.jpg)
.jpg)
ក្រុមហ៊ុនរថយន្តអគ្គិសនីចិន នឹងសង់រោងចក្រដំឡើងរថយន្តអគ្គិសនីនៅកម្ពុជា នាចុងខែមេសានេះ
- ថ្ងៃព្រហស្បតិ៍ ទី១០ ខែមេសា ឆ្នាំ២០២៥ ម៉ោង ៥:៥៩ នាទី ល្ងាច
រូបភាពពីក្រុមប្រឹក្សាអភិវឌ្ឍន៍កម្ពុជា។
ភ្នំពេញ៖ ក្រុមហ៊ុនរថយន្តអគ្គិសនីចិន BYD នឹងបើកការដ្ឋានសាងសង់រោងចក្រដំឡើងរថយន្តអគ្គិសនីរបស់ខ្លួននៅក្នុងប្រទេសកម្ពុជា នាចុងខែមេសានេះ។ នេះបើតាមក្រុមប្រឹក្សាអភិវឌ្ឍន៍កម្ពុជា។
ក្នុងជំនួបរវាងលោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ជាមួយលោក Xiao Haiping នាយកប្រតិបត្តិនៃការិយាល័យប្រធានសម្ព័ន្ធក្រុមហ៊ុន BYD បានបង្ហើយពីគម្រោងបើកការដ្ឋានសាងសង់រោងចក្រដំឡើងរថយន្តអគ្គិសនីនៅកម្ពុជា នាចុងខែមេសានេះ។
តាមរយៈជំនួបខាងលើ គណៈប្រតិភូក្រុមហ៊ុន BYD Auto Industry Co., Ltd បានអរគុណចំពោះកិច្ចសម្របសម្រួលនានារបស់រាជរដ្ឋាភិបាលកម្ពុជា ក៏ដូចជាក្រុមប្រឹក្សាអភិវឌ្ឍន៍កម្ពុជា ចាប់តាំងពីដំណាក់កាលដំបូងនៃការចូលមកកាន់ទីផ្សារកម្ពុជា រហូតឈានដល់ការត្រៀមសាងសង់រោងចក្រ។ លោក ស៊ុន ចាន់ថុល ក៏បានបង្ហាញក្ដីរីករាយចំពោះក្រុមហ៊ុនរថយន្តអគ្គិសនី BYD ដែលបានជ្រើសរើសកម្ពុជា ជាមូលដ្ឋានដំឡើងរថយន្ត BYD មួយបន្ថែមទៀតនៅក្នុងតំបន់អាស៊ីអាគ្នេយ៍។
លោក ស៊ុន ចាន់ថុល អនុប្រធានទី១ នៃក្រុមប្រឹក្សាអភវិឌ្ឍន៍កម្ពុជា។ រូបភាពពីក្រុមប្រឹក្សាអភិវឌ្ឍន៍កម្ពុជា
«ក្រុមប្រឹក្សាអភិវឌ្ឍន៍កម្ពុជា ដែលជាសេនាធិការច្រកចេញចូលតែមួយរបស់រាជរដ្ឋាភិបាល តែងតែត្រៀមលក្ខណៈរួចរាល់ជាស្រេចក្នុងការសម្របសម្រួលរាល់គ្រប់កិច្ចការងារវិនិយោគរបស់វិស័យឯកជននៅកម្ពុជា សំដៅធានាបាននូវបរិយាកាសវិនិយោគ ប្រកបដោយភាពបត់បែន អំណោយផល និងអនុគ្រោះបំផុត»។ នេះជាការបញ្ជាក់របស់លោក ស៊ុន ចាន់ថុល។
លោកឧបនាយករដ្ឋមន្រ្តី សង្ឃឹមថា បន្ទាប់ពីរោងចក្រដំឡើងរថយន្តអគ្គិសនីបានសាងសង់រួចរាល់ និងដាក់ឱ្យប្រតិបត្តិការជាផ្លូវការ នៅអំឡុងត្រីមាសទី៤ ឆ្នាំ២០២៥នេះ អត្រានៃការប្រើប្រាស់រថយន្ត BYD នៅកម្ពុជានឹងមានការកើនឡើងផងដែរ។ នេះបើតាមក្រុមប្រឹក្សាអភិវឌ្ឍន៍កម្ពុជា៕
រូបភាពពីក្រុមប្រឹក្សាអភិវឌ្ឍន៍កម្ពុជា
© រក្សាសិទ្ធិដោយ thmeythmey.com
Tag:
