.png)
.jpg)
.jpg)
រដ្ឋមន្ត្រីក្រសួងមហាផ្ទៃ នឹងបញ្ជូននគរបាលដែលប្រព្រឹត្តល្មើសវិន័យ ទៅធ្វើការនៅព្រំដែន
- ថ្ងៃចន្ទ ទី១៧ ខែមីនា ឆ្នាំ២០២៥ ម៉ោង ៤:៥៩ នាទី រសៀល
លោក ស សុខា រដ្ឋមន្ត្រីក្រសួងមហាផ្ទៃ។ រូបពី ក្រសួងមហាផ្ទៃ
លោក ស សុខា នឹងពិន័យមន្ត្រីនគរបាលណា ដែលប្រព្រឹត្តល្មើសវិន័យ ដោយបញ្ជូនទៅបម្រើការ នៅតាមតំបន់ព្រំដែន ពី៣ ទៅ៦ខែ ជាការព្រមាន។ រដ្ឋមន្ត្រីមហាផ្ទៃថ្លែងបែបនេះ ក្នុងពិធីបិទវគ្គបំប៉នជំនាញអន្តរាគមន៍រំដោះចំណាប់ខ្មាំង, វគ្គបំប៉នជំនាញបង្ការ និងបង្ក្រាបសកម្មភាពចលាចល និងវគ្គបំប៉នជំនាញបច្ចេកទេសស្រាវជ្រាវសួរចម្លើយ នៅសាលានគរបាលជាតិមិត្តភាពកម្ពុជា-វៀតណាម ស្ថិតក្នុងភូមិទី១ ឃុំត្រែងត្រយឹង ស្រុកភ្នំស្រួច នាថ្ងៃទី១៧ ខែមីនានេះ។
ពីវេទិកានេះ លោក ស សុខា បានបន្ទោសមន្ត្រីនគរបាលខ្លះថា មិនប្រឹងប្រែងបំពេញ ការងារឡើយ ហើយថែមទាំងប្រព្រឹត្តល្មើសវិន័យថែមទៀត។ លោក ស សុខា សង្កត់ធ្ងន់យ៉ាងដូច្នេះ៖ «បានធ្វើការស្រួលនៅតាមអង្គភាព មិនខិតខំធ្វើឱ្យល្អទេ បែរជាទៅបង្ករឿងល្មើសវិន័យ! ដូច្នេះមានតែឱ្យទៅព្រំដែន ដើម្បីដឹងថាកងកម្លាំងនៅទីនោះគាត់លំបាកកម្រិតណា? មកវិញកែប្រែខ្លួន ហើយខិតខំធ្វើការឱ្យបានល្អ?»។
ជុំវិញការព្រមានរបស់លោក ស សុខា នេះដែរ លោក រ៉េន រតនៈ អ្នកនាំពាក្យរដ្ឋមន្ត្រីក្រសួងមហាផ្ទៃ បានពន្យល់បន្ថែមប្រាប់សាព័ត៌មានឌីជីថលថ្មីៗថា អង្គភាពជំនាញនឹងរៀបចំ បទប្បញ្ញត្តិ ដើម្បីដាក់ពិន័យជំនួសឱ្យការបន្ថយស័ក្ដិ ហើយករណីខ្លះ អាចបន្ថយទាំងស័ក្ដិ និងថែមទាំងបញ្ជូនទៅព្រំដែន។
យ៉ាងណាក៏ដោយ បើមន្ត្រីនគរបាលប្រព្រឹត្តខុសធ្ងន់ ក៏នៅតែទទួលទោសតាមច្បាប់ ឬអាចបណ្ដេញចេញពីតំណែងផងដែរ៕
© រក្សាសិទ្ធិដោយ thmeythmey.com
Tag:
