.png)
.jpg)
.jpg)
Ronaldo សារភាពថាព័រទុយហ្កាល់ធ្លាក់ក្នុងស្ថានភាពតានតឹង មុនជំនួបជើងទី២ ទល់ដាណឺម៉ាក
- ថ្ងៃអាទិត្យ ទី២៣ ខែមីនា ឆ្នាំ២០២៥ ម៉ោង ១១:៣៩ នាទី ព្រឹក
កំពូលកីឡាករ Cristiano Ronaldo ចេញមុខទទួលស្គាល់សម្ពាធធ្លាក់លើក្រុមជម្រើសជាតិព័រទុយហ្កាល់ បន្ទាប់ពីការប្រកួតជើងទីមួយចាញ់ក្រុមដាណឺម៉ាក លទ្ធផល ១-០ ខណៈប្រធានក្រុមវ័យ ៤០ឆ្នាំ សម្លឹងវាយបកយកលទ្ធផលឈ្នះត្រឡប់មកវិញ នៅការប្រកួតជំនួបជើងទី២ វគ្គ ៨ក្រុមចុងក្រោយ UEFA Nations League។
កីឡាករខ្សែប្រយុទ្ធក្រុម Al Nassr បានរិះគន់ខ្លួនឯង និងក្រុមកីឡាករព័រទុយហ្កាល់ បន្ទាប់ ពីក្រុមរងបរាជ័យនៅការប្រកួតជើងទី១ ស្ថិតក្នុងទីក្រុង Copenhagen ក្រោមថ្វីជើងម្ចាស់ ផ្ទះដាណឺម៉ាក កាលពីសប្តាហ៍មុន។ កាលនោះ Rasmus Hojlund ជាកីឡាករស៊ុតបាល់ បញ្ចូលទី ដើម្បីផ្តួលព័រទុយហ្កាល់។
ការប្រកួតជើងទី២ នៅក្នុងទឹកដីព័រទុយហ្កាល់ កីឡាករវ័យ ៤០ឆ្នាំ បានបង្ហាញទំនុកចិត្ត និងភាពជឿជាក់ថាក្រុមនឹងអាចរកបានជ័យជម្នះត្រឡប់មកវិញ ហើយឈ្នះកៅអីឡើង ទៅវគ្គពាក់កណ្តាលផ្តាច់ព្រ័ត្រ។
Ronaldo បាននិយាយក្នុងសន្និសីទកាសែតដូច្នេះថា៖«បរិយាកាសគឺកំពុងតែតានតឹង ខ្ញុំ មិនលាក់វានោះឡើយ យើងកំពុងតែស្ថិតក្នុងស្ថានភាពលំបាក ព្រោះយើងត្រូវការឈ្នះ ចាំបាច់ ប៉ុន្តែរឿងនោះគឺភាពស្រស់ស្អាតនៃរឿងបាល់ទាត់។ នៅថ្ងៃស្អែក ខ្ញុំនឹងសុំឱ្យ អ្នក គាំទ្រឈរនៅជាមួយយើង ឱ្យពួកគេផ្តល់កម្លាំងដល់យើង ព្រោះយើងនឹងបញ្ចេញ ពី សមត្ថភាពយើងឱ្យបានល្អបំផុត។[…]»។
បរាជ័យកាលពីជើងទីមួយ Ronaldo ក៏បានបដិសេធចំពោះមុខអ្នកកាសែត ពេលត្រូវបាន ចោទសួរអំពីការខ្វះការតាំងចិត្តក្នុងក្រុម និងការខ្វះខាតអាកប្បកិរិយាល្អ ស្និទ្ធ ស្នាលក្នុង ក្រុមនោះឡើយ ខណៈអះអាងថា មានទំនុកចិត្តខ្ពស់លើក្រុមថា មានសាមគ្គីភាពខ្លាំង។
ក្រៅពីការប្រកួតរបស់ក្រុមជម្រើសជាតិព័រទុយហ្កាល់ ទល់នឹងដាណឺម៉ាក នៅវេលាម៉ោង ២:៤៥យប់ (ម៉ោងនៅកម្ពុជា) ស្របពេលការប្រកួតវគ្គ ៨ក្រុមចុងក្រោយ ចំនួន ៣គូ ទៀត រួមមាន បារាំង តទល់ក្រូអាស៊ី, អាល្លឺម៉ង់ តទល់អ៊ីតាលី និងអេស្ប៉ាញ តទល់ហូឡង់៕
© រក្សាសិទ្ធិដោយ thmeythmey.com
Tag:
