.png)
.jpg)
.jpg)
នាយករដ្ឋមន្រ្តីកាណាដា ចាស្ទីន ទ្រូដូ ប្រកាសចុះចេញពីតំណែងនៅថ្ងៃទី១៤ ខែមីនា
- ថ្ងៃសុក្រ ទី១៤ ខែមីនា ឆ្នាំ២០២៥ ម៉ោង ១០:៥៦ នាទី ព្រឹក
លោក ចាស្ទីន ទ្រូដូ នាយករដ្ឋមន្រ្តីកាណាដា ។ រូបភាព ៖ AP
លោក ចាស្ទីន ទ្រូដូ បានប្រកាសថា លោកនឹងលាលែងពីតំណែងនាយករដ្ឋមន្រ្តី នៅថ្ងៃទី១៤ ខែមីនា ដោយបើកផ្លូវឱ្យមេដឹកនាំបក្សសេរីនិយមថ្មី លោក Mark Carney ស្បថចូលកាន់តំណែងជានាយករដ្ឋមន្ត្រីកាណាដា។
«នេះអាចជាថ្ងៃចុងក្រោយរបស់ខ្ញុំនៅក្នុងតំណែង ប៉ុន្តែខ្ញុំនៅតែជាជនជាតិកាណាដាដ៏រឹងមាំ ដោយមិនមានការសោកស្តាយ»។ នាយករដ្ឋមន្ត្រីកាណាដា លោក ចាស្ទីន ទ្រូដូ បាននិយាយនៅក្នុងវីដេអូមួយដែលបានបង្ហោះនៅលើ X នៅថ្ងៃទី១៣ ខែមីនា ដោយបន្ថែមថា លោកមានមោទកភាពក្នុងការបម្រើប្រទេស និងប្រជាជនរបស់ខ្លួន។
ការប្រកាសនេះ ជាការបញ្ចប់រយៈពេលជិត១០ឆ្នាំ របស់លោក ទ្រូដូ ដឹកនាំរដ្ឋាភិបាលកាណាដា។ មេដឹកនាំថ្មីនៃគណបក្សសេរីនិយមដែលកំពុងកាន់អំណាច លោក Mark Carney នឹងស្បថចូលកាន់តំណែងនៅម៉ោង ១១ព្រឹក ថ្ងៃទី១៤ ខែមីនា (ម៉ោង ១០យប់នៅទីក្រុងភ្នំពេញ) ដើម្បីក្លាយជានាយករដ្ឋមន្ត្រីទី២៤ របស់កាណាដា។ សមាជិកនៃគណៈរដ្ឋមន្ត្រីរបស់លោក Carney ក៏បានស្បថចូលកាន់តំណែងនៅថ្ងៃតែមួយដែរ ប៉ុន្តែនៅមិនទាន់មានព័ត៌មានច្បាស់ការ ថាក្រុមថ្មីនឹងមានការផ្លាស់ប្តូរសមាជិកណាខ្លះនោះទេ។
អត្ថបទទាក់ទង
គណបក្សសេរីនិយមកាណាដា កាលពីថ្ងៃទី៩ ខែមីនា បានបោះឆ្នោតជ្រើសរើសលោក Carney អតីតទេសាភិបាលធនាគារកណ្តាលកាណាដា ជាមេដឹកនាំថ្មីរបស់ខ្លួន។ លោក Carney នឹងនៅតែជានាយករដ្ឋមន្ត្រីរហូតដល់ការបោះឆ្នោតបន្ទាប់ ដែលគ្រោងធ្វើនៅថ្ងៃទី ២០ ខែតុលា។ វាទំនងជាថា លោក នឹងរៀបចំបោះឆ្នោតមុនកាលកំណត់។
នាយករដ្ឋមន្ត្រី ទ្រូដូ បានប្រកាសកាលពីខែមករាថា លោកកំពុងចុះចេញពីតំណែងជាមេដឹកនាំគណបក្សកាន់អំណាច ដោយបើកផ្លូវឱ្យក្រុមសេរីនិយម ជ្រើសរើសអ្នកស្នងតំណែងលោក។
លោក ទ្រូដូ ដែលមានអាយុ ៥៣ឆ្នាំ បានចូលកាន់តំណែងជានាយករដ្ឋមន្ត្រីនៅក្នុងខែវិច្ឆិកា ២០១៥ ហើយត្រូវបានជាប់ឆ្នោតឡើងវិញ ២ដង ដោយក្លាយជានាយករដ្ឋមន្ត្រីមួយក្នុងចំណោមនាយករដ្ឋមន្ត្រីដែលកាន់អំណាចយូរបំផុតរបស់កាណាដា។ យ៉ាងណាមិញ ប្រជាប្រិយភាពរបស់លោកធ្លាក់ចុះចាប់តាំងពី ២ឆ្នាំមុន ស្របពេលមានការខឹងសម្បាជាសាធារណៈចំពោះការកើនឡើងថ្លៃដើមទំនិញ និងកង្វះលំនៅឋាន។
ការស្ទង់មតិជាច្រើនបង្ហាញថា បក្សសេរីនិយមនឹងចាញ់គណបក្សអភិរក្សនិយមនៅក្នុងការបោះឆ្នោតដែលគ្រោងធ្វើនៅខែតុលា ទោះបីជាអ្នកណាជាអ្នកដឹកនាំគណបក្សនោះក៏ដោយ៕
© រក្សាសិទ្ធិដោយ thmeythmey.com
Tag:
