.jpg)
.jpg)
អ៊ុយក្រែនដាក់ទណ្ឌកម្មក្រុមហ៊ុនចិន ក្រោយចោទថាផលិតអាវុធលើដីរុស្ស៊ី
- ថ្ងៃសៅរ៍ ទី១៩ ខែមេសា ឆ្នាំ២០២៥ ម៉ោង ៧:៤៩ នាទី ល្ងាច
ប្រធានាធិបតីអ៊ុយក្រែន វ៉ូឡូឌីមៀរ ហ្សេឡេនស្គី ចោទប្រកាន់ ថា ក្រុមហ៊ុនចិនផលិតអាវុធលើទឹកដីរុស្ស៊ី ។ AP - Efrem Lukatsky
លើឆាកអន្តរជាតិ រដ្ឋាភិបាលចិនតែងតែប្រកាសជំហរអព្យាក្រឹត្យចំពោះរឿងសង្គ្រាមអ៊ុយក្រែន។ ពេលនេះ រដ្ឋាភិបាលទីក្រុងកៀវ ដាក់ក្រុមហ៊ុនចិន ៣ ក្នុងបញ្ជីទណ្ឌកម្ម និងបង្កកទ្រព្យសម្បត្តិ។ ការដាក់ទណ្ឌកម្មលើក្រុមហ៊ុនចិន ធ្វើឡើងក្រោយពីថ្នាក់ដឹកនាំអ៊ុយក្រែន ចោទប្រកាន់ថា ចិនផលិតអាវុធលើដីរុស្ស៊ី ហើយទាហានចិនក៏ជួយច្បាំងរុស្ស៊ីថែមទៀត។
រដ្ឋាភិបាលអ៊ុយក្រែន បានប្រកាសផ្សាយបញ្ជីទណ្ឌកម្ម នៅថ្ងៃសុក្រ ទី១៨មេសា។ ក្នុងនោះ ក្រៅពីក្រុមហ៊ុនរុស្ស៊ី ជារបស់ប្រទេសសត្រូវឈ្លានពាន គេឃើញមានក្រុមហ៊ុនចិន ចំនួន ៣ ដែលត្រូវជាប់ក្នុងបញ្ជីទណ្ឌកម្មរបស់អ៊ុយក្រែន។ ទណ្ឌកម្មនេះ បានសម្រេចហាមឃាត់ មិនឲ្យក្រុមហ៊ុនចិនទាំង ៣ នោះ បន្តរកស៊ីក្នុងប្រទេសអ៊ុយក្រែន តទៅទៀតទេ។ ឯទ្រព្យសម្បត្តិរបស់ក្រុមហ៊ុនចិនទាំងនោះទៀតសោត ក៏ត្រូវបង្កក។
ក្រុមហ៊ុនចិនជាប់បញ្ជីខ្មៅអ៊ុយក្រែន មានដូចជា ក្រុមហ៊ុនខាងបច្ចេកវិទ្យាអាកាស Beijing Aviation And Aerospace Xianghui Technology Co. Ltd, ក្រុមហ៊ុនគ្រឿងយន្ត Rui Jin Machinery Co. Ltd និងក្រុមហ៊ុនគ្រឿងបរិក្ខារលោហៈផលិតអាវុធ Zhongfu Shenying Carbon Fiber Xining Co. Ltd, ដែលសុទ្ធសឹងតែចុះបញ្ជីក្រុមហ៊ុននៅស្រុកចិន។ ការផ្សាយឈ្មោះក្រុមហ៊ុនចិនដែលជាប់ទណ្ឌកម្មអ៊ុយក្រែនពេលនេះ ធ្វើឡើង ក្រោយពីរដ្ឋាភិបាលទីក្រុងកៀវ ចោទប្រកាន់ថា រដ្ឋអំណាចចិនបានជួយផ្គត់ផ្គង់គ្រឿងសព្វាវុធទៅឲ្យកងទ័ពរុស្ស៊ី។ មិនតែប៉ុណ្ណោះ ប្រធានាធិបតីអ៊ុយក្រែន វ៉ូឡូឌីមៀរ ហ្សេឡេនស្គី ក៏បានប្រកាសជាលើកទី១ កាលពីថ្ងៃព្រហស្បតិ៍ ទី១៧មេសា ថាក្រុមហ៊ុនចិនក៏ថែមទាំងផលិតអាវុធមួយចំនួននៅលើទឹកដីរុស្ស៊ី ទៀតផង។ ទោះបីជាម្តេចក្តី ក្នុងគ្រានេះ ថ្នាក់ដឹកនាំអ៊ុយក្រែនពុំបានបង្ហាញភស្តុតាងនៅឡើយទេ តែបានអះអាងថានឹងលាតត្រដាងព័ត៌មានលម្អិត នៅពេលដ៏ខ្លីខាងមុខ។
កាលពីដើមខែមេសា ឆ្នាំ២០២៥នេះ ប្រធានាធិបតីអ៊ុយក្រែន វ៉ូឡូឌីមៀរ ហ្សេឡេនស្គី ក៏ធ្លាប់បានប្រកាសប្រាប់ពិភពលោក ថា យុទ្ធជនចិន បានចូលរួមពួតដៃប្រយុទ្ធជាមួយទាហានរុស្ស៊ី នៅក្នុងសមរភូមិប្រឆាំងអ៊ុយក្រែន ហើយកងទ័ពអ៊ុយក្រែន ក៏ចាប់បានទាហានចិន ២ នាក់ផង។ ភ្នាក់ងារស៊ើបការណ៍សម្ងាត់អ៊ុយក្រែននិងអាមេរិក បានបញ្ជាក់ព្រមគ្នាថា ទាហានចិន បានចូលរួមពលីប្រយុទ្ធជួយខាងទ័ពរុស្ស៊ី ជាថ្នូរនឹងលុយ។
ផ្ទុយទៅវិញ រដ្ឋអំណាចចិនបានប្រតិកម្មឆ្លើយតប ជាថ្មីម្តងទៀតនៅពីថ្ងៃសុក្រទី១៨មេសា ដោយបដិសេធទាត់ចោលរាល់ការចោទប្រកាន់របស់រដ្ឋាភិបាលក្រុងក្រៀវ។ អ្នកនាំពាក្យក្រសួងការបរទេសចិន លោក លីន ជាន (Lin Jian) បានអះអាងថា ប្រទេសចិនពុំដែលបានផ្តល់អាវុធគ្រឿងសឹកចម្បាំងទៅឲ្យភាគីប្រទេសណាមួយដែលកំពុងមានជម្លោះនោះឡើយ ហើយគ្រឿងផ្គុំអាវុធដែលនាំចូលស្រុករុស្ស៊ីទៀតសោត គឺបាននាំចេញពីប្រទេសអាមេរិកនិងអឺរ៉ុប។ ពោលគឺមិននាំចេញពីចិនទេ។ អាស្រ័យហេតុនេះ ទើបមន្ត្រីជាន់ខ្ពស់ចិនដដែល បានច្រានចោលទាំងស្រុងចំពោះការចោទប្រកាន់របស់អ៊ុយក្រែន ដោយចិនតាស់តឿនអ៊ុយក្រែន ថាកុំបំពុលនិងពង្វក់ទស្សនៈមហាជន៕
ដោយ៖ហេង ឧត្តម/ RFI ខេមរភាសា
© រក្សាសិទ្ធិដោយ thmeythmey.com
