.png)
.jpg)
.jpg)
សំរាមនៅប្រឡាយស្ទឹងមានជ័យអស់ហើយ! អាជ្ញាធរប្រាប់ពលរដ្ឋត្រូវដាក់ទុកសំរាមឱ្យបានត្រឹមត្រូវ
- ថ្ងៃអាទិត្យ ទី៩ ខែមីនា ឆ្នាំ២០២៥ ម៉ោង ៤:០០ នាទី រសៀល
ភ្នំពេញ៖ អាជ្ញាធរខណ្ឌមានជ័យ សហការជាមួយមន្ទីរសាធារណការ ដាក់គ្រឿងចក្រ ចុះស្ដារប្រឡាយនិងប្រមូលសំរាមដែលកកស្ទះក្នុងប្រឡាយស្ទឹងមានជ័យ ដើម្បីសម្រួលប្រព័ន្ធផ្លូវទឹកឱ្យហូរបានលឿន និងត្រៀមសម្រាប់រដូវវស្សាចូលមកដល់។ ចំពោះសំរាម ស្តារបានមានចំនួន ៣ឡាន ភាគច្រើនជាប្លាស្ទិក ប្រអប់ស្នោរ ជាដើម។
លោក សេង គន្ធ អភិបាលខណ្ឌមានជ័យ បានលើកឡើងថា សំរាម នៅពាសពេញប្រឡាយនេះ ក៏ព្រោះប្រជាពលរដ្ឋ មិនទាន់យល់ពីការទុកដាក់សំរាមឱ្យបានត្រឹមត្រូវនៅឡើយ។ ដោយឡែក ឡានសំរាម ពេលខ្លះមកប្រមូលខុសពេលវេលាបន្តិច។ ដូច្នេះពលរដ្ឋ ត្រូវប្រមូលសំរាមទុក ចៀសវាងឆ្កែ ពាំ ឬខ្យល់បើង។
លោក សេង គន្ធ អភិបាលខណ្ឌមានជ័យJPG
អភិបាលខណ្ឌមានជ័យ បញ្ជាក់បែបនេះ៖ « អាជ្ញាធរ តែងតែចុះស្តារសំរាមតាមប្រឡាយនេះ ១ដង ទៅ២ដង ក្នុងមួយឆ្នាំ ទៅតាមបរិមាណសំរាម។ យើងសម្អាតរហូតព្រោះប្រឡាយហ្នឹង ឱ្យតែមានសំរាមរៀងច្រើន យើងសម្អាតហើយ។ រដូវប្រាំងមិនសូវអីប៉ុន្មានទេ ប៉ុន្តែរដូវវស្សា គឺយើងត្រូវប្រយ័ត្នប្រយែងហើយ ព្រោះថាសំរាមច្រើន»។
យ៉ាងណាមិញ អាជ្ញាធរខណ្ឌមានជ័យ អំពាវនាវឱ្យ ប្រជាពលរដ្ឋវេចខ្ចប់ទុកដាក់សំរាមឱ្យបានត្រឹមត្រូវ។ សូមកុំបោះសំរាមចូលតាមលូ ឬប្រឡាយ ដែលធ្វើអោយមានការកកស្ទះនៅតាមប្រឡាយមេ ក្នុងនាមអាជ្ញាធរមូលដ្ឋានសង្ឃឹមប្រជាបងប្អូននឹងចូលរួមឱ្យបានគ្រប់ៗគ្នា៕
គ្រឿងចក្រ ប្រមូលសំរាម
ប្រឡាយស្ទឹងមានជ័យ ក្រោយប្រមូលសំរាម
ប្រឡាយស្ទឹងមានជ័យ មុនប្រមូលសំរាម
© រក្សាសិទ្ធិដោយ thmeythmey.com
Tag:
