.jpg)
.jpg)
រដ្ឋាភិបាលកម្ពុជា ប្ដេជ្ញាជំរុញការអភិវឌ្ឍកម្ពុជាឱ្យរីកចម្រើន និងមិនរាថយ
- ថ្ងៃសៅរ៍ ទី១២ ខែមេសា ឆ្នាំ២០២៥ ម៉ោង ៣:៥៩ នាទី រសៀល
ភ្នំពេញ៖ សម្ដេច ហ៊ុន ម៉ាណែត ប្រមុខរាជរដ្ឋាភិបាលកម្ពុជា បានប្ដេជ្ញាចិត្តយ៉ាងមុតមាំឥតរាថយ និងកាន់តែស្វាហាប់ ក្នុងការបន្តអនុវត្តកិច្ចការកែទម្រង់កាន់តែស៊ីជម្រៅលើគ្រប់វិស័យ។ ទន្ទឹមនឹងនេះ សម្ដេចនាយករដ្ឋមន្រ្តី សង្កត់ធ្ងន់ថា រដ្ឋាភិបាល នឹងនៅតែបន្តអនុវត្តអភិក្រម «ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់»។
ក្នុងសារលិខិតជូនពរប្រជាពលរដ្ឋ នាឱកាសពិធីចូលឆ្នាំប្រពៃណីជាតិខ្មែរ សម្ដេច ហ៊ុន ម៉ាណែត បានបង្ហាញពីសមិទ្ធផល និងការអភិវឌ្ឍរបស់កម្ពុជាក្នុងឆ្នាំកន្លងទៅ។ លើសពីនេះ រដ្ឋាភិបាល មានទិសដៅបន្តលើកកម្ពស់កិត្យានុភាពជាតិឱ្យខ្ពស់ និងជំរុញសន្ទុះកំណើនសេដ្ឋកិច្ចជាតិ។
ដើម្បីជំរុញ និងបង្កើនល្បឿនលើកិច្ចការកែទម្រង់លើវិស័យមួយចំនួន រដ្ឋាភិបាល បានដាក់ចេញវិធានការគន្លឹះចំនួន ៥ គឺវិធានការគន្លឹះក្នុងការពង្រឹងសមត្ថភាពរដ្ឋបាលសាធារណៈ, ការលើកកម្ពស់គុណភាពអប់រំ, ការលើកកម្ពស់គុណភាពសេវាសុខាភិបាល, ការពង្រឹងការអនុវត្តគោលនយោបាយភូមិ-ឃុំ-សង្កាត់មានសុវត្ថិភាព និងការពង្រឹង និងលើកកម្ពស់គុណភាព និងប្រសិទ្ធភាពនៃប្រព័ន្ធយុត្តិធម៌។
តាមរយៈការដាក់ចេញនូវវិធានការគន្លឹះទាំង៥ខាងលើ ក្នុងឆ្នាំ២០២៥នេះ រាជរដ្ឋាភិបាលកម្ពុជា នឹងបន្តជំរុញការអនុវត្តយ៉ាងសស្រាក់សស្រាំនូវបេសកកម្មជាប្រវត្តិសាស្រ្តរបស់ខ្លួន។ ប្រមុខរដ្ឋាភិបាល លើកឡើងដូច្នេះ៖«ប្ដេជ្ញាចិត្តយ៉ាងមុតមាំឥតរាថយ និងកាន់តែស្វាហាប់ ក្នុងការបន្តអនុវត្តកិច្ចការកែទម្រង់កាន់តែស៊ីជម្រៅ និងទូលំទូលាយលើគ្រប់វិស័យ ពិសេសលើការអនុវត្តឱ្យកាន់តែមានប្រសិទ្ធភាពនូវយុទ្ធសាស្រ្តបញ្ចកោណ»។
បន្ថែមលើនេះ រដ្ឋាភិបាលកម្ពុជា ក៏ប្ដេជ្ញាការពាររដ្ឋធម្មនុញ្ញ ការពាររបបរាជានិយម និងការពារសមិទ្ធផលរបស់រដ្ឋាភិបាលកម្ពុជាឱ្យបានគង់វង្ស។ ទន្ទឹមនឹងនេះ សម្ដេចនាយករដ្ឋមន្រ្តី សង្កត់ធ្ងន់ថា រដ្ឋាភិបាល នឹងនៅតែបន្តអនុវត្តអភិក្រម «ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់»៕
© រក្សាសិទ្ធិដោយ thmeythmey.com
Tag:
