ប្រធានាធិបតីអាម៉េរិក លោក ដូណាល់ ត្រាំ បានបង្ហាញក្តីរំពឹងថា រុស្ស៊ី និងអ៊ុយក្រែនអាចឈានដល់កិច្ចព្រមព្រៀងសន្តិភាពមួយក្នុងសប្តាហ៍នេះ ហើយចាប់ផ្តើម«ធ្វើជំនួញធំ»ជាមួយអាម៉េរិក។

«ក្តីរំពឹងគឺថា រុស្ស៊ី និងអ៊ុយក្រែន នឹងឈានដល់កិច្ចព្រមព្រៀងសន្តិភាពក្នុងសប្តាហ៍នេះ។ បន្ទាប់មកប្រទេសទាំងពីរ នឹងចាប់ផ្តើមធ្វើជំនួញធំជាមួយអាម៉េរិក ដែលកំពុងរីកចម្រើនល្អ ហើយនឹងអាចទទួលបានប្រាក់ចំណេញយ៉ាងច្រើន»។ ប្រធានាធិបតី ដូណាល់ ត្រាំ បានសរសេរនៅលើបណ្តាញសង្គម Truth Social នៅថ្ងៃទី២០ ខែមេសា បែបនេះ។ 

លោក ត្រាំ ​មិន​បាន​ចែករំលែក​ព័ត៌មាន​បន្ថែម​ អំពី​កិច្ចចរចា​សន្តិភាព​ដែល​ដឹកនាំ​ដោយ​ អាម៉េរិក រវាង​រុស្ស៊ី ​និង​អ៊ុយក្រែន​ទេ។ ទីក្រុងមូស្គូ និងទីក្រុងកៀវ ក៏មិនបានប្រតិកម្មលើការ លើកឡើងរបស់ លោក ត្រាំ ដែរ។

ប្រធានាធិបតីអាម៉េរិកដាក់ការរំពឹងបែបនេះ ក្នុងបរិបទដែលរដ្ឋបាលអាម៉េរិកបានព្រមាននាប៉ុន្មានថ្ងៃថ្មីៗនេះថា ទីក្រុងវ៉ាស៊ីនតោនអាចបញ្ចប់តួនាទីរបស់ខ្លួនជាអ្នកសម្របសម្រួល ប្រសិនបើទីក្រុងម៉ូស្គូ និងក្រុងកៀវមិនបង្ហាញសញ្ញាច្បាស់លាស់នៃការចង់ឈានដល់កិច្ចព្រមព្រៀងសន្តិភាពក្នុងពេលឆាប់ៗនេះ។

លោក ត្រាំ បានបង្ហោះសារនេះចំថ្ងៃបុណ្យ Easter (ជា​ថ្ងៃបុណ្យ​យេស៊ូវ​គ្រីស្ទ​) នៅពេលដែលរុស្ស៊ីបានប្រកាសបទឈប់បាញ់រយៈពេល ៣០ម៉ោង មានរយៈពេលរហូតដល់ពាក់កណ្តាលអធ្រាត្រថ្ងៃទី២០ ខែមេសា (ម៉ោង៤ព្រឹក ថ្ងៃទី២១ ខែមេសា ម៉ោងនៅទីក្រុងភ្នំពេញ)។ ប្រធានាធិបតីរុស្ស៊ីលោក វ្ល៉ាឌីមៀ ពូទីន បាននិយាយថា ចលនារបស់អ៊ុយក្រែននៅដំណាក់កាលនេះ នឹងបង្ហាញពីការត្រៀមខ្លួនរបស់ទីក្រុងកៀវសម្រាប់ដំណោះស្រាយដោយសន្តិវិធី។

ប្រធានាធិបតីអ៊ុយក្រែនលោក វ៉ូឡូឌីមៀ ហ្សេលេនស្គី បានបញ្ជាក់ថា ក្រុងកៀវនឹងគោរពតាមបទឈប់បាញ់ ហើយបានស្នើពន្យារពេលលើសពីថ្ងៃទី២០ ខែមេសា។ ទោះបីជាយ៉ាងណា ក្រោយមករុស្ស៊ី និងអ៊ុយក្រែនបានចោទប្រកាន់គ្នាទៅវិញទៅមកថាបានរំលោភលើបទឈប់បាញ់។

ចាប់តាំងពីចូលកាន់តំណែងមក ប្រធានាធិបតីអាម៉េរិកបានចាត់វិធានការដើម្បីធ្វើឱ្យទំនាក់ទំនងជាមួយរុស្ស៊ីមានលក្ខណៈធម្មតាឡើងវិញ ដោយសង្កត់ធ្ងន់លើសក្តានុពលសម្រាប់ការបង្កើនកិច្ចសហប្រតិបត្តិការសេដ្ឋកិច្ចរវាងប្រទេសទាំងពីរក្នុងវិស័យមួយចំនួន។

រដ្ឋបាល ត្រាំ ក៏កំពុងជំរុញកិច្ចព្រមព្រៀង ដើម្បីទាញយកធនធានរ៉ែដ៏សំខាន់របស់អ៊ុយក្រែនជាសំណងសម្រាប់កញ្ចប់ជំនួយដែលផ្តល់ដល់ក្រុងកៀវ ដោយរដ្ឋបាលមុនរបស់លោក ចូ បៃឌិន អំឡុងពេលមានជម្លោះ។

នៅក្នុងសេចក្តីព្រាងដែលចុះហត្ថលេខាកាលពីខែកុម្ភៈ កិច្ចព្រមព្រៀងនេះនឹងអនុញ្ញាតឱ្យអាម៉េរិកទទួលបានអត្ថប្រយោជន៍ពីការកេងប្រវ័ញ្ចធនធានរបស់អ៊ុយក្រែន ប៉ុន្តែមិនបានភ្ជាប់មកជាមួយការធានាសុវត្ថិភាពច្បាស់លាស់សម្រាប់ក្រុងកៀវនោះទេ។ រដ្ឋាភិបាល​អ៊ុយក្រែន​តម្រូវ​ឱ្យ​ចូល​រួម​វិភាគទាន ៥០ភាគរយនៃ​ប្រាក់​ចំណូល​ដល់​មូលនិធិ​វិនិយោគ​កសាង​ជាតិ​ដែល​គ្រប់គ្រង​រួម​ដោយ​ក្រុង​វ៉ាស៊ីនតោន និង​ក្រុង​កៀវ។ យ៉ាងណាមិញ ការទាស់សម្តីគ្នារវាងលោក ត្រាំ អនុប្រធានាធិបតីអាម៉េរិក លោក JD Vance ជាមួយលោក ហ្សេលេនស្គី កាលពីថ្ងៃទី២៨ ខែកុម្ភៈ បានបណ្តាលឱ្យផែនការនេះបរាជ័យ។

អ៊ុយក្រែនបានប្រកាសកាលពីថ្ងៃទី១៦ ខែមេសាថា ខ្លួនបានកែសម្រួលធាតុមួយចំនួននៅក្នុងសេចក្តីព្រាងកិច្ចព្រមព្រៀងដើម្បីបង្កើនសក្តានុពលសេដ្ឋកិច្ចសម្រាប់ទាំងអ៊ុយក្រែន និងអាម៉េរិក ដោយនិយាយថា ភាគីទាំងពីរនឹងចុះហត្ថលេខាលើលិខិតនាពេលឆាប់ៗនេះ ប៉ុន្តែមិនបានលើកឡើងពីលទ្ធភាពនៃការកែតម្រូវទាក់ទងនឹងការធានាសន្តិសុខសម្រាប់ក្រុងកៀវនោះទេ៕