.jpg)
.jpg)
«សង្រ្កាន្តវត្តភ្នំ» ទទួលបានទេសចរជាង១លាននាក់ ក្នុងរយៈពេល២ថ្ងៃ
- ថ្ងៃពុធ ទី១៦ ខែមេសា ឆ្នាំ២០២៥ ម៉ោង ១១:០០ នាទី ព្រឹក
រូបភាពពីហ្វេសប៊ុកលោក ឃួង ស្រេង អភិបាលរាជធានីភ្នំពេញ
ភ្នំពេញ៖ «សង្រ្កាន្តវត្តភ្នំ» បានស្រូបទាញទេសចរមកកម្សាន្តយ៉ាងច្រើនកុះករ ជាពិសេសនាពេលរសៀល និងល្ងាច។ លោកស្រី ដោ សម្ផស្ស អ្នកនាំពាក្យរដ្ឋបាលរាជធានីភ្នំពេញ បានប្រាប់សារព័ត៌មានឌីជីថលថ្មីៗ ក្នុងរយៈពេល២ថ្ងៃ ចាប់ពីថ្ងៃទី១៤-១៥ ខែមេសា «សង្រ្កាន្តវត្តភ្នំ» មានទេសចរ និងពលរដ្ឋកម្សាន្តចំនួន ១លាន២៨ម៉ឺននាក់។
ក្នុងឱកាសពិធីបុណ្យចូលឆ្នាំថ្មី ប្រពៃណីខ្មែរ រាជធានីភ្នំពេញ មិនមានសភាពស្ងប់ស្ងាត់ឡើយ។ ប្រជាពលរដ្ឋ និងភ្ញៀវទេសចរ បានមកប្រមូលផ្ដុំគ្នានៅរមណីយដ្ឋានវប្បធម៌ប្រវត្តិសាស្រ្តវត្តភ្នំ ដែលជាទីរៀបចំព្រឹត្តិការណ៍«សង្រ្កាន្តវត្តភ្នំ»។
ពលរដ្ឋ និងទេសចរខ្លះ មកផ្ដិតរូបភាព ខ្លះចូលរួមលេងល្បែងប្រជាប្រិយ និងខ្លះទៀតមកលេងនៅតំបន់ត្រជាក់ចិត្ត ដែលមានលេងបាញ់ទឹក និងប៉ាតម្សៅជាដើម។ លោកស្រី ដោ សម្ផស្ស អ្នកនាំពាក្យរដ្ឋបាលរាជធានីភ្នំពេញ បានឱ្យដឹងថា នៅថ្ងៃទី១៤ មេសា ដែលជាថ្ងៃទី១នៃពិធីបុណ្យចូលឆ្នាំ មានទេសចរមកកម្សាន្តសង្រ្កាន្តវត្តភ្នំ ចំនួន ៤៨ម៉ឺននាក់។ ដោយឡែក ថ្ងៃទី១៥ មេសា ទេសចរបានកើនដល់៨០ម៉ឺននាក់។
ពាក់ព័ន្ធនឹងកំណើនពលរដ្ឋ និងទេសចរនេះ លោកស្រី ដោ សម្ផស្ស បញ្ជាក់ដូច្នេះ៖«ប្រជាពលរដ្ឋជាតិ និងភ្ញៀវអន្តរជាតិ មកលេងកម្សាន្តប្រកបដោយភាពសប្បាយរីករាយ យោគយល់គ្នា ហើយអ្វីដែលសង្កេតឃើញគឺភ្ញៀវបរទេសច្រើន ឆ្នាំនេះហើយពួកគាត់មកលេងសប្បាយជុំគ្រួសារ និងមិត្តភក្ដិគាត់ ជាមួយបងប្អូនប្រជាពលរដ្ឋយើង»។
បើតាមអ្នកនាំពាក្យរដ្ឋបាលរាជធានីភ្នំពេញ រសៀលនេះ នឹងមានកម្មវិធីដង្ហែព្រះពុទ្ធរូបពីវត្តឧណ្ណាលោម មកវត្តភ្នំ ដែលក្បួនហែ ដឹកនាំដោយលោក ឃួង ស្រេង អភិបាលរាជធានីភ្នំពេញ។ សូមបញ្ជាក់ថា ក្នុងព្រឹត្តិការណ៍ «សង្រ្កាន្តវត្តភ្នំ» មិនមានបញ្ហាអ្វីគួរឱ្យកត់សម្គាល់នោះទេ ពោលសមត្ថកិច្ច និងអាជ្ញាធរអាចគ្រប់គ្រងស្ថានភាពបានយ៉ាងល្អ៕
© រក្សាសិទ្ធិដោយ thmeythmey.com
