.jpg)
.jpg)
វេជ្ជបណ្ឌិតជំនាញ ប្រាប់ពីរបៀបថែទាំសុខភាពនៅរដូវក្ដៅ
- ថ្ងៃអាទិត្យ ទី៣០ ខែមីនា ឆ្នាំ២០២៥ ម៉ោង ៥:១០ នាទី ល្ងាច
ការថែទាំសុខភាពនៅរដូវក្ដៅ
ភ្នំពេញ៖ លោកវេជ្ជបណ្ឌិត ចន្ថា តុលា បានឱ្យដឹងថានារដូវក្ដៅ អាចបណ្ដាលឱ្យមនុស្សមានបញ្ហាសុខភាពជាច្រើនដោយសារការបាត់បង់ជាតិទឹកក្នុងខ្លួន។
ដើម្បីជ្រាបច្បាស់សូមលោកអ្នកទស្សនាបទសម្ភាសរវាង កញ្ញា អ៊ុត រស្មី អ្នកសារព័ត៌មាននៃសារព័ត៌មានឌីជីថលថ្មីៗ និងលោកវេជ្ជបណ្ឌិត ចន្ថា តុលា ឯកទេសទឹកនោមផ្អែម និងក្រពេញអ័រម៉ូន ដូចតទៅ៖
វេជ្ជបណ្ឌិត ចន្ថា តុលា បានរៀបរាប់ដូច្នេះ៖ «នៅពេលខ្វះជាតិទឹកបន្តិចបន្តួចអាចធ្វើឱ្យយើង មានអាការដូចជា អស់កម្លាំង ឈឺក្បាល និងស្រវាំងភ្នែក ។ ប៉ុន្តក្នុងករណីខ្វះជាតិទឹកខ្លាំង នឹងអាចធ្វើឱ្យមនុស្សកើតជំងឺ Heat Stroke សន្លប់ ដែលអាចប៉ះពាល់ដល់អាយុជីវិត ដោយសារតែការកើនឡើងកម្ដៅខ្លាំងនៅក្នុងខ្លួន» ។
បើតាមលោកវេជ្ជបណ្ឌិតរូបនេះ មនុស្សគ្រប់វ័យទាំងអស់អាចនឹងប្រឈមនឹងកើត Heat Stroke ប៉ុន្តែអ្នកដែលប្រឈមខ្ពស់ គឺកុមារ ស្រ្តីមានផ្ទៃពោះ និងមនុស្សចាស់ជរា បើសិនពួកគេមិនអាចបំពេញជាតិទឹកក្នុងខ្លួនគ្រប់គ្រាន់។
លោកវេជ្ជបណ្ឌិត បានប្រាប់ថា បរិមាណជាតិទឹក ដែលមនុស្សគួរតែបរិភោគ គឺចន្លោះពី២លីត្រកន្លះ ទៅ៣លីត្រកន្លះក្នុងមួយថ្ងៃ ។ វេជ្ជបណ្ឌិត ចន្ថា តុលា បានណែនាំឱ្យពលរដ្ឋត្រូវការពារសុខភាព ពិសាទឹកឱ្យបានគ្រប់គ្រាន់ កុំឱ្យបាត់បង់ជាតិទឹកក្នុងខ្លួនច្រើន និងចៀសវាង ត្រូវកម្ដៅថ្ងៃយូរពេក។ រីឯ អ្នកធ្វើការប៉ះពាល់នឹងកម្ដៅថ្ងៃ ត្រូវពិសាទឹកឱ្យបានច្រើនជាងពេលធម្មតា៕
© រក្សាសិទ្ធិដោយ thmeythmey.com
Tag:
