.jpg)
.jpg)
Southampton ធ្លាក់ពី Premier League ទាំងសល់៧ប្រកួត ដំបូងគេក្នុងប្រវត្តិសាស្ត្រ
- ថ្ងៃអង្គារ ទី៨ ខែមេសា ឆ្នាំ២០២៥ ម៉ោង ៣:៤៥ នាទី រសៀល
Southampton បានក្លាយជាក្រុមដំបូងគេដែលធ្លាក់ចេញពី Premier League នៅរដូវកាល ២០២៤-២៥ និងដំបូងបំផុតក្នុងប្រវត្តិសាស្ត្រទាំងនៅសល់ការប្រកួត ចំនួន៧លើក។ ៣១ប្រកួត Southampton រកបានតែ ១០ពិន្ទុប៉ុណ្ណោះ។
បន្ទាប់ពីចាញ់ Tottenham Hotspur ក្នុងលទ្ធផល ៣-១ ក្នុងកាប្រកួតលីគកំពូលអង់គ្លេសសប្តាហ៍ទី៣១ នៅថ្ងៃទី៦ ខែមេសា និងជាបរាជ័យលើកទី ២៥ បានធ្វើឱ្យ Southampton ធ្លាក់ទៅលីគលំដាប់ទី២អង់គ្លេស Championship ដោយស្វ័យប្រវត្តិ។
ធ្លាក់ពីលីគកំពូលទាំងនៅសល់៧ប្រកួត បាននាំឱ្យ Southampton ក្លាយជាក្រុមដំបូងបំផុតក្នុងប្រវត្តិសាស្រ្តនៃលីគកំពូលអង់គ្លេស ដែលសល់ការប្រកួតច្រើនផងដែរ។ ឥឡូវនេះ Southampton ក្លាយជាអ្នកជំនួស Derby County ដែលរកបាន ១១ពិន្ទុទាបបំផុត ក្នុងរដូវកាល ២០០៧-០៨។
លោក Ivan Juric គ្រូ Southtampton
លោក Ivan Juric អ្នកចាត់ការទូទៅ Southampton ក៏បានលាលែងតំណែងរបស់ខ្លួនផងដែរ ក្រោយទទួលបានលទ្ធផលដ៏អាក្រក់នេះ។ អ្នកចាត់ការសញ្ជាតិក្រូអាស៊ី ឡើងដឹកនាំក្រុម ក្នុងខែធ្នូ ឆ្នាំ ២០២៤ ប៉ុន្តែបានឈ្នះតែពីរប្រកួតប៉ុណ្ណោះក្នុងចំណោម ១៦ ប្រកួត។
៣១ប្រកួត Southampton ស្គាល់ជ័យជម្នះតែ២ប្រកួតប៉ុណ្ណោះ ក្រៅពីនោះ ស្មើ៤ និងចាញ់រហូតដល់២៥លើក រកបានតែ ១០ពិន្ទុប៉ុណ្ណោះ ស្ថិតនៅបាតតារាង។ Southampton តាមពីក្រោយ Wolves ដែលឈរចំណាត់ថ្នាក់លេខ១៧ (តំបន់សុវត្ថិភាព) ចំនួន២២ពីន្ទុ មានន័យថាទៅះពួកគេឈ្នះទាំង៧ប្រកួតដែលនៅសល់ ក៏មិនអាចគេផុតពីតំបន់ការចោលដែរ។
Southampton ក៏ក្លាយជាក្រុមដំបូងគេ ក្នុងចំណោមក្រុមទាំងអស់នៃលីគគំពូលទាំង៥នៅអឺរ៉ុប ដែលមិនអាចរក្សាកៅអីលីគកំពូល សម្រាប់រដូវកាលក្រោយ៕
© រក្សាសិទ្ធិដោយ thmeythmey.com
Tag:
