ភ្នំពេញ៖ ក្រសួងព័ត៌មាន បើកយុទ្ធនាការ «និយាយថាទេ ចំពោះព័ត៌មានក្លែងក្លាយ!» រយៈ ពេល១២ខែ ក្នុងបំណងផ្លាស់ប្ដូរឥរិយាបថរបស់ប្រជាជន ពិសេសលើបណ្ដាញសង្គម ដើម្បី​រួមគ្នា ទប់ស្កាត់ការរីករាលដាលព័ត៌មានក្លែងក្លាយ។

នៅថ្ងៃទី១ ខែមេសា ក្រសួងព័ត៌មាន បានប្រកាសបើកយុទ្ធនាការ «និយាយថាទេ ចំពោះ​ព័ត៌​មានក្លែងក្លាយ!» ដើម្បីកាត់បន្ថយព័ត៌មានក្លែងក្លាយ ក្នុងសង្គម។ លោក នេត្រ ភក្ត្រា រដ្ឋ​មន្ត្រីក្រសួងព័ត៌មាន កត់សម្គាល់ឃើញ ព័ត៌មានក្លែងក្លាយ មានការកើនឡើង ដោយ​នៅ​ក្នុងឆ្នាំ២០២៣ មានព័ត៌មានក្លែងក្លាយ ៣ ២០៨ព័ត៌មាន ហើយនៅឆ្នាំ ៣​ ៦៥១ ព័ត៌មាន។ ចំនួននេះបានកើនឡើង ប្រមាណ ១៤ ភាគរយ។ រដ្ឋមន្ត្រីអះអាងថា ព័ត៌មានក្លែងក្លាយទាំង​នេះ ភាគច្រើន គឺព័ត៌មានបង្កអសន្តិសុខ វាយប្រកាសថ្នាក់ដឹកនាំរដ្ឋាភិបាល និងការលាប​ពណ៌ដើម្បីប្រយោជន៍ផ្ទាល់ខ្លួន។ 

ហេតុនេះ ដើម្បីកាត់បន្ថយព័ត៌មាន រដ្ឋមន្ត្រីបានរៀបចំយុទ្ធនាការ «និយាយថាទេ ចំពោះ​ព័ត៌មានក្លែងក្លាយ! » ឡើយ ហើយលោក នេត្រ ភក្ត្រា បានបញ្ជាក់បន្ថែមថា៖ «គោលដៅ​នៃយុទ្ធនាការនេះ គឺផ្ដោតលើការផ្លាស់ប្ដូរឥរិយាបទរបស់ប្រជាពលរដ្ឋ ដែលជាអ្នកប្រើ​ប្រាស់​បណ្ដាញសង្គម និងប្រព័ន្ធផ្សព្វផ្សាយទំនើប ដើម្បីទប់ស្កាត់ការរីកសាយភាយ​នូវ​ព័ត៌មានក្លែងក្លាយក្នុងសង្គមកម្ពុជា»។ 

លោក នេត្រ ភក្ត្រា ចាត់ទុក ព័ត៌មានក្លែងក្លាយ ជាបញ្ហាប្រឈមធំមួយ ដែលនាំឱ្យពលរដ្ឋ​សម្រេចចិត្តខុស។ ជាមួយគ្នានេះដែរ រដ្ឋមន្ត្រី ឃើញយុវជនជាក្រុមមនុស្សដែលងាយ​នឹង​ទទួល​ឥទ្ធិពលពីព័ត៌មានក្លែងក្លាយទាំងនោះបំផុត ខណៈសង្គមកម្ពុជាភាគច្រើន ជាយុវជន ហើយក៏ជាអ្នកប្រើប្រាស់បណ្ដាញសង្គមច្រើន។ 

លោក នេត្រ ភក្ត្រា រដ្ឋមន្រ្តីក្រសួងព័ត៌មាន នៅសន្និសីទសារព័ត៌មានស្ដីពី ការអនុវត្តយុទ្ធនាការ «និយាយថាទេចំពោះព័ត៌មានក្លែងក្លាយ- Say No to Fake News» កាលពីរសៀលថ្ងៃទី៣១មីនា ឆ្នាំ២០២៥។ រូបពី ក្រសួងព័ត៌មាន

តាមរយៈយុទ្ធនាការ «និយាយថាទេ ចំពោះព័ត៌មានក្លែងក្លាយ!» ក្រសួងព័ត៌មាន នឹង​បញ្ជ្រាប​ការយល់ដឹងទៅកាន់ពលរដ្ឋ ឱ្យស្គាល់ព័ត៌មានក្លែងក្លាយ និងផលប៉ះពាល់ពី​ព័ត៌មានក្លែងក្លាយ។ ក្រសួង ក៏មានបំណងលើកកម្ពស់ព័ត៌មាន និងប្រព័ន្ធផ្សព្វផ្សាយ ក្នុងចំណោមពលរដ្ឋទូទៅ ពិសេសយុវវ័យ ដើម្បីឱ្យពួកគេចេះបែងចែកព័ត៌មានពិត ឬមិនពិត។

ទន្ទឹមនឹងនេះ លោក នេត្រ ភក្ត្រា បានបញ្ជាក់បន្ថែមយ៉ាងដូច្នេះ៖ «ដើម្បីឱ្យពួកគេ (ពលរដ្ឋ) ចែក​រំលែកព័ត៌មានបន្តដោយប្រុងប្រយ័ត្ន ហើយយើងនឹងផ្ដល់មូលដ្ឋានគ្រឹះដល់ពលរដ្ឋ ​ឱ្យ​យល់ពីព័ត៌មានក្លែងក្លាយ គេសម្គាល់យ៉ាងម្ដេច? ហើយព័ត៌មានពិត យើងសម្គាល់យ៉ាង​ដូច​ម្ដេច​?»។ 

​លោករដ្ឋមន្ត្រីព័ត៌មាន បានបង្ហាញពីទម្រង់ព័ត៌មានក្លែងក្លាយ មាន៣ប្រភេទ។ ទី១ ព័ត៌មាន​ក្លែង​បន្លំ (Disinformation) បង្កើតឡើង ហើយយកទៅផ្សព្វផ្សាយដោយចេតនា ​ឱ្យមហាជន​មានការយល់ច្រឡំ ហើយបង្កផលប៉ះពាល់ដល់បុគ្គលណាម្នាក់ អង្គការណាមួយ ឬប្រទេស​ណាមួយ។ ទី២ ​ព័ត៌មានបំភ្លៃ (Malinformation) ជាព័ត៌មានមិនពិត ដែលកែច្នៃពីព័ត៌មានពិត ហើយ​ផ្សព្វផ្សាយក្នុងចេតនាធ្វើឱ្យប៉ះពាល់ដល់កិត្តិយសបុគ្គល អង្គការ ស្ថាប័ន ឬប្រទេស​ណាមួយ។ ទី៣ គឺព័ត៌មានភាន់ច្រឡំ (Misinformation) ជាព័ត៌មានមិនពិត ដែល​អ្នក​ចែក​រំលែក​បន្តមិនដឹងពីប្រភពនៃព័ត៌មានច្បាស់ ដោយគ្មានបំណងធ្វើឱ្យប៉ះពាល់​ផល​ប្រយោជន៍ដល់ភាគីណាមួយឡើយ៕