.jpg)
.jpg)
លោក ហ៊ុន ម៉ានី៖ ការងារវិភាគមុខងារ ជាឱកាសសន្សំថវិកាជាតិ បង្កើនប្រសិទ្ធភាពការងារស្ថាប័ន..!
- ថ្ងៃអង្គារ ទី២២ ខែមេសា ឆ្នាំ២០២៥ ម៉ោង ១:៥៩ នាទី រសៀល
លោកឧបនាយករដ្ឋមន្រ្តី ហ៊ុន ម៉ានី រដ្ឋមន្រ្តីក្រសួងមុខងារសាធារណៈ។ រូបភាពពីក្រសួងមុខងារសាធារណៈ។
ភ្នំពេញ៖ លោកឧបនាយករដ្ឋមន្រ្តី ហ៊ុន ម៉ានី លើកឡើងថា ការងារវិភាគមុខងារ ជាឱកាស ជាជាងបន្ទុក។ ឱកាសនេះ ជាឱកាសសន្សំសំចៃថវិកាជាតិ, ឱកាសលើកកម្ពស់សមត្ថភាពប្រកួតប្រជែងជាអន្តរជាតិ, ឱកាសលើកកម្ពស់ប្រសិទ្ធភាពការងារ និងស្ថាប័ន។ លោករដ្ឋមន្រ្តី លើកឡើងដូច្នេះនៅក្នុងសិក្ខាសាលាស្តីពី«ការពិនិត្យឡើងវិញ និងការវិភាគមុខងារ និងរចនាសម្ព័ន្ធនៃក្រសួងកិច្ចការនារី»។
ក្រោយចូលឆ្នាំខ្មែរបានបញ្ចប់ ក្រសួងមុខងារសាធារណៈ បន្តរៀបចំសិក្ខាសាលាពាក់ព័ន្ធនឹងការការពិនិត្យឡើងវិញ និងការវិភាគមុខងារ និងរចនាសម្ព័ន្ធនៃក្រសួងកិច្ចការនារី។ ក្នុងសិក្ខាសាលានេះ លោក ហ៊ុន ម៉ានី រដ្ឋមន្រ្តីក្រសួងមុខងារសាធារណៈ បានលើកឡើងថា សិក្ខាសាលាដែលរៀបចំកន្លងមកជាការផ្សព្វផ្សាយបន្ថែមនៃការធ្វើវិភាគមុខងារកន្លងមកជូនថ្នាក់ដឹកនាំ និងមន្ត្រីរាជការតាមបណ្តាក្រសួង ស្ថាប័ន។
បើតាមលោកឧបនាយករដ្ឋមន្រ្តី ការដែលថ្នាក់ដឹកនាំ និងក្រុមការងារបច្ចេកទេសធ្វើដំណើរតាមបណ្តាក្រសួង ស្ថាប័ននីមួយៗ គឺដើម្បីចែករំលែកព័ត៌មានឱ្យបានគ្រប់ជ្រុងជ្រោយ ចៀសវាងការភ័ន្តច្រឡំនានា។ លោក បន្តថា៖«ការវិភាគមុខងារមិនមែនជាយន្តការវះកាត់ ឬប៉ះពាល់ដល់ប្រយោជន៍មន្ត្រីដែលមានចែងក្នុងច្បាប់ជាធរមាននោះទេ»។
តាមរយៈសិក្ខាសាលាខាងលើ គឺជាបង្ហាញពីភាពចំបាច់នៃការវិភាគមុខងារ។ សម្រាប់លោក ហ៊ុន ម៉ានី ការវិភាគមុខងារជាកិច្ចការសំខាន់ក្នុងការកែទម្រង់រដ្ឋបាលសាធារណៈ ដែលរាជរដ្ឋាភិបាលកម្ពុជា បាន និងកំពុងបន្តធ្វើជាប្រចាំ។ «ការងារកែទម្រង់ មិនមែនជារឿងថ្មីនោះទេ គ្រាន់តែវិសាលភាពនៃការអនុវត្តក្នុងពេលបច្ចុប្បន្ន មានលក្ខណៈទូទាំងរាជរដ្ឋាភិបាលតែម្តង (Whole Government Approach)។»។ លោករដ្ឋមន្រ្តី បន្ថែមដូច្នេះ។
ទន្ទឹមនឹងនេះ សិក្ខាសាលានេះ ក៏ចង់បង្ហាញថា ការកែទម្រង់រដ្ឋបាលសាធារណៈ តាមរយៈការពិនិត្យឡើងវិញ និងការវិភាគមុខងារនិងរចនាសម្ព័ន្ធក្រសួង ស្ថាប័ន គឺជាឱកាស ជាជាងបន្ទុក។ លោក ហ៊ុន ម៉ានី ពន្យល់បែបនេះ៖«ឱកាសនេះ ជាឱកាសដែលក្រសួង ស្ថាប័ន បានពិភាក្សា ផ្លាស់ប្តូរយោបល់គ្នា ចូលរួមដោះស្រាយ ដើម្បីលើកកម្ពស់ និងកែលម្អរចនាសម្ព័ន្ធ និងមុខងារអនុវត្តនៅក្រសួង ស្ថាប័ន នីមួយៗ។ ឱកាសនេះ ជាឱកាសសន្សំសំចៃថវិកាជាតិ, ឱកាសលើកកម្ពស់សមត្ថភាពប្រកួតប្រជែងជាអន្តរជាតិ, ឱកាសលើកកម្ពស់ប្រសិទ្ធភាពការងារ និងស្ថាប័ន, ឱកាសពង្រឹងបន្ថែមជវភាពប្រព័ន្ធតួអង្គតែមួយ និងឱកាសបម្រើសេវាជូនប្រជាពលរដ្ឋកាន់តែប្រសើរ»។
សូមបញ្ជាក់ថា គិតត្រឹមថ្ងៃទី២១ ខែមេសា ក្រសួងមុខងារសាធារណៈ បានសហការជាមួយក្រសួងស្ថាប័ន ដើម្បីរៀបចំសិក្ខាសាលាស្តីពី «ការពិនិត្យឡើងវិញ និងការវិភាគមុខងារ និងរចនាសម្ព័ន្ធនៃក្រសួង ស្ថាប័ន» បានចំនួន២១ដង។ នេះបើតាមក្រសួងមុខងារសាធារណៈ៕
© រក្សាសិទ្ធិដោយ thmeythmey.com
Tag:
