.png)
.jpg)
.jpg)
លោកម៉ាក្រុងប្រជុំជាមួយនាយសេនាធិការកងទ័ព៣៤ប្រទេស ដើម្បីរៀបផែនការជួយធានាសន្តិសុខអ៊ុយក្រែន
- ថ្ងៃសុក្រ ទី១៤ ខែមីនា ឆ្នាំ២០២៥ ម៉ោង ៩:២៩ នាទី យប់
ដោយ៖ ម៉ម ពិសី (RFI ខេមរភាសា)
កាលពីថ្ងៃអង្គារទី១១មីនា លោកម៉ាក្រុង ប្រធានាធិបតីបារាំង បានជួបប្រជុំជាមួយនាយសេនាធិការកងទ័ព មកពីបណ្ដាប្រទេសជាង៣០ ដើម្បីនិយាយអំពីលទ្ធភាពចូលរួម របស់ប្រទេសនីមួយៗ នៅក្នុងផែនការជួយធានាការពារសន្តិសុខអ៊ុយក្រែន។ ជាការធានាសន្តិសុខនិងសន្តិភាពយូរអង្វែងសម្រាប់អ៊ុយក្រែន នៅពេលណាមានកិច្ចព្រមព្រៀងបញ្ចប់សង្គ្រាមជាស្ថាពរជាមួយរុស្ស៊ី។ គួរបញ្ជាក់ថា អ៊ុយក្រែនទើបតែបានយល់ព្រមតាមសំណើអាមេរិក ផ្អាកការប្រយុទ្ធបណ្តោះអាសន្ន៣០ថ្ងៃ ដើម្បីឈានទៅបើកការចរចាសន្តិភាព។ តែសម្រាប់ពេលនេះ គេកំពុងរងចាំស្តាប់ចម្លើយពីខាងរុស្ស៊ី។
ពីឆ្វេងទៅស្តាំ៖ លោក Sebastien Lecornu រដ្ឋមន្ត្រីការពារជាតិបារាំង, លោកប្រធានាធិបតីម៉ាក្រុង, លោកនាយកសេនាធិការកងទ័ពបារាំង Thierry Burkhard និងលោក Tony Radakin នាយសេនាធិការកងទ័ពជាតិអង់គ្លេស។ លោកម៉ាក្រុង បានដឹកនាំការប្រជុំជាមួយនាយសេនាធិការកងទ័ពចំនួន៣៤ប្រទេស ដើម្បីរៀបចំផែនការការពារសន្តិសុខនិងសន្តិភាពអ៊ុយក្រែន។ ប៉ារីស ថ្ងៃទី១២មីនា២០២៥ AP - Sarah Meyssonnier
នាយកសេនាធិការកងទ័ពចំនួន៣៤ប្រទេស បានមកជួបប្រជុំនៅទីក្រុងប៉ារីសទៅតាមការអញ្ជើញរបស់លោកម៉ាក្រុង កាលពីរសៀលថ្ងៃអង្គារទី១១មីនា។ ភាគច្រើននៃនាយសេនាធិការកងទ័ពដែលមកចូលរួម គឺមកប្រទេសសមាជិកសហភាពអឺរ៉ុប សមាជិកអូតង់ដូចជាអង់គ្លេស តួកគី តែក៏មានផងដែរ មកពីប្រទេសដែលមិនមែនជាសមាជិកសម្ព័ន្ធភាពទាំង២នេះ ដូចជាអូស្ត្រាលី នូវែលសេឡង់ និងជប៉ុន។ សហភាពអឺរ៉ុបនិងអ៊ុយក្រែនក៏បានបញ្ជូនតំណាងមកចូលរួមដែរ លើកលែងតែនាយសេនាធិការកងទ័ពអាមេរិក ដែលមិនបានមកចូលរួម។
លោកម៉ាក្រុងដែលជាអ្នកផ្តួចផ្តើមគំនិត បានលើកឡើងថា កម្មវត្ថុនៃកិច្ចប្រជុំដ៏ពិសេសនេះ គឺដើម្បីបោះជំហានចេញពីទ្រឹស្តីមកជាការអនុវត្តជាក់ស្តែង។ ពោលគឺដើម្បីគូសវាសផែនការ ធានាការពារសន្តិសុខគួរជាទីទុកចិត្តសម្រាប់អ៊ុយក្រែន និងដើម្បីការពារសន្តិភាពជារៀងដរាបឲ្យអ៊ុយក្រែន។ ដូច្នេះឱកាសនេះ គឺតំណាងប្រទេសនីមួយៗ ដែលមានវត្តមានចូលរួម ត្រូវតែពិចារណាគិតគូរ ថាតើម្នាក់ៗអាចចូលរួមបានប៉ុណ្ណា និងដោយរបៀបណា។ លោកម៉ាក្រុងបានអំពាវនាវប្រាប់ទៅសម្ព័ន្ធមិត្តអឺរ៉ុបទាំងអស់ ថាត្រូវរួមសហការសាមគ្គីពួតដៃគ្នាទទួលខុសត្រូវ ធ្វើឲ្យអឺរ៉ុបមានទម្ងន់ធ្ងន់បំផុត ដើម្បីការពារអ៊ុយក្រែនផង និងការពារអឺរ៉ុបខ្លួនឯងផងទៅថ្ងៃអនាគត។
ផ្អែកតាមប្រភពពីវិមានប្រធានាធិបតីបារាំង នាយសេនាធិការទាំង៣៤ប្រទេសរួមជាមួយបារាំង បានយល់ស្របដូចគ្នាថា ការធានាសន្តិសុខដែលគួរឲ្យទុកចិត្តបំផុតជូនអ៊ុយក្រែន គឺត្រូវតែធ្វើឡើងក្នុងរយៈពេលយូរអង្វែង ហើយធ្វើដោយការជួយទំនុកបម្រុងគាំទ្រដោយក្តីប្តេជ្ញាបំផុត ជូនដល់កងទ័ពអ៊ុយក្រែន។ នាយសេនាធិការទាំងអស់ បានលើកឡើងទៀតថា ផែនការការងារនេះ មិនអាចកាច់ផ្តាច់បានឡើយពីអង្គការសម្ព័ន្ធភាពអូតង់ ពោលគឺត្រូវតែមានការចូលរួមនៃសំណាញ់សន្តិសុខរបស់សហរដ្ឋអាមេរិក ដែលជាសរសរទ្រូងដ៏ធំរបស់អូតង់។
យោងតាមលោករដ្ឋមន្ត្រីការពារជាតិបារាំង គឺមានប្រទេស១៥ដែលបញ្ជាក់ថាអាចចូលរួមក្នុងរចនាសម្ព័ន្ធកងទ័ពរួម ដែលអាចបញ្ជូនទៅរក្សាសន្តិភាពនៅអ៊ុយក្រែន។ តែចំណុចលម្អិតយ៉ាងណា លោកបញ្ជាក់ថាលក្ខខណ្ឌទាំងនេះនឹងត្រូវគូសវាស នៅក្នុងអនាគតនៃកិច្ចព្រមព្រៀងសន្តិភាពរវាងអ៊ុយក្រែននិងរុស្ស៊ី។
គួរកត់សំគាល់ថា កិច្ចប្រជុំពិសេសរវាងនាយសេនាធិការកងទ័ពជាង៣០ប្រទេសនេះ គឺស្របពេលដែលភាគីអាមេរិកនិងអ៊ុយក្រែន បានជួបប្រជុំគ្នានៅទីក្រុងចេដដាប្រទេសអារ៉ាប៊ីសាអូឌីត។
ការប្រជុំដែលបានចេញលទ្ធផលថា អ៊ុយក្រែនយល់ព្រមទទួលយកសំណើរបស់អាមេរិក ក្នុងការផ្អាកការប្រយុទ្ធទាំងស្រុងរយៈពេល៣០ថ្ងៃ ដើម្បីបើកផ្លូវចរចាជាមួយរុស្ស៊ី។ ចំណែកភាគីអាមេរិកវិញបានសុខចិត្តផ្តល់ជំនួយយោធាឲ្យអ៊ុយក្រែនឡើងវិញ។
ដោយឡែក កាលពីថ្ងៃពុធទី១២មីនា លោក Sebatien Lecornu រដ្ឋមន្ត្រីការពារជាតិបារាំង បានជួបប្រជុំក្របខណ្ឌE5 ជាមួយរដ្ឋមន្ត្រីការពារជាតិអង់គ្លេស អាល្លឺម៉ង់ អ៊ីតាលី និងប៉ូឡូញ ដើម្បីនិយាយលម្អិតអំពីការពួតដៃគ្នាពង្រឹងសន្តិសុខអឺរ៉ុប ប្រឈមនឹងការគំរាមរបស់រុស្ស៊ី។ លោក Boris Pistorius រដ្ឋមន្ត្រីការពារជាតិអាល្លឺម៉ង់បានលើកឡើងថាក្រុមប្រទេសអឺរ៉ុប ត្រូវតែប្រើពេលវេលា៣០ថ្ងៃនៃការផ្អាកការប្រយុទ្ធបណ្តោះអាសន្ននេះ ឲ្យមានប្រយោជន៍បំផុត។
លោកលើកឡើងថា ផែនការពង្រឹងសមត្ថភាពការពារជាតិរបស់អឺរ៉ុប មានរឿងដែលត្រូវធ្វើច្រើនណាស់ ជាក់ស្តែងការសម្រួលផ្នែករដ្ឋបាលមិនថាថ្នាក់ជាតិនិងថ្នាក់អឺរ៉ុប និងការរៀបចំឲ្យមានស្តង់ដាររួមតែមួយ សម្រាប់ប្រព័ន្ធគ្រឿងសព្វាវុធ ដែលផលិតនិងប្រើប្រាស់នៅអឺរ៉ុប។ ដោយឡែក លោករដ្ឋមន្ត្រីការពារជាតិបារាំង បានគូសបញ្ជាក់ពីភាពអាសន្ន ដែលត្រូវតែពង្រឹងឲ្យបានឆាប់ នូវសមត្ថភាពការពារសន្តិសុខអវកាស និងប្រព័ន្ធការពារផ្លូវអាកាសដូចជាប្រព័ន្ធខែលដែលអាចចាប់កម្ទេចមីស៊ីលបាលីស្ទីកជាដើម៕
© រក្សាសិទ្ធិដោយ thmeythmey.com
