ប្រធានាធិបតីអាម៉េរិក លោក ដូណាល់ ត្រាំ នៅថ្ងៃទី២០ ខែមីនា បានចុះហត្ថលេខាលើបញ្ជាប្រតិបត្តិមួយ ដោយបញ្ជាឱ្យមន្រ្តីរបស់ខ្លួនចាប់ផ្តើមនីតិវិធីលុបចោលក្រសួងអប់រំ ដ្បិតចាយលុយរាប់ពាន់លានដុល្លារក្នុងមួយឆ្នាំៗ។ យ៉ាងណាមិញ ការលុបក្រសួងអប់រំ មិនមែនជារឿងងាយស្រួលឡើយ ដ្បិតត្រូវឆ្លងកាត់ព្រឹទ្ធសភា។

ដូចការសន្យានៅក្នុងយុទ្ធនាការឃោសនាបោះឆ្នោត លោក ដូណាល់ ត្រាំ ប្រធានាធិបតីអាម៉េរិក បានចុះហត្ថលេខាលើបញ្ជាប្រតិបត្តិមួយនៅថ្ងៃទី២០ ខែមីនា ដើម្បីចាប់ផ្តើមនីតិវិធីលុបចោលក្រសួងអប់រំ។ បើតាមលោក ត្រាំ ស្ថាប័នអប់រំ គួរតែស្ថិតក្រោមការគ្រប់គ្រងរបស់រដ្ឋ និងក្រុមប្រឹក្សានៅថ្នាក់តំបន់។ 

«យើងនឹងលុបចោលក្រសួងអប់រំ ហើយមនុស្សគ្រប់គ្នាគិតថា វាជារឿងត្រឹមត្រវ»។ លោក ត្រាំ បានបញ្ជាក់បែបនេះ នៅសេតវិមាន ដោយបន្តថា ក្រសួងអប់រំអាម៉េរិក ធ្វើមិនបានល្អឡើយ បើធៀបនឹងប្រព័ន្ធអប់រំពិភពលោក ស្របពេលអាម៉េរិក បានចំណាយកញ្ចប់លុយរាប់ពាន់លានដុល្លារ។​ 

ក្រសួងអប់រំអាម៉េរិក នៅក្នុងឆ្នាំ២០២៤​ មានកញ្ចប់ថវិកាចំនួន ២៦៨ពាន់លានដុល្លារ ពោលគឺស្មើនឹង៤ភាគរយនៃកញ្ចប់ថវិកាសហព័ន្ធ។ 

មុនពេលលោក ត្រាំ ចុះហត្ថលេខាលើបញ្ជាប្រតិបត្តិ ក្រសួងអប់រំអាម៉េរិក នៅថ្ងៃទី១១ ខែមីនា បានប្រកាសកាត់បន្ថយមន្រ្តីច្រើនជាង ១៣០០នាក់។ ទន្ទឹមនេះ មន្រ្តីលើសពី ៦០០នាក់ផ្សេងទៀត បានលាឈប់ដោយស្ម័គ្រចិត្ត ឬចូលនិវត្តន៍មុនពេលកំណត់។ ក្រសួងអប់រំអាម៉េរិក មានបុគ្គលិកប្រមាណ ៤១០០នាក់។ 

យ៉ាងណាមិញ ការបញ្ជារបស់លោក ត្រាំ មិនមែនជារឿងងាយស្រួលឡើយ ព្រោះអាចប្រឈមនឹងតុលាការ ហើយសភាថែមទៀត។ លោក Mitch McConnell​ សមាជិកព្រឹទ្ធសភាចេញពីបក្សសាធារណរដ្ឋ បានអះអាងថា បញ្ជាប្រតិបត្តិរបស់លោក ត្រាំ អាចនឹងត្រូវតុលាការជំទាស់ បើមិនដូចនោះទេ ក៏មិនអាចឆ្លងកាត់សភាបានដែរ ព្រោះបក្សសាធារណរដ្ឋមានសំឡេងមិនគ្រប់គ្រាន់។ 

ការរំលាយក្រសួងអប់រំ ត្រូវការសំឡេងគាំទ្ររហូតដល់ ៦០អាសនៈនៅក្នុងព្រឹទ្ធសភា។ ក្នុងពេលបច្ចុប្បន្ន សមាជិកបក្សសាធារណរដ្ឋនៅក្នុងព្រឹទ្ធសភាមានចំនួន ៥៣អាសនៈ, បក្សប្រជាធិបតេយ្យមានចំនួន ៤៥អាសនៈ និងបេក្ខជនឯករាជ្យមានចំនួន ២អាសនៈ។ បើទោះសមាជិកបក្សសាធារណរដ្ឋទាំងអស់ បោះឆ្នោតគាំទ្រ ក៏មិនគ្រប់គ្រាន់ដែរ លុះត្រាតែបក្សប្រជាធិបតេយ្យមួយចំនួន បោះឆ្នោតគាំទ្រ។ 

ក្នុងពិធីចុះហត្ថលេខានៅសេតវិមាន លោក ត្រាំ ទំនងទទួលស្គាល់ពីនីតិវិធីដ៏លំបាកមួយនេះ ហើយលោកពិតជាត្រូវការការគាំទ្រពីសមាជិកព្រឹទ្ធសភាចេញពីបក្សប្រជាធិបតេយ្យ។ 

បើសិនបើក្រសួងអប់រំអាចរំលាយមែន កម្មវិធីផ្តល់ជំនួយខ្លះទៅនិស្សិត និងគ្រួសារសិស្សក្រីក្រ នឹងមិនត្រូវលុបចោលឡើយ។ តាមមន្រ្តីសេតវិមានប្រាប់សារព័ត៌មាន CBS News នៅថ្ងៃទី១៩ ខែមីនា កម្មវិធីដែលមិនរងផលប៉ះពាល់មាន កម្មវិធីកម្ចីសិស្ស, កម្មវិធី Pell grants និងកម្មវិធី Title I។ 

សូមបញ្ជាក់ថា ក្រសួងអប់រំអាម៉េរិក ត្រូវទទួលបន្ទុកការលើការពិនិត្យសាលាសាធារណៈចំនួន ១០ម៉ឺនកន្លែង និងសាលាឯកជន៣៤០០០។ លើសពីនេះ ក្រសួងអប់រំ ក៏ជាស្ថាប័នក្នុងការត្រួតពិនិត្យលើកម្ចីរបស់សិស្សចំនួន ១,៦ទ្រីលានដុល្លារផងដែរ ដែលត្រូវបានខ្ចីដោយសិស្សអាម៉េរិកជាច្រើនលាននាក់៕