.png)
.jpg)
.jpg)
សហភាពអឺរ៉ុបជ្រោមជ្រែងស្វែងរកជំនួយជួយកសាងស៊ីរី
- ថ្ងៃអង្គារ ទី១៨ ខែមីនា ឆ្នាំ២០២៥ ម៉ោង ១០:២៩ នាទី យប់
សហភាពអឺរ៉ុបជ្រោមជ្រែងស្វែងរកជំនួយជួយកសាងស៊ីរី។ AP - Ghaith Alsayed
ដោយ៖ ហេង ឧត្តម (RFI ខេមរភាសា)
សហភាពអឺរ៉ុបរៀបចំសន្និសីទអន្តរជាតិប្រមូលជំនួយថវិកា ដើម្បីជ្រោមជ្រែងជួយកសាងប្រទេស ស៊ីរី ឡើងវិញ។ របបផ្តាច់ការស៊ីរី ដែលដឹកនាំដោយអតីតប្រធានាធិបតី បាស្ហា អាល់អាសាដ ទើបតែផ្តួលរំលំកាលពីដើមខែធ្នូ ២០២៤។ ក្រោយឆ្លងកាត់សង្គ្រាមរ៉ាំរ៉ៃ រយៈពេល១៥ឆ្នាំ ស៊ីរីអាចនឹងត្រូវការពេលច្រើនទសវត្សរ៍ទៀត ដើម្បីស្តារប្រទេសឡើងវិញ ឲ្យស្មើនឹងពេលមុនសង្គ្រាម។
នេះជាលើកទី៩ហើយដែលសហគមន៍អន្តរជាតិរៀបចំសន្និសីទអន្តរជាតិដើម្បីអំពាវនាវរកជំនួយថវិកាជួយកសាងស៊ីរី ក្រោយពីរបបស៊ីរីថ្មីឡើងកាន់អំណាចនៅថ្ងៃទី៨ ខែធ្នូ ឆ្នាំ២០២៤។ តែសន្និសីទរបស់ម្ចាស់ជំនួយសហភាពអឺរ៉ុបគ្រានេះ គឺជាលើកទី១ដែលមានអ្នកតំណាងជាន់ខ្ពស់ស៊ីរីមកចូលរួមដោយផ្ទាល់ ពោលគឺរដ្ឋមន្ត្រីក្រសួងការបរទេសស៊ីរី លោក Asaad al-Chaibani ដែលអញ្ជើញទៅទីក្រុងព្រុចសែល នៅថ្ងៃទី១៧ ខែមីនា។
ក្រៅពីជ្រោមជ្រែងស្វែងរកជំនួយ លោកស្រី កាយា កាឡាស ប្រមុខការទូតសហភាពអឺរ៉ុប ក៏ប្រកាសឲ្យសហគមន៍អន្តរជាតិដកទណ្ឌកម្មសេដ្ឋកិច្ចចេញពីស៊ីរី ដើម្បីឲ្យប្រជាពលរដ្ឋមានពន្លឺសង្ឃឹមជាថ្មី និងឲ្យប្រព័ន្ធសេវាកម្មធនាគារហិរញ្ញវត្ថុ អាចដំណើរការឡើងវិញជាប្រក្រតី។
កាលពីចុងខែកុម្ភៈ រដ្ឋសមាជិកសហភាពអឺរ៉ុបទាំង២៧ប្រទេស ធ្លាប់បានបង្ហាញការយល់ព្រមថានឹងដកទណ្ឌកម្មពីស៊ីរី ប្រសិនបើរដ្ឋអំណាចដឹកនាំស៊ីរីថ្មី អាចគ្រប់គ្រងសន្តិសុខជាតិ និង គ្មានអំពើហិង្សាកាប់សម្លាប់រវាងជាតិពន្ធុផ្សេងៗគ្នា កើតឡើងទៀតនោះទេ។
ក្នុងឱកាសនេះទៀត រដ្ឋាភិបាលបារាំង បានបញ្ជាក់ថានឹងមិនដាក់ទណ្ឌកម្មថ្មីអ្វីទៀតឡើយទៅលើស៊ីរី ល្គឹកណារបបដឹកនាំស៊ីរីថ្មី មិនបង្កអំពើហិង្សាបង្ហូរឈាម ហើយអាចបង្ក្រាបអំពើនិទ្ទណ្ឌភាព។ ស្រដៀងគ្នានេះដែរ រដ្ឋាភិបាលអាល្លឺម៉ង់បានប្រកាសផ្តល់ជំនួយ ៣០០ លានដុល្លារបន្ថែមទៅឲ្យស៊ីរី ដើម្បីចូលរួមចំណែកឲ្យប្រទេសនេះអាចងើបឈរ និងដើរចេញពីវិបត្តិសង្គ្រាមស៊ីវិលដ៏រ៉ាំរ៉ៃ ប្រមាណ ១៥ឆ្នាំ។
អង្គការសហប្រជាជាតិ ធ្លាប់បានព្យាករថា បើត្រឹមតែគិតពីសន្ទុះជំនួយអន្តរជាតិដ៏តិចតួចដូចសព្វថ្ងៃនេះ ស៊ីរីអាចនឹងត្រូវការពេលច្រើនទសវត្សរ៍ទៀត ពោលគឺប្រហែលជាកន្លះសតវត្សរ៍ឯណោះ ដើម្បីអាចកសាងនិងស្តារប្រទេសឡើងវិញ ឲ្យស្មើនឹងពេលមុនសង្គ្រាម កាលពីឆ្នាំ២០១១។
គួរជ្រាបថា នៅចុងឆ្នាំ២០២៤ សន្និសីទអន្តរជាតិបានប្រមូលកញ្ចប់លុយប្រមាណជា ៧,៥ ពាន់លានអឺរ៉ូសម្រាប់ជួយស៊ីរី។ ក៏ប៉ុន្តែ ការសម្រេចចិត្តព្យួរជំនួយមនុស្សអន្តរជាតិពីសំណាក់រដ្ឋាភិបាលអាមេរិករបស់លោក ដូណាល់ ត្រាំ នឹងជះឥទ្ធិពលជាខ្លាំងទៅដល់ការកសាងស៊ីរី។ ដ្បិតថា ក្នុងចំណោមម្ចាស់ជំនួយធំៗ គឺ សហរដ្ឋអាមេរិកជាអ្នកផ្តល់ជំនួយមនុស្សធម៌ច្រើនជាងគេ ទៅឲ្យស៊ីរី៕
© រក្សាសិទ្ធិដោយ thmeythmey.com
