.jpg)
.jpg)
គ.វ.រ.បន្តប្រមូលធាតុចូល លើសេចក្ដីព្រាងអនុក្រឹត្យស្ដីពីប្រព័ន្ធលើកទឹកចិត្តគាំទ្រសមិទ្ធកម្មក្នុងរដ្ឋបាលសាធារណៈ
- ថ្ងៃព្រហស្បតិ៍ ទី២៤ ខែមេសា ឆ្នាំ២០២៥ ម៉ោង ៧:៥៩ នាទី ព្រឹក
រូបភាពពីក្រសួងមុខងារសាធារណៈ
ភ្នំពេញ៖ លេខាធិការដ្ឋាននៃគណៈកម្មាធិការជាតិជំរុញការអនុវត្តវិធានការគន្លឹះ ក្នុងការកែទម្រង់រដ្ឋបាលសាធារណៈរបស់រាជរដ្ឋាភិបាល នីតិកាលទី៧នៃរដ្ឋសភា (គ.វ.រ.) បានបន្តបើកកិច្ចប្រជុំដើម្បីពិនិត្យ ពិភាក្សា ប្រមូលធាតុចូល និងផ្ដល់មតិយោបល់លើសេចក្ដីព្រាងអនុក្រឹត្យស្ដីពីប្រព័ន្ធលើកទឹកចិត្តគាំទ្រសមិទ្ធកម្មក្នុងរដ្ឋបាលសាធារណៈ។ បើតាមក្រសួងមុខងារសាធារណៈ កិច្ចប្រជុំនេះ គឺដើម្បីប្រមូលធាតុចូលចុងក្រោយ និងរៀបចំជាឯកសាររបាយការណ៍ជូនសម្ដេចនាយករដ្ឋមន្ត្រី ពិនិត្យ និងសម្រេច។
នៅថ្ងៃទី២២ ខែមេសា លោក ហ៊ុន ម៉ានី អនុប្រធានប្រចាំការនៃគណៈកម្មាធិការជាតិជំរុញការអនុវត្តវិធានការគន្លឹះក្នុងការកែទម្រង់រដ្ឋបាលសាធារណៈរបស់រាជរដ្ឋាភិបាលនីតិកាលទី៧នៃរដ្ឋសភា បានដឹកនាំកិច្ចប្រជុំលេខាធិការដ្ឋាន ដើម្បីពិនិត្យ ពិភាក្សា ប្រមូលធាតុចូល លើសេចក្ដីព្រាងអនុក្រឹត្យស្ដីពីប្រព័ន្ធលើកទឹកចិត្តគាំទ្រសមិទ្ធកម្មក្នុងរដ្ឋបាលសាធារណៈ។ កិច្ចប្រជុំនេះ មានការចូលរួមពីមន្រ្តីជាន់ខ្ពស់ រដ្ឋមន្រ្តី រដ្ឋលេខាធិការ អនុរដ្ឋលេខាធិការ និងអភិបាលខេត្ត ប្រមាណ ១១០នាក់។
បើតាមក្រសួងមុខងារសាធារណៈ កិច្ចប្រជុំខាងលើនេះ គឺជាការប្រមូលធាតុចូលបន្ថែមទៀតក្នុងកម្រិតលេខាធិការដ្ឋាន គ.វ.រ. ដើម្បីប្រមូលធាតុចូលចុងក្រោយ និងរៀបចំជាឯកសារនិងរបាយការណ៍ជូន សម្ដេចនាយករដ្ឋមន្ត្រី ពិនិត្យ និងសម្រេច។ នាពេលកន្លង សេចក្ដីព្រាងអនុក្រឹត្យស្ដីពីប្រព័ន្ធលើកទឹកចិត្តគាំទ្រសមិទ្ធកម្មក្នុងរដ្ឋបាលសាធារណៈនេះ បានឆ្លងកាត់កិច្ចប្រជុំបច្ចេកទេសជាច្រើនដំណាក់កាល។
កិច្ចប្រជុំកន្លងមក រួមមានកិច្ចប្រជុំកម្រិតក្រុមការងារបច្ចេកទេសចំនួន ៩លើក, កិច្ចប្រជុំកម្រិតថ្នាក់ដឹកនាំនៃក្រសួងមុខងារសាធារណៈចំនួន ៤លើក, កិច្ចប្រជុំកម្រិតអនុគណៈកម្មការប្រតិបត្តិនៃលេខាធិការដ្ឋាន គ.វ.រ. ចំនួន ២លើក និងកិច្ចប្រជុំកម្រិតអន្តរក្រសួង ដែលមានការចូលរួមពីគ្រប់ក្រសួង ស្ថាប័ន និងការដ្ឋានកែទម្រង់ទាំង៥ របស់រាជរដ្ឋាភិបាលចំនួន ១លើក។
សូមបញ្ជាក់ថា ដើម្បីអនុវត្តកម្មវិធីកែទម្រង់រដ្ឋបាលសាធារណៈ គណៈកម្មាធិការជាតិជំរុញការអនុវត្តវិធានការគន្លឹះ បានដាក់ឱ្យវិធានការគន្លឹះចំនួន ៣ រួមមាន ការដាក់ឱ្យអនុវត្តប្រព័ន្ធជ្រើសរើសមន្រ្តីចូលបម្រើការងារប្រកបដោយគុណាធិបតេយ្យ តម្លាភាព យុត្តិធម៌ និងប្រសិទ្ធភាព, ការពង្រឹងសមត្ថភាព និងសមិទ្ធកម្មស្ថាប័ន ដើម្បីលើកកម្ពស់គុណភាពការងារប្រកបដោយវិន័យ សីលធម៌ វិជ្ជាជីវៈ ប្រសិទ្ធភាព និងស័ក្តិសិទ្ធិភាព និងការដាក់ឱ្យអនុវត្តប្រព័ន្ធលើកទឹកចិត្តគាំទ្រសមិទ្ធកម្មក្នុងរដ្ឋបាលសាធារណៈ ប្រកបដោយសង្គតិភាព សមធម៌ ប្រសិទ្ធភាព និងចីរភាព៕
© រក្សាសិទ្ធិដោយ thmeythmey.com
Tag:
