ដោយ៖ម៉ម ពិសី (RFI ខេមរភាសា)

ត្រូវបិទទ្វារនៅថ្ងៃសុក្រទី​២១មីនា ដោយសារតែដាច់ចរន្តអគ្គិសនី​។ បញ្ហានេះ គឺបង្កឡើងដោយសារស្ថានីយអគ្គិសនី​មួយ ​​ត្រូវអគ្គីភ័យ ឆាបឆេះកាលពីវេលាយប់។ ការបិទជាបណ្តោះអាសន្ននូវអាកាសយានដ្ឋាន​ដ៏ធំនេះ បានបង្កការកកស្ទះ ដល់ចរាចរណ៍​យន្តហោះសឹងតែទូទាំងពិភពលោក ព្រោះក្នុងមួយថ្ងៃៗ មានការចុះចតនិងហោះឡើង ចំនួនដល់ទៅ​១៣០០ឯណោះ នៅអាកាសយានដ្ឋាននេះ​។

អាជ្ញាធរប្រតិបត្តិករនៃ​អាកាសយានដ្ឋាន Heathrow ទីក្រុងឡុងដ៍ បានជូនដំណឹងនៅព្រឹក​ថ្ងៃសុក្រទី​២១មីនា ថាប្រលាន​យន្តហោះ​បានជួប​នូវបញ្ហា​ដាច់ចរន្តអគ្គិសនី​ធ្ងន់ធ្ងរបំផុត។ ដូច្នេះដើម្បី​ធានាការពារសន្តិសុខ និងសុវត្ថិភាពអ្នកដំណើរទាំងអស់​ អាកាសយានដ្ឋាន Heathrow នឹងត្រូវបិទទ្វារ​លែងដំណើរការទាំងស្រុង រហូតដល់ម៉ោង១២យប់ ថ្ងៃទី​២១មីនា។ អាជ្ញាធរប្រតិបត្តិករ បានបញ្ជាក់ផងដែរ ថាការបិទអាកាសយានដ្ឋាននេះ នឹងប្រាកដជាបង្ក​បញ្ហាកកស្ទះខ្លាំង ទៅដល់ចរាចរណ៍​ហោះហើរ នៅថ្ងៃបន្តបន្ទាប់ទៀត។

សូមបញ្ជាក់ថា ផ្អែកតាមអាជ្ញាធរអង់គ្លេស គឺការដាច់ចរន្តអគ្គិសនី បានកើតឡើងដោយសារតែស្ថានីយចរន្តអគ្គិសនី​មួយ​ស្ថិតនៅតំបន់ Hayes ខាងលិចទីក្រុងឡុងដ៍​ ត្រូវអគ្គីភ័យឆាបឆេះ​កាលពីវេលាយប់ថ្ងៃព្រហស្បតិ៍ឈានចូលថ្ងៃសុក្រ​។ ស្ថានីយនេះគឺជាអ្នកផ្គត់ផ្គង់​ចរន្តអគ្គិសនីមកឲ្យអាកាសយានដ្ឋាន Heathrow និង​តំបន់ជុំវិញ។ យ៉ាងណាមិញ ក្រុមហ៊ុនអគ្គិសនីអង់គ្លេសបាន​ឲ្យដឹងថាបញ្ហានេះ បានធ្វើ​ឲ្យ​ផ្ទះប្រជាជនចំនួន​១៦០០០គ្រួសារ ត្រូវដាច់ចរន្តអគ្គិសនី​។ ក្រុមពន្លត់អគ្គីភ័យ​ប្រមាណ​៧០នាក់ បានខំប្រឹងពន្លត់​ភ្លើង​ និង​បានជម្លៀសមនុស្ស​​ជាង​១៥០នាក់ ចេញពីតំបន់​កើតហេតុ។

