ភ្នំពេញ៖ លោក ឡាំ ជា រដ្ឋមន្រ្តី​ទទួល​បន្ទុក​រដ្ឋលេខាធិការ​ដ្ឋាន​កិច្ច​ការ​ព្រំដែន បាន​ឱ្យដឹងថា បន្ទាប់ពី​វិភាគមុខងារ និងរចនាសម្ព័ន្ធ រដ្ឋលេខាធិការដ្ឋានមានមុខងារស្នូលចំនួន៣ និងមុខងាររងចំនួន២៤ ដែល​បានបែងចែកជា២ គឺមុខងារគាំទ្រមានចំនួន៨ និងមុខងារជំនាញមានចំនួន១៦។ លោក​រដ្ឋមន្រ្តី លើក​ឡើងដូច្នេះ នៅក្នុង​សិក្ខាសាលា​ស្តីពី«ការពិនិត្យឡើងវិញ ការវិភាគមុខងារនិងរចនាសម្ព័ន្ធរដ្ឋលេខាធិការដ្ឋានកិច្ចការព្រំដែន»។

ក្នុង​នីតិកាលទី​៧ នៃ​រដ្ឋ​សភា រាជរដ្ឋាភិបាលកម្ពុជា បាន​កំណត់​ស្នូល​នៃ​យុទ្ធសាស្រ្ត​បញ្ចកោណ​ គឺ​ការ​ធ្វើ​ទំនើប​កម្ម​ស្ថាប័ន​រដ្ឋ​ឱ្យ​ក្លាយ​ជា​រដ្ឋបាល​សាធារណៈ​ទំនើប​ប្រកបដោយ​សមត្ថ​ភាព​ខ្ពស់​ ខ្លាំង វៃឆ្លាត និង​ស្អាតស្អំ។ ដើម្បី​សម្រេច​បាន​នូវ​ចក្ខុវិស័យខាងលើ រដ្ឋាភិបាល បាន​ជំរុញឱ្យ​ក្រសួង​​ ស្ថាប័ន ធ្វើការ​ពិនិត្យឡើងវិញ ការវិភាគមុខងារ និងរចនាសម្ព័ន្ធ។ 

ជាក់ស្ដែង​ រដ្ឋ​លេខាធិការ​ដ្ឋាន​កិច្ច​ការ​ព្រំដែន ដែលជា​សេនាធិការ​រដ្ឋាភិបាល បាន​សម្រេច​បេសកកម្ម​របស់​ខ្លួន​តាម​រយៈ​ការ​វិភាគមុខងារ និង​រចនា​សម្ព័ន្ធ ស្រប​តាម​ការ​ណែនាំ​របស់​ប្រមុខរាជរដ្ឋាភិបាលកម្ពុជា។ ក្នុង​សិក្ខាសាលា​ក្រោម​អធិបតី​ភាព​លោក ហ៊ុន ម៉ានី រដ្ឋមន្រ្តីក្រសួង​មុខងារសាធារណៈ លោក ឡាំ ជា រដ្ឋមន្រ្តី​ទទួល​បន្ទុក​រដ្ឋលេខាធិការដ្ឋាន​កិច្ច​ការ​ព្រំដែន បាន​លើក​ឡើងថា រដ្ឋលេខាធិការដ្ឋានកិច្ចការព្រំដែន បានយកចិត្តទុកដាក់ខ្ពស់បំផុត ប្រកបដោយបុរេសកម្ម និងភាពប្រទាក់ក្រឡាគ្នា លើការកែទម្រង់ដ៏ស៊ីជម្រៅ និងការលើកកម្ពស់សមត្ថភាពស្ថាប័ន ដើម្បីឈានសម្រេចបានជោគជ័យ។

លោក ឡាំ ជា រដ្ឋមន្រ្តីទទួលបន្ទុករដ្ឋលេខាធិការដ្ឋានកិច្ចការព្រំដែន 

«ការរៀបចំ និងការប្រព្រឹត្តទៅរបស់រដ្ឋលេខាធិការដ្ឋានកិច្ចការព្រំដែន បានចេញជាសមិទ្ធផល និងជាផ្លែផ្កានៃការវិភាគមុខងារ និងរចនាសម្ព័ន្ធមុនគេបង្អស់ ជាមួយក្រសួងមុខងារសាធារណៈ តាមរយៈការសហការអនុវត្តការងារ ២ដំណាក់កាល»។ នេះ​ជាការ​រៀបរាប់​របស់​លោក ឡាំ ជា ដោយ​បន្តថា ដំណាក់កាលទី១ គឺដំណាក់កាលនៃការវិភាគមុខងារមុនពេលទទួលបានការឯកភាពពីរាជរដ្ឋាភិបាល លើអនុក្រឹត្យស្តីពីការរៀបចំនិងការប្រព្រឹត្តទៅរបស់រដ្ឋលេខាធិការដ្ឋាន។ ដំណាក់កាលនេះ ត្រូវបានធ្វើឡើងដើម្បីបញ្ចៀសរាល់ការត្រួតជាន់គ្នាជាមួយក្រសួង ស្ថាប័ន នៃការកំណត់តួនាទីស្នូល និងតួនាទីជាក់លាក់នៃរដ្ឋលេខាធិការដ្ឋាន។

បើតាម​រដ្ឋមន្រ្តីរូបនេះ ដំណាក់កាលទី២ ជាដំណាក់កាលក្រោយពីអនុក្រឹត្យស្តីពី ការរៀបចំនិងការប្រព្រឹត្តទៅរបស់រដ្ឋលេខាធិការដ្ឋានកិច្ចការព្រំដែន ដែល​ទទួលបានការឯកភាពពីកិច្ចប្រជុំពេញអង្គរបស់គណៈរដ្ឋមន្ត្រី។ លោក ឡាំ ជា បង្ហាញ​លទ្ធផល​ដូច្នេះ៖ «ជាលទ្ធផលនៃការវិភាគមុខងារ និងរចនាសម្ព័ន្ធជាបន្តបន្ទាប់នេះ រដ្ឋលេខាធិការដ្ឋានមានមុខងារស្នូលចំនួន៣ និងមុខងាររងចំនួន២៤ ត្រូវបានបែងចែកជា២ គឺមុខងារគាំទ្រមានចំនួន៨ និងមុខងារជំនាញមានចំនួន១៦។»។

លោកឧបនាយករដ្ឋមន្រ្តី ហ៊ុន ម៉ានី រដ្ឋមន្រ្តីក្រសួង​មុខងារសាធារណៈ។

ការពិនិត្យឡើងវិញ និងការវិភាគមុខងារ និងរចនាសម្ព័ន្ធ មិនមែនជារឿងថ្មីនោះទេ តែជាការបន្តអនុវត្តការងារក្នុងបរិបទការងារថ្មី ដែលក្រសួង ស្ថាប័ននីមួយៗ គឺជាម្ចាស់នៃការងារ សំដៅដល់ការសម្រេចគោលនយោបាយកែទម្រង់រដ្ឋបាលសាធារណៈ របស់រាជរដ្ឋាភិបាល។ ចំពោះកិច្ចការវិភាគមុខងារនេះ ក្រសួងមុខងារសាធារណៈ មានភារកិច្ចជាអ្នកជួយសម្របសម្រួល តាមដានការអនុវត្ត  និងផ្តល់ការគាំទ្រទាំងក្របខណ្ឌបច្ចេកទេស ឬការបំពេញបន្ថែមនានាតាមការចាំបាច់របស់ក្រសួង ស្ថាប័ននីមួយៗ។

សូមបញ្ជាក់ថា ការពិនិត្យឡើងវិញ និងការវិភាគមុខងារ និងរចនាសម្ព័ន្ធនេះ ត្រូវបានចេញដោយរាជរដ្ឋាភិបាល នីតិកាលទី៧ នៃរដ្ឋសភា ក្នុងទិសដៅលើកកម្ពស់ដំណើរការនៃក្រសួង ស្ថាប័នឱ្យកាន់តែមានប្រសិទ្ធភាព និងស័ក្តិសិទ្ធិភាព ក្នុងក្របខណ្ឌនៃការបំពេញមុខងារ និងបេសកកម្មរបស់ខ្លួន៕