.jpg)
.jpg)
កម្ពុជា-លុចសំបួ បោះជំហានថ្មីឆ្ពោះទៅពង្រឹងទំនាក់ទំនងទ្វេភាគី
- ថ្ងៃចន្ទ ទី៣១ ខែមីនា ឆ្នាំ២០២៥ ម៉ោង ៨:៥៩ នាទី យប់
លោក ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ(ស្តាំ) និង លោក Xavier Bettel រដ្ឋមន្ត្រីការបរទេស ពាណិជ្ជកម្មបរទេស កិច្ចសហប្រតិបត្តិការអភិវឌ្ឍន៍ និងកិច្ចការមនុស្សធម៌ លុចសំបួ (ឆ្វេង)។r រូបភាព៖ ក្រសួងការបរទេសកម្ពុជា
លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេសកម្ពុជា និងលោក Xavier Bettel ឧបនាយករដ្ឋមន្ត្រី រដ្ឋមន្ត្រីការបរទេស ពាណិជ្ជកម្មបរទេស កិច្ចសហប្រតិបត្តិការអភិវឌ្ឍន៍ និងកិច្ចការមនុស្សធម៌ លុចសំបួ បានចុះហត្ថលេខាលើកិច្ចព្រមព្រៀងស្តីពីកិច្ចសហប្រតិបត្តិការទូទៅ រវាងរដ្ឋាភិបាលប្រទេសទាំងពីរ នៅថ្ងៃទី៣១ ខែមីនា។ ក្រសួងការបរទេសកម្ពុជា ចាត់ទុកកិច្ចព្រមព្រៀងនេះថា ទុកជាជំហានដ៏សំខាន់មួយ ឆ្ពោះទៅពង្រឹងទំនាក់ទំនងទ្វេភាគី។
បើតាមក្រសួងការបរទេសកម្ពុជា ពិធីចុះហត្ថលេខានេះ ធ្វើឡើងបន្ទាប់ពីជំនួបពិភាក្សាការងារទ្វេភាគី រវាង លោក ប្រាក់ សុខុន រដ្ឋមន្ត្រីការបរទេសកម្ពុជា ជាមួយព្រះអង្គម្ចាស់ Guillaume Jean Joseph Marie រជ្ជទាយាទនៃប្រទេសលុចសំបួ។
ក្នុងជំនួបនេះ ភាគីទាំងពីរ បានគូសបញ្ជាក់ពីសារៈសំខាន់នៃការបង្កើនកិច្ចសហប្រតិបត្តិការទ្វេភាគីលើវិស័យសេដ្ឋកិច្ច ពាណិជ្ជកម្ម ទេសចរណ៍ និងការផ្លាស់ប្តូររវាងប្រជាជន-ប្រជាជន។ ក្រសួងការបរទេសកម្ពុជា បន្តដូច្នេះ៖«ភាគីទាំងពីរ ក៏បានផ្លាស់ប្តូរទស្សនៈស្តីពីបញ្ហាតំបន់ និងអន្តរជាតិ ផងដែរ។»។
លោក ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ(ស្តាំ) និងព្រះអង្គម្ចាស់ Guillaume Jean Joseph Marie រជ្ជទាយាទនៃប្រទេសលុចសំបួ(ឆ្វេង)។ រូបភាព៖ ក្រសួងការបរទេសកម្ពុជា
សូមជម្រាបដែរថា ក្រៅពីចុះកិច្ចព្រមព្រៀង ដែលជាជំហានថ្មីឆ្ពោះទៅពង្រឹងទំនាក់ទំនងទ្វេភាគី រដ្ឋាភិបាលលុចសំបួ ក៏នឹងផ្តល់ថវិកាជំនួយ ចំនួន ២លានអឺរ៉ូផងដែរ សម្រាប់គាំទ្រគម្រោងបោសសម្អាតមីនដើម្បីលទ្ធផល ដំណាក់កាលទី៤ និងទី៥ នៅកម្ពុជា។ ព្រះអង្គម្ចាស់ Guillaume Jean Joseph Marie រជ្ជទាយាទនៃប្រទេសលុចសំបួ និងលោកស្រី Alissar Chaker តំណាងកម្មវិធីអភិវឌ្ឍន៍អង្គការសហប្រជាជាតិប្រចាំនៅកម្ពជា (UNDP) នឹងចុះហត្ថលេខាលើកិច្ចព្រមព្រៀងជំនួយនេះ នៅថ្ងៃទី១ ខែមេសា នៅសណ្ឋាគារ Raffles Hotel Le Royal រាជធានីភ្នំពេញ។ នេះបើតាមសេចក្តីប្រកាសព័ត៌មានរបស់អាជ្ញាធរមីនកម្ពុជា ដែលបានចាត់ទុកការចូលរួមរបស់ លុចសំបួ ថានឹងបង្កើនទិន្នផលនៃការបោសសម្អាតមីន ធ្វើឱ្យប្រសើរឡើងនូវការផ្តល់សេវាដល់ជនមានពិការភាព តាមរយៈមជ្ឈមណ្ឌលស្តារលទ្ធភាពពលកម្មកាយសម្បទា និងបង្កើតសមត្ថភាពជាតិ ក្នុងការឆ្លើយតបនឹងការប្រមូលយុទ្ធភណ្ឌដែលនៅសេសសល់៕
អត្ថបទទាក់ទង
© រក្សាសិទ្ធិដោយ thmeythmey.com