គិតត្រឹមពេលនេះ សមត្ថកិច្ចនៅពុំទាន់ដឹង​ថាអគ្គិភ័យនេះ​បានកើតឡើងដោយសារមូលហេតុអ្វីទេ។ នៅក្នុងបទសម្ភាសន៍ក្នុងទូរទស្សន៍ Sky News លោករដ្ឋមន្ត្រីក្រសួងថាមពលអង់គ្លេស Ed Miliband បាន​លើកឡើងថា ករណីអគ្គីភ័យ​នៅស្ថានីយអគ្គិសនីនេះ គឺជាបញ្ហា​អាសន្ន​មហន្តរាយធំណាស់ ព្រោះម៉ាស៊ីន​ផលិត​ចរន្តអគ្គិសនី​បំរុងក្នុងករណីម៉ាស៊ីនធំលែងដំណើរការ ក៏បាន​ខូចខាតធ្ងន់ធ្ងរដែរ​។ លោកអះអាងថា អាជ្ញាធរមានសមត្ថកិច្ចកំពុងតែ​ដោះស្រាយ​បញ្ហា តភ្ជាប់ចរន្តឡើងវិញ និង​រៀនសូត្រពីមេរៀននេះ ដើម្បី​រៀបចំ​បណ្តាញហេដ្ឋារចនាសម្ព័ន្ធ​អគ្គិសនី​ឲ្យ​កាន់តែល្អប្រសើរ។

សូមបញ្ជាក់ថា អាកាសយានដ្ឋានអន្តរជាតិ Heathrow ទីក្រុងឡុងដ៍ គឺជាអាកាសយានដ្ឋានធំជាងគេបង្អស់ទូទាំងអឺរ៉ុប ហើយធំជាងគេក្នុងចំណោម​៥ ទូទាំងពិភពលោក។ អាកាសយានដ្ឋាននេះ តភ្ជាប់ជើងហោះហើរទៅកាន់ប្រទេសចំនួន​៨០ ដែលសរុបមាន​ប្រមាណ​២០០​គោលដៅ។ ក្នុងមួយថ្ងៃៗ មានការចុះចតនិងហោះឡើង ដល់ទៅ​១៣០០លើក និង​មាន​អ្នកដំណើរ២៣ម៉ឺននាក់ជាមធ្យម​ក្នុងមួយថ្ងៃ។ យោងតាម​អាជ្ញាធរប្រតិបត្តិករប្រលាន នៅថ្ងៃសុក្រទី​២១មីនានេះ ប្រលាន​យន្តហោះអន្តរជាតិនេះ គ្រោងទទួលអ្នកដំណើរដល់ទៅ​​២៩ម៉ឺននាក់។

ការបិទអាកាសយានដ្ឋាន Heathrow ពេញមួយថ្ងៃ បានបង្កជាចលាចល កកស្ទះយ៉ាងខ្លាំង ដល់​ចរាចរណ៍​អាកាសចរណ៍ស៊ីវីលទូទាំងពិភពលោក​ និងអាចជះឥទ្ធិពល​អាក្រក់​ច្រើនថ្ងៃបន្តបន្ទាប់ទៀត។ ជើងហោះហើរខ្លះ មកពីអាស៊ី និងអូស្ត្រាលីជាដើម ត្រូវពន្យាពេល​ដល់ទៅ​ជាង​២០ម៉ោង​។ នៅព្រឹកថ្ងៃសុក្រនេះ អាកាសយានដ្ឋានមួយចំនួននៅអឺរ៉ុប ដូចជានៅប៉ារីស អាំស្ទែរដាំ និង​ហ្វ្រង់ហ្វ័រជាដើម បានអះអាងថា គេបាន​អនុញ្ញាតទទួលការចុះចតរបស់យន្តហោះ ជំនួស​ឲ្យ​ប្រលាន​នៅទីក្រុងឡុងដ៍​។ តែបញ្ហានេះ នឹងបន្ថែម​ការលំបាកមួយកម្រិតទៀត ដល់អ្នកដំណើរ​​ ទាក់ទិន​នឹង​ការ​ស្វែងរកជើងហោះហើរបន្ត ដើម្បីអាចធ្វើដំណើរទៅដល់គោលដៅចុងក្រោយ។​ តាមការរំពឹងទុក ការកកស្ទះនេះនឹងធ្វើ​ឲ្យ​ក្រុមហ៊ុនអាកាសចរណ៍ ត្រូវខាតប្រាក់​ច្រើន​​រយលានដុល្លារ ដោយ​សារតែត្រូវហោះត្រលប់ក្រោយ បង្វែរទិសដៅចុះចត និងត្រូវសងសំណងជំងឺចិត្តជូន​អតិថិជន​៕