.jpg)
.jpg)
លោក ឌុច សារ៉េត ចង់ឱ្យសហគមន៍ទេសចរណ៍ពង្រឹងសេវាកម្ម ដើម្បីបង្កើនទាក់ទាញ
- ថ្ងៃសុក្រ ទី២៨ ខែមីនា ឆ្នាំ២០២៥ ម៉ោង ៩:៥៩ នាទី យប់
សៀមរាប៖ លោក ឌុច សារ៉េត អនុប្រធានសមាគមទេសចរណ៍កម្ពុជា ខេត្តសៀមរាប បានលើកឡើងពីសហគមន៍ទេសចរណ៍ ថាជាផ្នែកមួយដ៏សំខាន់ក្នុងវិស័យទេសចរណ៍។ នោះក៏ព្រោះ សហគមន៍ទេសចរណ៍ មានសេវាកម្មទេសចរណ៍សម្បូរបែប ធនធានធម្មជាតិ ផលិតផលកែច្នៃប្រចាំតំបន់ ដែលជាអត្តសញ្ញាណ និងភាពទាក់ទាញក្នុងតំបន់នីមួយៗ។
ដើម្បីជ្រាបច្បាស់សូមអញ្ជើញលោក-អ្នកនាងទស្សនាវីដេអូខាងក្រោមដូចតទៅ៖
«សហគមន៍ ដើរតួនាទីសំខាន់មែនទែនសម្រាប់វិស័យទេសចរណ៍ ដោយសារទេសចរគ្រប់បណ្ដាប្រទេសទាំងអស់បើសិនជាគ្មានសហគមន៍ ដែលជាអ្នកផ្ដល់សេវាកម្មនៅមូលដ្ឋានផ្ទាល់សម្រាប់បង្ហាញពីអ្វីដែលជាអត្តសញ្ញាណក្នុងតំបន់នីមួយៗ យើងមិនអាចនឹងមានលទ្ធផល ឬក៏សេវាកម្មគ្រប់គ្រាន់ក្នុងការផ្ដល់ជូនដល់វិស័យទេសចរណ៍ទេ»។ នេះជាការលើកឡើងរបស់លោក ឌុច សារ៉េត អនុប្រធានសហគមន៍ទេសចរណ៍កម្ពុជាខេត្តសៀមរាប។
សម្រាប់លោក ឌុច សារ៉េត មើលឃើញថា កម្ពុជាមានសក្ដានុពលទេសចរណ៍ខ្ពស់ ពិសេសខេត្តសៀមរាប មានលើសពីប្រាសាទ ប៉ុន្តែតំបន់នានា ផលិតផលទេសចរណ៍ និងសេវាកម្មទេសចរណ៍ដ៏សម្បូរបែបផ្សេងៗតាមសហគមន៍ ក៏បង្កើនភាពទាក់ទាញក្នុងវិស័យទេសចរណ៍ផងដែរ។ លោក ឌុច សារ៉េត ទទួលស្គាល់ថា រមណីយដ្ឋានអង្គរ ឬប្រាសាទអង្គរ ជាទិសដៅទី១សម្រាប់ភ្ញៀវទេសចរ ប៉ុន្តែសហគមន៍ក៏ជាផ្នែកមួយដ៏សំខាន់ ដែលមានវិសាលភាពបម្រើគ្រប់ផ្នែកនៃសេវាកម្ម មានទាំងម្ហូបអាហារ ផលិតផលក្នុងស្រុកប្រចាំតំបន់ធ្វើដោយដៃ សេវាកម្មស្នាក់នៅ បោះតង់ ជិះទូក និងទស្សនាធនធានធម្មជាតិជាដើម។
ទន្ទឹមនឹងនេះ លោក ឌុច សារ៉េត ចង់ឱ្យសហគមន៍សមត្ថភាព និងសេវាកម្មគ្រប់ផ្នែក ដើម្បីពង្រីកសក្ដានុពលទេសចរណ៍ និងបង្កើនភាពទាក់ទាញដល់ភ្ញៀវទេសចរ។ លោក ឌុច សារ៉េត លើកឡើងដូច្នេះ៖«កាលណាប្រទេសមួយក្នុងតំបន់មួយបើសិនជាសហគមន៍យើងខ្សោយ ទេសចរណ៍យើងអត់ខ្លាំង។ អ៊ីចឹងយើងចាំបាច់ណាស់ត្រូវកសាងសហគមន៍មួយក្នុងមូលដ្ឋាននៃតំបន់នីមួយៗឱ្យគាត់យល់ដឹង។ ហេតុអ្វីចាំបាច់ឱ្យគាត់យល់ដឹង ព្រោះទេសចរត្រូវការសេវាកម្មមួយ ដែលធ្វើយ៉ាងណាឱ្យទេសចរសប្បាយរីករាយ»។ លោកបន្តថា សេវាកម្មទេសចរណ៍ទៀតសោតក៏ត្រូវមានស្តង់ដាណាមួយ ដែលអាចឱ្យភ្ញៀវទទួលយកបាន ដូចជាតម្លៃ និងសេវាកម្មមានច្រើនសម្បូរបែបក្នុងតំបន់នីមួយៗ ពិសេសគឺមានផលិតផលអត្តសញ្ញាណប្រចាំតំបន់៕
© រក្សាសិទ្ធិដោយ thmeythmey.com
Tag:
