.png)
.jpg)
.jpg)
កីឡា១០ប្រភេទ នឹងត្រូវរៀបចំក្នុងព្រឹត្តិការណ៍បុណ្យទន្លេ លើកទី៩ នៅខេត្តតាកែវ
- ថ្ងៃចន្ទ ទី១៧ ខែមីនា ឆ្នាំ២០២៥ ម៉ោង ១០:២៩ នាទី យប់
កីឡា Paramotor កីឡាទូក និងកីឡាអុកចត្រង្គ
ព្រឹត្តិការណ៍បុណ្យទន្លេ លើកទី៩ នឹងរៀបចំឡើងពីថ្ងៃទី២១-២៣ ខែមីនា នៅបឹងតាកែវខេត្តតាកែវ។ ក្រសួងទេសចរណ៍ បានបញ្ជាក់ថា សម្ដេច ហ៊ុន ម៉ាណែត នាយករដ្ឋមន្ដ្រីកម្ពុជា និងភរិយា នឹងចូលរួមក្នុងពិធីបើកព្រឹត្តិការណ៍នេះ នាថ្ងៃទី២២ ខែមីនា។
គណៈកម្មការរៀបចំព្រឹត្តិការណ៍បុណ្យទន្លេ បានដាក់កីឡា ១០ប្រភេទ ដើម្បីលេងកម្សាន្ដ និងផ្តល់ជាទស្សនីយភាពសម្រាប់ពលរដ្ឋដែលចូលរួម ដោយកីឡាទាំងនោះ រួមមាន៖ ការ រត់កម្សាន្ដមហាជន ១ ២០០នាក់, វាយសី, អុកចត្រង្គ, បាល់ទាត់, ប៊ូល និងប៉េតង់, កីឡាទូកកានូ កាយ៉ាក, ប្រដាល់គុនខ្មែរ, កីឡាហោះហើរ Paramotor, ល្បែងកម្សាន្ដ (រែក, បាយខុម, លោតមឹក) និងការបង្ហោះ ៥០០គោមរួមគ្នា។
រដ្ឋបាលខេត្តតាកែវ បានប្រជុំគណៈកម្មការអន្ដរក្រសួងដើម្បីត្រួតពិនិត្យកិច្ចការត្រៀមរៀបចំបុណ្យទន្លេ លើកទី៩ នៅថ្ងៃទី១៧ ខែមីនា ដោយមានការចូលរួមពី លោក ហួត ហាក់ រដ្ឋមន្ដ្រីក្រសួងទេសចរណ៍, លោក វ៉ី សំណាង អភិបាលខេត្តតាកែវ និងមន្ត្រីពាក់ព័ន្ធមួយចំនួនទៀត។
ព្រឹត្តិការណ៍បុណ្យទន្លេ លើកទី៩ នឹងប្រារព្ធឡើងក្រោមប្រធានបទ «គុណតម្លៃនៃទន្លេ ផ្សារភ្ជាប់វប្បធម៌ និងទេសចរណ៍» និងដើម្បីលើកកម្ពស់តម្លៃផលិតផលក្នុងស្រុកជំរុញ និងផ្សព្វផ្សាយតំបន់សក្ដានុពលទេចរណ៍ នៅខេត្តតាមដងទន្លេ នៃប្រទេសកម្ពុជា។
លោក ហង់ រស្មី អនុប្រធាននាយកដ្ឋានគ្រប់គ្រងសេវាកម្សាន្ត និងកីឡាទេសចរណ៍ បានបញ្ជាក់ប្រាប់សារព័ត៌មានថ្មីៗ តាមតេលេក្រាមថា គណៈកម្មការរៀបចំព្រឹត្តិការណ៍នេះ នឹងដាក់កីឡា ព្រមទាំងល្បែងកម្សាន្ដ១០ប្រភេទ ក្នុងនោះមានរត់កម្សាន្ដចម្ងាយ ៥គីឡូម៉ែត្រ ១, ២០០នាក់, វាយសី, កីឡាអុកចត្រង្គ, កីឡាបាល់ទាត់, កីឡាប៊ូល និងប៉េតង់, កីឡាទូកកានូ កាយ៉ាក, កីឡប្រដាល់គុនខ្មែរ, កីឡាហោះហើរ Paramotor, ល្បែងកម្សាន្ដ (រែក, បាយខុម, លោតម៉ឹក) និងបង្ហោះ ៥០០គោមរួមគ្នា។
ក្រៅពីសកម្មភាពកីឡា គណៈកម្មការរៀបចំ ក៏មានការសម្ដែងទស្សនីយភាពសិល្បៈ ការប្រគំតន្ដ្រី ការអុជកាំជ្រួចអបអរ ការតាំងពិព័រណ៍សមិទ្ធផលក្នុងវិស័យទេសចរណ៍ មហោស្រពម្ហូបអាហារ ការតាំងផលិតផលកសិ-ទេសចរណ៍ និងព្រមទាំងគម្រោងអភិវឌ្ឍ៍នានាក្នុងខេត្តតាកែវផងដែរ៕
© រក្សាសិទ្ធិដោយ thmeythmey.com
Tag:
