.png)
.jpg)
.jpg)
ឥណ្ឌូណេស៊ី ជឿជាក់យកបាន៣ពិន្ទុពីបារ៉ែន ដើម្បីរក្សាក្តីសង្ឃឹមទៅ World Cup 2026
- ថ្ងៃអង្គារ ទី២៥ ខែមីនា ឆ្នាំ២០២៥ ម៉ោង ៥:២៩ នាទី ល្ងាច
ក្រុមកីឡាបាល់ទាត់ជម្រើសជាតិឥណ្ឌូណេស៊ី ត្រៀមទទួលក្រុមបារ៉ែន ក្នុងការប្រកួតទី៨ ពូល C ក្នុងជុំទី៣ នៃការប្រកួតជម្រុះតំបន់អាស៊ី FIFA World Cup 2026។ ក្រុមលោក Patrick Kluivert នៅតែមានកម្លាំងចិត្តខ្ពស់ក្នុងការដណ្តើមយក៣ពិន្ទុ បើទោះរងបរាជ័យធ្ងន់ធ្ងរក្រោមថ្វីជើងអូស្ត្រាលីហើយក៏ដោយ។
មុនបន្តជួបបារ៉ែននៅកីឡដ្ឋាន Gelora Bung Karno នៅទីក្រុងហ្សាការតា ថ្ងៃទី២៥ ខែមីនា វេលាម៉ោង ៧ និង ៤៥នាទី [ម៉ោងនៅកម្ពុជា] ឥណ្ឌូណេស៊ី បានចាញ់អូស្ត្រាលីដល់ទៅ ៥-១ ដែលជាបរាជ័យលើសលុបបំផុតក្នុងចំណោមការប្រកួត៧លើកក្នុងពូលរបស់ពួកគេ ក្រោមការដឹកនាំដំបូងរបស់លោក Kluivert។
យ៉ាងណាក៏ដោយ ដោយសារការប្រកួតនៅចំពោះមុខអ្នកគាំទ្រក្នុងផ្ទះរបស់ខ្លួន សមាជិកកីឡាកររបស់ឥណ្ឌូណេស៊ី ជាពិសេសប្រធានក្រុម Jay Idzes បានបង្ហាញភាពជឿជាក់ក្នុងការដណ្តើមយក៣ពិន្ទុពីបារ៉ែន ដើម្បីរក្សាក្តីសង្ឃឹមទៅការប្រកួតបាល់ទាត់ពិភពលោកឆ្នាំ ២០២៦ ដែលរៀបចំនៅអាម៉េរិក កាណាដា និងម៉ិកស៊ិក។ កាលពីជើងទី១ បារ៉ែន និងឥណ្ឌូណេស៊ី ស្មើគ្នា ២-២។
ជំនួបនេះ ក៏ជាការតេស្តសមត្ថភាពដឹកនាំរបស់គ្រូបង្វឹកសញ្ជាតិហូឡង់លោក លោក Kluivert បន្ទាប់ពីជំនួបដំបូងបរាជ័យធ្ងន់ធ្ងរ។
ឥណ្ឌូណេស៊ី ស្ថិតនៅចំណាត់ថ្នាក់ទី៤ក្នុងពូល C ដោយរកបាន៦ពិន្ទុ ស្មើបារ៉ែន នៅលេខ៥ និងចិន បាតតារាង។ អូស្ត្រាលី នៅលេខ២ មាន១០ពិន្ទុ និងអារ៉ាប៊ីសាអូឌីតមាន៩ពិន្ទុ ឈរលេខ៣។
សម្រាប់ជំនួបសន្សំពិន្ទុលើកទី៨ ក្នុងពូល C នេះ អូស្ត្រាលី ត្រូវបន្តជួបចិន ស្របពេល អារ៉ាប៊ីសាអូឌីត តទល់ជប៉ុន ដែលបានកៅអីស្វ័យប្រវត្តិទៅ World Cup 2026។ ក្រុមដែលបញ្ចប់ចំណាត់ថ្នាក់លេខ១ និងលេខ២ បានកៅអីស្វ័យប្រវត្តិ ខណៈលេខ៣ និងលេខ៤ បានកៅអីវគ្គជម្រុះជុំទី៤ និងលេខ៥ និងបាតតារាង ហាលអាវ។ ក្រុមទាំង៦ មានការប្រកួត ១០លើករៀងខ្លួន៕
© រក្សាសិទ្ធិដោយ thmeythmey.com
Tag:
