ដោយ៖ម៉ម ពិសី (RFI ខេមរភាសា)

កងទ័ពអ៊ុយក្រែន​បានឲ្យដឹងថា នៅព្រឹកថ្ងៃព្រហស្បតិ៍ទី​២០មីនា គេបានបញ្ជូនដ្រូនទៅវាយ​ប្រហារ នៅឯមូលដ្ឋានទ័ពអាកាស Engels របស់រុស្ស៊ី​។ មិនទាន់មានការបញ្ជាក់ណាមួយ ពីអាជ្ញាធររុស្ស៊ីទេ ស្តីពីទំហំនៃការខូចខាតទេ តែបើផ្អែកតាមវីដេអូដែលគេថតបាន គេឃើញកម្លាំងផ្ទុះ​បាន​បង្កជាអគ្គីភ័យឆេះ​​​យ៉ាងសន្ធោសន្ធៅ។ អ៊ុយក្រែនអះអាងថា គឺមូលដ្ឋាននេះហើយ ដែលរុស្ស៊ីបញ្ជាយន្តហោះចម្បាំង​ធំ​ មកទម្លាក់គ្រាប់​សម្លាប់អាយុជីវិតប្រជាជនអ៊ុយក្រែន​។

មូលដ្ឋានទ័ពអាកាស Engels របស់រុស្ស៊ី ដែលស្ថិតនៅចម្ងាយ​ប្រមាណ​៧០០គីឡូម៉ែត្រ ពីសមរភូមិអ៊ុយក្រែន បានរងនូវការវាយប្រហារដោយ​យានដ្រូនរបស់អ៊ុយក្រែន នៅព្រឹកថ្ងៃព្រហស្បតិ៍​ទី​២០មីនា។ វីដេអូ ដែលទីភ្នាក់ងារព័ត៌មាន Reuters បានផ្ទៀងផ្ទាត់ បាន​បង្ហាញឲ្យឃើញ​កម្លាំងផ្ទុះដ៏ខ្លាំងក្លា​ បង្កការ​ខូចខាត​​ផ្ទះសម្បែងប្រជាជន​ស្ថិតនៅ​ក្បែរមូលដ្ឋាន​នេះ។ វីដេអូមួយទៀត បង្ហាញ​ឲ្យឃើញភ្លើងឆេះសន្ធោសន្ធៅខ្ពស់ឡើងទៅលើ។ ក្រសួងការពារជាតិអ៊ុយក្រែន បាន​ដឹងថា កម្លាំងខ្លួន​បានបើកការវាយ​ប្រហារ​ទៅលើប្រលានយន្តហោះយោធា ហើយ​បាន​បំផ្ទុះទីតាំងស្តុកគ្រាប់នៃមូលដ្ឋាននេះថែមទៀត។

គួរបញ្ជាក់ថា នៅព្រឹកថ្ងៃព្រហស្បតិ៍​ ក្រសួងការពារជាតិរុស្ស៊ីបាន​ប្រកាសដំណឹងថា ប្រព័ន្ធការពារផ្លូវអាកាសរុស្ស៊ីបាន​កម្ទេច​ដ្រូនអ៊ុយក្រែន ចំនួន​​១៣២គ្រឿង ដែលហោះចូលប៉ុនប៉ងវាយប្រហារក្នុងទឹក​ដី​រុស្ស៊ី។ ដោយឡែកអាជ្ញាធរតំបន់ Saratov របស់រុស្ស៊ី បានឲ្យដឹងថា ពិតជាមានការវាយប្រហារដោយ​យានដ្រូន ទៅលើទីក្រុង Engels និងបានបង្កឲ្យ​មានអគ្គីភ័យឆាបឆេះ នៅ​ប្រលានយន្តហោះ ហើយ​តម្រូវ​ឲ្យ​អាជ្ញាធរជម្លៀសប្រជាជនចេញពី​តំបន់ជុំវិញនេះ​។ មនុស្សយ៉ាងហោង​១០នាក់បានរងរបួស និង​បញ្ជូន​ទៅកាន់មន្ទីរពេទ្យ។ នេះបើផ្អែកតាម​របស់បណ្តាញទូរទស្សន៍​រុស្ស៊ី​។ដោយឡែក ទីភ្នាក់ងារព័ត៌មានReuters នៅមិនទាន់អាចបញ្ជាក់បានទេ អំពីទំហំខូចខាតជាក់ស្តែង​ នៅក្នុងមូលដ្ឋានទ័ពអាកាស Engels ដោយសារតែអាជ្ញាធររុស្ស៊ី មិនផ្តល់ព័ត៌មានអ្វីទាំងអស។

សូមរំលឹកថា មូលដ្ឋានទ័ពអាកាស Engels ស្ថិតនៅមាត់ទន្លេវុលហ្កា ត្រូវបានសាងសង់ឡើង តាំងតែពីសម័យ​សហភាពសូវៀត។ មូលដ្ឋាននេះ គឺជាទីតាំងទុកយន្តហោះចម្បាំងយុទ្ធសាស្ត្រ Tupolev Tu-160 របស់រុស្ស៊ី ដែលអាចមានសមត្ថភាព​​ផ្ទុក​គ្រាប់​បែក​នុយក្លេអ៊ែរ។ អ៊ុយក្រែន​អះអាងថា គឺចេញ​មូលដ្ឋាន​អាកាសនេះហើយ ដែលរុស្ស៊ីបញ្ជាយន្តហោះទៅទម្លាក់គ្រាប់​បែក​ សម្លាប់ប្រជាជនអ៊ុយក្រែន​។

គួរកត់សំគាល់ថា បន្ទាប់ពីលោកពូទីន​យល់ព្រមជាមួយលោក​ដូណាល់ ត្រាំ ថាសុខចិត្ត​ផ្អាកការវាយប្រហារទៅលើ​ហេដ្ឋារចនាសម្ព័ន្ធ​ថាមពលអ៊ុយក្រែន តែកងទ័ពរុស្ស៊ីនៅតែបន្តវាយប្រហារជាទូទៅ នៅក្នុងទឹកដីអ៊ុយក្រែនដដែល​។ ជាក់ស្តែង​កាលពីយប់ថ្ងៃពុធឈានចូលថ្ងៃព្រហស្បតិ៍ អ៊ុយក្រែនអះអាងថា រុស្ស៊ីបានបញ្ជាដ្រូន​ចំនួន​១៧១គ្រឿង មកវាយ​ប្រហារអ៊ុយក្រែន។

នៅថ្ងៃព្រសហ្បតិ៍ លោក​ហ្សេឡេនស្គី បានចូលរួម​ថ្លែងសារតាមវីដេអូ ពី​ទីក្រុង​អូស្លូប្រទេសន័រវែស នៅក្នុង​ជំនួបកំពូល​​ប្រទេសសមាជិកអឺរ៉ុបទាំង​២៧​។ នៅក្នុងសារនោះ លោកប្រធានាធិបតី​អ៊ុយក្រែន បាន​លើកឡើងថា អឺរ៉ុបត្រូវតែមានការប្រុងប្រយ័ត្ន​ខ្ពស់បំផុត មិនត្រូវចាញ់ល្បិចស្នៀតរបស់ពូទីនជាដាច់ខាត។ ប្រឈមនឹងការទាមទារ​​​របស់​លោកពូទីន ថា​ឲ្យ​ប្រទេសលោក​ខាងលិចត្រូវ​ឈប់ផ្តល់​អាវុធឲ្យអ៊ុយក្រែននោះ​ លោកហ្សេឡេនស្គីបានអំពាវនាវទៅកាន់ប្រទេសអឺរ៉ុបថា ត្រូវតែបន្តដាក់ទណ្ឌកម្មសេដ្ឋកិច្ច​លើរុស្ស៊ី រហូត​ទាល់ចោរឈ្លានពានរុស្ស៊ី ដកទ័ពចេញឲ្យអស់ពី​ទឹកដីអ៊ុយក្រែន​​៕