ភ្នំពេញ៖ សិស្ស-និស្សិត អាចដាក់ពាក្យចូលរួមប្រកួតប្រជែងថ្នាក់ជាតិផ្នែកសន្តិសុខសាយប័រប្រចាំឆ្នាំ ២០២៥(Cambodia National Cybersecurity Competition 2025) ដែលរៀបចំដោយក្រសួងប្រៃសណីយ៍ និងទូរគមនាគមន៍ នាថ្ងៃទី១៨ ខែឧសភា។  ការប្រកួតនេះ គឺដើម្បីជ្រើសរើសបេក្ខភាពឆ្នើមចំនួន ៤រូប តំណាងឱ្យកម្ពុជា ទៅចូលរួមប្រកួតវគ្គអាស៊ាន និងវគ្គអាស៊ានសាយប័រស៊ីហ្គេម នៅប្រទេសថៃ។

ក្រសួងប្រៃសណីយ រៀបចំការប្រកួតប្រជែងនេះឡើង ដើម្បីជ្រើសរើសបេក្ខភាពឆ្នើមចំនួន ៤រូប តំណាងប្រទេសកម្ពុជា សម្រាប់ចូលរួមប្រកួតវគ្គអាស៊ាន (ASEAN ROUND) និងវគ្គអាស៊ានសាយប័រស៊ីហ្គេម (ASEAN Cyber SEA Game) ដែលរៀបចំដោយមជ្ឈមណ្ឌលអាស៊ាន-ជប៉ុន សម្រាប់កសាងសមត្ថភាពសន្តិសុខសាយប័រ ASEAN-Japan Cybersecurity Capacity Building Centre (AJCCBC) នៅប្រទេសថៃ។

ការប្រកួតថ្នាក់ជាតិផ្នែកសន្តិសុខសាយប័រប្រចាំឆ្នាំ២០២៥ ជាកម្មវិធីប្រកួតប្រជែងលក្ខណៈបុគ្គលដោយតម្រូវឱ្យអ្នកចូលរួមដោះស្រាយបញ្ហាសន្តិសុខសាយប័រ (Cybersecurity Challenges) ទៅលើដែន។ ដូចជា៖​ វិស្វកម្មបញ្ច្រាស (Reverse Engineering) គ្រីបតូក្រាហ្វី (Cryptography) សន្តិសុខគេហទំព័រ (Web Security) កោសល្យវិច័្ចយ (Forensics) ឬការវាយប្រហារលើកម្មវិធីប្រព័ន្ធ Binary(Binary Exploitation) ជាដើម ដោយស្វែងរកបំណែកនៃព័ត៌មានហៅថា «Flag» ដែលលាក់នៅក្នុងលំហាត់នីមួយៗ។ 

​បេក្ខភាពដែលអាចចូលរួមប្រកួតប្រជែងក្នុងកម្មវិធីខាងលើបានត្រូវមានអាយុក្រោម ២៥ ឆ្នាំ (ស្ត្រី និងជនពិការត្រូវបានលើកទឹកចិត្តក្នុងការដាក់ពាក្យ), ការចូលរួមប្រកួតជាលក្ខណៈបុគ្គល, ត្រូវបំពេញព័ត៌មាន និងទម្រង់បែបបទចូលរួមប្រកួតឱ្យបានត្រឹមត្រូវ និងពេញលេញ និងត្រូវគោរព និងអនុវត្តតាមលក្ខខណ្ឌនៃការប្រកួត។ បេក្ខជន បេក្ខនារីទាំងអស់ ត្រូវដាក់ពាក្យចូលរួមការប្រកួតប្រជែងបានតាមរយៈតំណភ្ជាប់ go.gov.kh/mptc/cncc2025  រហូតដល់ថ្ងៃទី១០ ខែឧសភា។​

បើតាមក្រសួងប្រៃសណីយ៍​ បេក្ខជន បេក្ខនារីទាំងអស់ នឹងត្រូវឆ្លងកាត់ការជម្រុះតាមប្រព័ន្ធអនឡាញ នៅថ្ងៃទី១៣ ខែឧសភា ឆ្នាំ២០២៥។ ពោល តាមរយៈវគ្គជម្រុះនេះ គឺក្រសួង យកតែបេក្ខជន បេក្ខនារីចំនួន១០០រូបប៉ុណ្ណោះ នៅកម្មវិធីប្រកួតប្រជែងថ្នាក់ជាតិផ្នែកសន្តិសុខសាយប័រប្រចាំឆ្នាំ ២០២៥ ដែលនឹងប្រព្រឹត្តទៅនៅថ្ងៃទី១៨ ខែឧសភា ឆ្នាំ២០២៥។

ក្នុងដំណើរការនៃការប្រកួតនេះ ក្រសួងប្រៃសណីយ៍នឹងជ្រើសរើសបេក្ខជនជ័យលាភីចំនួន ៥រូប ក្នុងចំណោមបេក្ខភាពទាំង១០០រូប ដែលបានចូលរួមក្នុងការប្រកួត ដើម្បីទទួលបានមេដាយ និងរង្វាន់លើកទឹកចិត្ត។ ក្នុងនោះ ជ័យលាភីលេខ ១ នឹងទទួលបានថវិកាចំនួន ២លានរៀល, លេខ ២ ទទួលបាន ១,៥លានរៀល ,លេខ ៣ នឹងទទួលបានថវិកា១លានរៀល, លេខ ៤ និងលេខ ៥ ទទួលបានថវិកាក្នុងម្នាក់៥០ម៉ឺនរៀល។

ចូលដល់វគ្គទី២ ក្រសួងប្រៃសណីយ៍ នឹងជ្រើសរើសបេក្ខជនបេក្ខនារីចំនួន ១៥រូបបន្ថែម ពីលើបេក្ខជនជ័យលាភីចំនួន៥រូបខាងលើ ដើម្បីទទួលបានការបណ្ដុះបណ្ដាល និងពង្រឹងជំនាញបច្ចេកទេសផ្នែកសន្តិសុខសាយប័រពីគ្រូបង្គោលរយៈពេល ៤ខែ សម្រាប់ត្រៀមខ្លួនក្នុងការប្រកួតវគ្គបន្ទាប់។

រហូតដល់វគ្គទី៣  បេក្ខជន-បេក្ខនារីឆ្នើមចំនួន៤រូប ក្នុងចំណោមបេក្ខភាពទាំង២០រូបនេះនឹងត្រូវជ្រើសរើសដោយការប្រឡងតេស្តសមត្ថភាព ដើម្បីក្លាយជាអ្នកតំណាងកម្ពុជាចូលរួមប្រកួតប្រជែងក្នុងថ្នាក់តំបន់ នៅប្រទេសថៃ៕