សម្ដេច ប៊ុន រ៉ានី ប្រធាន​កាកបាទក្រហមកម្ពុជា បានជំរុញឱ្យសហព័ន្ធកីឡាប្រដាល់គុនខ្មែរ យក​ចិត្តទុកដាក់ ចំពោះការ​ពង្រឹងសមត្ថភាពអត្ដពលិកគុនខ្មែរ ឲ្យកាន់តែខ្លាំងជាងនេះ ដើម្បី​​អាចប្រជែងជាមួយអត្ដពលិកអន្ដរជាតិ ដែលមានកម្រិតខ្លាំងជាងកម្ពុជា។ នេះបើតាម លោក ខូវ ឆាយ ប្រធានសហព័ន្ធកីឡាប្រដាល់គុនខ្មែរ ​ប្រាប់សារព័ត៌មានឌីជីថលថ្មីៗ។

បើតាម លោក ខូវ ឆាយ ការ​ជំរុញរបស់សម្តេចប្រធានកាកបាទក្រហម ធ្វើឡើង​ក្នុងពេល ​សម្តេច ចូលរួមពិធីមង្គលការ​កូនរបស់អភិបាលរាជធានីភ្នំពេញ កាលពីថ្ងៃទី១៦ មីនា។

វីដេអូសំណេះសំណាលរបស់ សម្ដេច ប៊ុន រ៉ានី និង លោក ខូវ ឆាយ ត្រូវបានអ្នកប្រើប្រាស់​បណ្តាញសង្គម TikTok បង្ហោះ និងត្រូវបានចែករំលែកបន្តយ៉ាងច្រើនផងដែរ។

លោក ខូវ ឆាយ បញ្ជាក់ថាក្នុងជំនួបដ៏ខ្លីនោះ សម្តេច ប៊ុន រ៉ានី បានសួរនាំ អំពីកម្មវិធី​ប្រកួត​ប្រដាល់គុនខ្មែរ ហើយសម្តេច ក៏បានសួរនាំសុខទុក្ខ បឺត សង្ឃឹម ដែលបានសន្លប់​ក្នុង​ទឹក​ទី២ ក្នុងការប្រកួតជាមួយកីឡាកររុស្ស៊ី Aslanbek Zikreev កាលពីថ្ងៃទី១៥ មីនាផងដែរ។

សម្ដេច ប៊ុន រ៉ានី មានប្រសាសន៍ក្នុងវីដេអូនោះយ៉ាងច្បាស់ពីឈ្មោះកីឡា បឺត សង្ឃឹម និង​ព្រឹត្តិការណ៍។ នេះបានបង្ហាញថា សម្ដេច ក៏ជាអ្នកគាំទ្រ និងតាមដាន​កីឡាប្រដាល់គុន​ខ្មែរ​មួយរូបផងដែរ។

លោក ខូវ ឆាយ បានបញ្ជាក់ប្រាប់សារព័ត៌មានថ្មីៗតាមទូរស័ព្ទដូច្នេះ៖ «សម្ដេច សួរសុខទុក្ខ និង​ព្រួយបារម្ភពីកីឡាករ។ លោក ក៏បានជំរុញឲ្យ យើងប្រឹងប្រែងអភិវឌ្ឍ​បន្ថែមទៀត ដើម្បី​ឲ្យកីឡាករ-កីឡាការិនីយើង អាចមានសមត្ថភាពប្រកួតប្រជែងជាមួយ កីឡាករបរទេស ដែល​មានកម្រិតខ្ពស់ៗ មកពីក្រៅប្រទេស ក៏ដូចជាពេលយើង ចេញទៅប្រកួត​នៅឆាក​អន្ដរជាតិ យើងអាចយកជ័យជម្នះ ​គូប្រកួតខ្លាំងៗ បាននាថ្ងៃអនាគត។»។

សម្ដេច តែងទស្សនាការប្រកួតប្រដាល់គុនខ្មែរ នៅពេលទំនេរពីកិច្ចការ ប៉ុន្ដែនៅ​ពេល​រវល់​ពីការងារ សម្ដេច ក៏តាមដានលទ្ធផល ផងដែរ។ ជាពិសេស នៅពេលដែលមានភាព​មិន​ប្រ​ក្រ​តី ក៏ដូចជាមានចំណុចខ្វះខាត ក្នុងការប្រកួតណាមួយ សម្ដេច តែងទំនាក់ទំនង​ផ្ដល់​អនុ​សាសន៍ ដើម្បីដោះស្រាយបញ្ហាមានប្រសិទ្ធភាព។ នេះបើតាមការបញ្ជាក់ពីប្រធាន​សហ​ព័ន្ធ​​រូបនេះ ដោយលោកបានបន្តថា ​ថាការយកចិត្តទុកដាក់ពីថ្នាក់ដឹកនាំ​ គឺជាការផ្ដល់​កម្លាំង​​ចិត្ត​ដល់​អត្ដពលិក​ជាតិ ប្រឹង​ប្រែង​ហ្វឹកហាត់ ក៏ដូចជាសហព័ន្ធ ប្រឹងប្រឹងអភិវឌ្ឍសមត្ថភាព​ឲ្យកាន់តែខ្លាំងឡើងៗ៕