.jpg)
.jpg)
ចូលឆ្នាំ៖ អាជ្ញាធរភ្នំពេញ ហាមដាច់ខាតមិនឱ្យពលរដ្ឋបង្ហោះគោម និងអុជកាំជ្រួច
- ថ្ងៃពុធ ទី៩ ខែមេសា ឆ្នាំ២០២៥ ម៉ោង ៨:៥៩ នាទី យប់
លោក ឃួង ស្រេង អភិបាលរាជធានីភ្នំពេញ នាកិច្ចប្រជុំត្រៀមរៀបចំសន្តិសុខ សណ្តាប់ធ្នាប់របៀបរៀបរយសាធារណៈ អនាម័យបរិស្ថាន ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ។ រូបភាព៖ រដ្ឋបាលរាជធានីភ្នំពេញ
រដ្ឋបាលរាជធានីភ្នំពេញ នៅថ្ងៃទី៨ មេសានេះ បានចេញសេចក្ដីណែនាំដល់ពលរដ្ឋរស់នៅក្នុងរាជធានី ដោយបានហាមដាច់ខាតមិនឱ្យមានការបង្ហោះគោម និងការអុជកាំជ្រួចគ្រប់ប្រភេទ នាឱកាសពិធីបុណ្យចូលឆ្នាំថ្មី ប្រពៃណីខ្មែរខាងមុខនេះ។
បើតាមអាជ្ញាធរការដាក់ចេញវិធានការខាងលើនេះ ដើម្បីចូលរួមថែរក្សាសុវត្ថិភាព បង្ការ ការពារគ្រោះអគ្គិភ័យក្នុងរាជធានី ដែលអាចកើតឡើយជាយថាហេតុ ស្របពេលដែលអាកាសធាតុកំពុងក្ដៅស្ងួតខ្លាំង ដែលងាយបង្កឱ្យមានគ្រោះអគ្គិភ័យ។
រដ្ឋបាលរាជធានីសង្កត់ធ្ងន់ដូច្នេះ៖ «អាជ្ញាធរមានសមត្ថកិច្ចគ្រប់លំដាប់ថ្នាក់ ត្រូវចាត់វិធានការឱ្យបានម៉ឺងម៉ាត់បំផុតចំពោះបុគ្គល និងម្ចាស់ទីតាំងណាដែលបង្កការអុជកាំជ្រួច និងបង្ហោះគោមបណ្ដាលឱ្យមានអគ្គិភ័យកើតឡើង ត្រូវទទួលខុសត្រូវចំពោះមុខច្បាប់ជាធរមាន»។
ជាមួយគ្នានេះអាជ្ញាធរក៏បានក្រើនរំឭកដល់ពលរដ្ឋ ស្ថាប័នរដ្ឋ ស្ថាប័នឯកជន វត្តអារាម ទីសក្ការៈ និងគ្រប់ទីកន្លែងអាជីវកម្មទាំងអស់ ត្រូវប្រុងប្រយ័ត្នខ្ពស់ទៅលើ ភ្លើងចង្ក្រាន ភ្លើងចង្កៀង ភ្លើងទៀន-ធូប ការតភ្ជាប់ ឬប្រើចរន្តអគ្គិសនីមិនត្រឹមត្រូវជាដើម ដែលអាចបង្កជាគ្រោះអគ្គិភ័យ និងគ្រោះថ្នាក់ដល់អាយុជីវិតបាន៕
© រក្សាសិទ្ធិដោយ thmeythmey.com
Tag:
.gif)