.jpg)
.jpg)
រញ្ជួយដី! ទូតខ្មែរនៅថៃ និងមីយ៉ាន់ម៉ា ត្រៀមផ្តល់ជំនួយគ្រប់បែបយ៉ាងដល់ពលរដ្ឋខ្មែររងគ្រោះ
- ថ្ងៃសុក្រ ទី២៨ ខែមីនា ឆ្នាំ២០២៥ ម៉ោង ៤:៤៧ នាទី រសៀល
លោក ជុំ សុន្ទរី អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានអះអាងថា រដ្ឋាភិបាលកំពុងតាមដានយ៉ាងយកចិត្តទុកដាក់ និងបានណែនាំទៅស្ថានទូតកម្ពុជាប្រចាំនៅប្រទេសថៃ និងមីយ៉ាន់ម៉ា ពាក់ព័ន្ធនឹងហេតុការណ៍ឡគ្រោះរញ្ជួយដីនៅប្រទេសទាំងពីរ កាលពីរសៀលថ្ងៃទី២៨ ខែមីនា នេះ។
ករណីរញ្ជួយដីកម្រិតខ្លាំងនៅក្រុងបាកកក ប្រទេសថៃ និងប្រទេសមីយ៉ាន់ម៉ា បណ្តាលឱ្យមានការបាក់អគារ និងបង្កការខូចខាតខាតទ្រពសម្បត្តិមួយចំនួន។ អ្នកពាក្យការបរទេស បញ្ជាក់ថា ក្រសួងការបរទេស តាមរយៈស្ថានទូតខ្មែរប្រចាំប្រទេសទាំងពីរ ខិតខំប្រមូលព័ត៌មានអំពីសុវត្ថិភាពរបស់ពលរដ្ឋ និងពលករខ្មែរដែលកំពុងស្ថិតនៅទីនោះ។
បើតាមលោក ជុំ សុន្ទរី ស្ថានទូត មិនទាន់ទទួលបានព័ត៌មានណាមួយថាមានពលករ ឬពលរដ្ឋខ្មែរ រងគ្រោះ ដោយសារហេតុការណ៍រញ្ជួយដីនៅប្រទេសទាំងពីរនេះនៅឡើយទេ។ លោកបន្ថែមថា ស្ថានទូតត្រៀមលក្ខណៈសហការជាមួយអាជ្ញាធរ ពាក់ព័ន្ធនៃប្រទេសម្ចាស់ផ្ទះ ដើម្បីផ្តល់ជំនួយដល់ពលរដ្ឋខ្មែររងគ្រោះ ឬត្រូវការជំនួយឱ្យអស់ពីលទ្ធភាព។
ជាមួយគ្នានេះ ក្រសួងការបរទេស អំពាវនាវដល់ពលរដ្ឋខ្មែរទាំងអស់ដែលកំពុងស្ថិតនៅប្រទេសទាំងពីរ ជាពិសេសតំបន់រងគ្រោះ ឱ្យទាក់ទងជាមួយក្រុមគ្រួសារ និងមិត្តភក្តិរបស់ពួកគេឱ្យបានដឹងថា ពួកគេមានសុវត្ថិភាព រក្សាការប្រុងប្រយ័ត្នខ្ពស់ ដោយចាត់វិធានការចាំបាច់ទាំងឡាយសម្រាប់សុវត្ថិភាពផ្ទាល់ខ្លួន និងស្តាប់ការណែនាំអាជ្ញាធរមូលដ្ឋាន។
ក្នុងករណីត្រូវការជំនួយនានា ឬជំនួយកុងស៊ុល ពលរដ្ឋខ្មែរអាចទាក់ទង ស្ថានទូតកម្ពុជានៅទីក្រុងបាងកក ដែលមានអាសយដ្ឋាន 518 / 4 Pracha Uthit Rd., Soi Ramkamhaeng 39, Wangthonglang, Bangkok 10310, Kingdom of Thailand។ លេខទំនាក់ទំនង៖ Tel: (02) 957-5851-2 ។
លេខទូរសព្ទបន្ថែមសម្រាប់ការទាក់ទងទៅស្ថានទូតខ្មែរនៅបាងកក មានលេខ 094 092 5905, 094 416 558, 083 545 7788 (លោក ឈឹម វិបុល), 062 089 8918 (លោក សម្ផស្ស) និងលេខ 092 299 0133 (កញ្ញា ចន្ថា)។
ស្ថានទូតកម្ពុជាប្រចាំនៅមីយ៉ាន់ម៉ា តាមរយៈអាសយដ្ឋាន No. 25(3B-4B), New University Avenue Road, Bahan Township, Yangon, Myanmar ឬលេខទំនាក់ទំនង៖ Tel: (951) 54 96 09, 54 09 64 ៕
© រក្សាសិទ្ធិដោយ thmeythmey.com
Tag:
.gif)