជាតិ។
បើតាម លោក ខូវ ឆាយ សហព័ន្ធ បានរៀបចំការប្រកួតកីឡាគុនខ្មែរ ជាប្រចាំ ដោយក្នុងមួយសប្ដាហ៍ មានសង្វៀនចន្លោះពី១៨ ទៅ២២កម្មវិធី។ ការប្រកួតទាំងនោះ ក៏រាប់បញ្ចូលសង្វៀនថ្នាល ដែលមានលក្ខណៈអចិន្ដ្រៃយ៍នៅខេត្តបាត់ដំបង និងខេត្តសៀមរាប ព្រមទាំងមានសង្វៀនប្រកួតថ្នាល់ ចល័តតាមរាជធានី-ខេត្តផងដែរ។
លើសពីសកម្មភាពកីឡា សហព័ន្ធ បានដឹកនាំសមាជិកខ្លួន ចូលរួមសកម្មភាពសង្គម ដូចជាការប្រកួតបាល់ទាត់សប្បុរសធម៌ជួយដល់មន្ទីរពេទ្យ និងការបរិច្ចាគឈាមជាដើម។ ប្រធានសហព័ន្ធរូបនេះ ក៏បានបញ្ជាក់ថា សហព័ន្ធក៏បានយកចិត្តទុកដាក់លើកិច្ចការផ្សព្វផ្សាយគុនខ្មែរ នៅលើឆាកអន្ដរជាតិ ដោយមានការរៀបចំការប្រកួតនៅបរទេសនានា។
ប្រធានសហព័ន្ធកីឡាប្រដាល់គុនខ្មែររូបនេះ បានឱ្យដឹងដែរថា បច្ចុប្បន្ន សហព័ន្ធ មានសមាគមកីឡាប្រដាល់គុនខ្មែរក្រសួង រាជធានី-ខេត្ត ចំនួន២៣ និងមានក្លិបចំណុះសមាគមចំនួន១៤៤ ដែលមានអត្ដពលិកសរុប ១ ២៣៦នាក់ ក្នុងនោះកីឡាករចំនួន ១ ១៩១នាក់ និងកីឡាការិនី ៤៥នាក់។ នេះបើតាមលោក ខូវ ឆាយ ប្រធានសហព័ន្ធប្រដាល់គុនខ្មែរ ដែលបានឱ្យដឹងទៀតថា សហព័ន្ធ មានគ្រូបង្វឹក ១៤៤នាក់, គ្រូជំនួយ ១៤៨នាក់, មន្ដ្រីបច្ចេកទេសអាជ្ញាកណ្ដាល និងចៅក្រម ១៨០នាក់ ក្នុងនោះមានស្ត្រី១២នាក់ និងមានមន្ដ្រីលេខាធិការដ្ឋាន ៧នាក់៕
© រក្សាសិទ្ធិដោយ thmeythmey.com
Tag:
.gif)