ភ្នំពេញ៖ លោក វ៉ាង វិនពីន (WANG Wenbin) ឯកអគ្គរដ្ឋទូតចិនប្រចាំកម្ពុជា បាន​សរសេរ​នៅ​លើទំព័រហ្វេសប៊ុក នាថ្ងៃទី១៨ ខែមីនានេះថា ផ្លូវថ្មើរជើង (Walk Street) នៅមាត់ទន្លេ កំពុង​ក្លាយជាកន្លែងកម្សាន្តចុងសប្ដាហ៍ដ៏ពេញនិយមសម្រាប់ពលរដ្ឋខ្មែរ និងភ្ញៀវទេសចរ។ ទន្ទឹមនេះ លោក ក៏សង្ឃឹមថា ការសម្ដែងសិល្បៈខ្មែរ, សកម្មភាពវប្បធម៌ និងការកម្សាន្ត​ផ្សេងទៀតនៅលើវិថីនេះនឹងទាក់ទាញទេសចរចិនកាន់តែច្រើន។

លោក វ៉ាង វិនពីន សរសេរបែបនេះថា៖ «ចាប់តាំងពីបើកដំណើរការនាឆ្នាំនេះមក វិថីថ្មើរ​ជើង​នៅមាត់ទន្លេក្នុងរាជធានីភ្នំពេញ បានក្លាយជាកន្លែងកម្សាន្តចុងសប្តាហ៍ដ៏ពេញនិយម​សម្រាប់អ្នករស់នៅក្នុងតំបន់ និងភ្ញៀវទេសចរ។ សង្ឃឹមថា ការសម្តែងសិល្បៈខ្មែរ សកម្មភាពវប្បធម៌ និងការកម្សាន្តផ្សេងទៀតនៅលើដងវិថីនេះ នឹងទាក់ទាញភ្ញៀវទេសចរ​ចិនកាន់តែច្រើន។»។

កាលពីថ្ងៃទី១៦ ខែមីនា ចុងសប្តាហ៍កន្លងទៅ សម្តេចនាយករដ្ឋមន្ត្រី ក៏បានអារម្មណ៍​នឹង​កំណើនទេសចរ ដែលទៅកម្សាន្តនៅផ្លូវថ្មើរជើង (Walk Street) នេះដែរទាំងទេសចរខ្មែរ និងបរទេស។

សម្តេច ហ៊ុន ម៉ា​ណែត បានសរសេរនៅទំព័រហ្វេសប៊ុកថា៖ «ពីមួយសប្ដាហ៍ ទៅមួយ​សប្ដាហ៍ រដ្ឋបាល​រាជធានីភ្នំពេញតែ​ងរៀបចំមានការសម្ដែងសិល្បៈបុរាណ ប្រពៃណី សម័យ បណ្ណាល័យចល័ត កន្លែងលក់ដូរ និងកន្លែងកម្សាន្តសប្បាយផ្សេងៗ។»។

សម្រាប់សម្តេច ហ៊ុន ម៉ាណែត ការរៀបចំសម្តែងសិល្បៈ នឹងធ្វើឱ្យទេសចរបរទេស កាន់តែស្គាល់ពីរបាំ និង​ទម្រង់សិល្បៈផ្សេងៗទៀតរបស់កម្ពុជា។ ប្រមុខរាជរដ្ឋាភិបាល ក៏មិនភ្លេចសរសើរ​សមត្ថកិច្ចះពាក់ព័ន្ធ ដែលបានពង្រឹងសន្តិសុខ សុវត្ថិភាព សណ្ដាប់​ធ្នាប់យ៉ាងល្អ ដល់ពលរដ្ឋដែលដើរដំណើរកម្សាន្ត ចាប់តាំងពីផ្លូវថ្មើរជើងដំណើរការមក​ផងដែរ។

រដ្ឋបាលរាជធានីភ្នំពេញ បាន​ដំណើរការសាកល្បងផ្លូវថ្មើរជើង កាលពីថ្ងៃទី១ ខែ​កុម្ភៈ​។ ផ្លូវ​នេះ រៀបចំឡើងនៅលើផ្ទៃដី ៥៧ហិកតា ស្ថិតក្នុងភូមិសាស្ត្រ ខណ្ឌដូនពេញ តាម​បណ្ដោ​យ​វិថី​ព្រះស៊ីសុវិត្ថ ចាប់ពីមុខប្រៃសណីយ៍កម្ពុជា ពីផ្លូវលេខ៩៤ ដល់ផ្លូវលេខ២៤០។ 

តាមគម្រោង ផ្លូវថ្មើរជើងនេះ ត្រូវបែងចែកជា ៣តំបន់ផ្សេងគ្នា ដោយ​មានទាំងហាងទំនិញ ភោជនីយដ្ឋាន សណ្ឋាគារ បារ និងរៀបចំជា​ pub street ​ ដើម្បី​បម្រើ​ដល់ការកម្សាន្ត និង​ដើរ​​ទិញទំនិញនៅពេលយប់ របស់​ភ្ញៀវទេសចរជាតិ និងអន្តរជាតិ។ តំបន់ទាំង ៣នេះ នឹង​បិទមិនឱ្យឡាន និងម៉ូតូ ចូលធ្វើចរាចណ៍នោះទេ ចា​ប់ពីម៉ោង៦ល្ងាច ដល់ម៉ោង១១យប់ ដើម្បីឱ្យការថ្មើរជើងកម្សាន្តរបស់ពលរដ្ឋ ងាយស្រួល៕