ភ្នំពេញ៖ ការ​ប្រឡង​ប្រជែង​ជ្រើសរើស​មន្ត្រីកសិកម្មឃុំ, មន្ត្រីសុខាភិបាល, មន្ត្រីក្របខណ្ឌ ក្រសួងការបរទេស និងសហប្រតិបត្តិការអន្តរជាតិ និងអគ្គលេខាធិការដ្ឋានក្រុមប្រឹក្សាអ្នកច្បាប់ នៃទីស្តីការគណៈរដ្ឋមន្រ្តី នឹង​រៀបចំ​នៅឆ្នាំ​២០២៥នេះ។ នេះបើតាម​ក្រសួង​មុខងារសាធារណៈ។​

នៅ​ថ្ងៃទី២៥ ខែមីនា លោក​ យក់ ប៊ុនណា រដ្ឋលេខាធិការ​ប្រចាំការ​ក្រសួងមុខងារសាធារណៈ បានដឹកនាំកិច្ចប្រជុំជាមួយក្រសួងស្ថាប័នពាក់ព័ន្ធ ដើម្បីពិភាក្សាស្តីពីការរៀបចំដំណើរការប្រឡងប្រជែងជ្រើសរើសមន្រ្តីរាជការ និងមន្រ្តីផ្អែកលើកិច្ចព្រមព្រៀងការងារ ឱ្យចូលបម្រើការងារតាមក្រសួង ស្ថាប័នចំនួន៤ សម្រាប់ក្របខណ្ឌឆ្នាំ២០២៥។ 

បើតាម​ក្រសួង​មុខងារសាធារណៈ ការជ្រើសរើសមន្ត្រីនៃក្រសួង ស្ថាប័នទាំង៤ ដែលនឹងរៀបចំការប្រឡងប្រជែងជ្រើសរើសមន្រ្តី រួមមាន មន្ត្រីកសិកម្មឃុំ ក្របខណ្ឌក្រសួងកសិកម្ម រុក្ខាប្រមាញ់ និងនេសាទ, មន្ត្រីសុខាភិបាល នៃក្រសួងសុខាភិបាល ផ្អែកលើកិច្ចព្រមព្រៀងការងារ, មន្ត្រីក្របខណ្ឌ ក្រសួងការបរទេស និងសហប្រតិបត្តិការអន្តរជាតិ និងអគ្គលេខាធិការដ្ឋានក្រុមប្រឹក្សាអ្នកច្បាប់ នៃទីស្តីការគណៈរដ្ឋមន្រ្តី។

តាមរយៈ​កិច្ច​ប្រជុំខាងលើ អង្គប្រជុំបានធ្វើបទបង្ហាញ និងពិភាក្សាចូលរួមមតិយោបល់លើការរៀបចំដំណើរការប្រឡងប្រជែងជ្រើសរើស គិតចាប់ពីការរៀបចំផ្សព្វផ្សាយសេចក្តីជូនដំណឹង ការទទួលការដាក់ពាក្យចូលរួមប្រឡងប្រជែង ដំណើរការប្រឡងប្រជែងនិងកំណែវិញ្ញាសា រហូតដល់ការប្រកាសលទ្ធផលនិងបែងចែកទៅតាមអង្គភាពគោលដៅ ឱ្យស្របតាមគោលការណ៍ «រើសឱ្យចំ បំពេញឱ្យត្រូវ រក្សាឱ្យនៅ»។ 

លើសពីនេះ ការ​ប្រឡងនេះ នឹង​អនុវត្ត​តាមគោលការណ៍​ «គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព»។ សូម​បញ្ជាក់ថា ត្រឹមរយៈពេល១៥ខែ ក្រសួង​មុខងារសាធារណៈ បាន​រៀបចំ​ការ​ប្រឡង​ប្រជែងជ្រើសរើស​មន្រ្តី​រាជការ​ឱ្យ​ចូល​បម្រើ​ការ​នៅ​ក្រសួងស្ថាប័ន ចំនួន ៨ក្រសួងស្ថាប័នដែលរៀបចំចំនួន ​៤២​លើក និង​ជ្រើសរើសបាន​មន្រ្តី​រាជការ​ក្របខណ្ឌចំនួន ៤ ៤៤៧នាក់៕