លោកឧបនាយករដ្ឋមន្ត្រី ស សុខា រដ្ឋមន្ត្រីក្រសួងមហាផ្ទៃ បាន​ដាក់ផែន​ការ​ស្តីពី​ការការពារសន្តិសុខ សុវត្ថិភាពជូនវិនិយោគិន និងអ្នក​ទេសចរបរទេស ដើម្បីបង្ក​លក្ខណៈអំណោយ​ផល​ដល់ការវិនិយោគ និង​វិស័យទេសចរណ៍ ដែលរួមចំណែក​យ៉ាងសំខាន់​ក្នុងការ​បង្កើតការងារជូនពលរដ្ឋ​និង​បង្កើន​ចំណូល​ថវិកាជាតិ។ ទាក់ទងនឹង​បញ្ហា​នានា លោកណែនាំ​អង្គភាពក្រោមឱវាទឱ្យឆាប់​ដោះស្រាយ​តាំងពីរឿងហេតុតូចតាច ឬទើបកើតឡើង ដោយមិនត្រូវទុក​ឱ្យមានការអូស​បន្លាយពេល ឬក្លាយជាទៅរឿងស្មុគស្មាញឡើយ។

តាម​លិខិត​ដែល​ចុះហត្ថលេខា កាលពីថ្ងៃទី​៨ ខែមេសា លោក ស សុខា បានគូសបញ្ជាក់ថា ការដាក់ផែនការនេះ គឺដើម្បីរួមចំណែកក្នុងការទាក់ទាញវិនិយោគិន និងទេសចរបរទេសឱ្យចូលមកបណ្តាក់ទុនក៏ដូចជាធ្វើទស្សនកិច្ចនៅកម្ពុជាកាន់តែច្រើនឡើង។

រដ្ឋមន្ត្រីមហាផ្ទៃ​ចង់​ឱ្យ​វិនិយោគិន និងទេសចរបរទេស ទទួល​បាននូវ​ភាពកក់ក្តី​ចំពោះ​បរិយាកាសសន្តិសុខ សណ្តាប់​សាធារណៈ​ ជាពិសេស​សុវត្ថិភាព ពេញទី នា​ពេល​ធ្វើធុរកិច្ច និងទស្សនកិច្ច​នៅ​កម្ពុជា។

ជាមួយគ្នានេះ លោក​ណែនាំ​មន្ត្រីក្រោមឱវាទ​ឱ្យមានភាពម្ចាស់ការ​ក្នុងការ​ក្តាប់ព័ត៌មានដែលបង្កប់ឱបាយកល និងជះឥទ្ធិពល​អាក្រក់​ដល់​វិស័យ​វិនិយោគ និងទេសចរណ៍, ការពារឱ្យបាន​នូវ​សុវត្ថិភាពផ្ទាល់ខ្លួន​របស់​វិនិយោគិនបរទេស បុគ្គលិករដ្ឋបាល អ្នក បច្ចេកទេស និងអ្នកទេសចរបរទេស រួមទាំង​ សុវត្ថិភាពរាល់ទីតាំងវិនិយោគ រាល់ទ្រព្យសម្បត្តិស្របច្បាប់ និងរាល់គោលដៅទេសចរណ៍ទាំងអស់។

លោក ស សុខា ណែនាំឱ្យ​នគរបាលទេសចរណ៍បង្កើតបញ្ជរទទួលពាក្យបណ្ដឹងចល័តនៅតាមតំបន់ទេសចរណ៍សំខាន់ៗ ដើម្បីទទួលបណ្ដឹង និងដោះស្រាយបញ្ហារបស់វិនិយោគិន និងទេសចរបរទេសបានទាន់ពេលវេលា។ 

លោកក៏បាន​លើកឡើង​ផងដែរពី​ការ​ជំរុញ​ការអនុវត្ត​គោលនយោបាយ​ “ភូមិ-ឃុំ-សង្កាត់ មានសុវត្ថិភាព”, ការ​តម្លើងផែនទីកំណត់គោលដៅគម្រោងវិនិយោគរោងចក្រ សហគ្រាស កសិដ្ឋាន ការដ្ឋាននានា, កម្មវិធីជួបប្រជុំជារៀងរាល់ខែជាមួយវិនិយោគិន ឬតំណាងទាក់ទង​នឹងសភាពការណ៍សន្តិសុខ សណ្តាប់ធ្នាប់, ការ​បង្កើតយន្តការទាក់ទងតាមប្រព័ន្ធទូរសព្ទ និងប្រព័ន្ធ​អេឡិចត្រូនិក, ការកំណត់​ឱ្យក្រុមហ៊ុន​សន្តិសុខឯកជន​សហការជាមួយ​អាជ្ញាធរមានសមត្ថកិច្ច ក៏ដូចជា​ការតម្រូវឱ្យ​អគ្គនាយកដ្ឋានអន្តោប្រវេសន៍ផ្សព្វផ្សាយ​ព័ត៌មាននានាជូនភ្ញៀវ និងវិនិយោគិន​បរទេស។

ក្នុងករណីមានការវិវាទផ្សេងៗ ឬហេតុការណ៍ណាមួយកើតឡើង លោក ស សុខា ឱ្យ​គណៈបញ្ជាការឯកភាពរដ្ឋបាល រាជធានី ខេត្ត រួសរាន់ចាត់ឱ្យមានយន្តការដែលមានតួនាទីទទួលខុសត្រូវចុះទៅកាន់គោលដៅនោះ ដើម្បីសហការដោះស្រាយជាបន្ទាន់ តាំងពីរឿងហេតុតូចតាច ឬទើបតែកើតមានឡើងដោយមិនទុកឱ្យមានការអូសបន្លាយពេល ឬក្លាយទៅជាស្មុគស្មាញបាន។

អំពី​វិធានការការពារ​ទេសចរ លោក​តម្រូវឱ្យ​មានភាពហ្មត់ចត់ គ្រប់ជ្រុងជ្រោយ ដោយមិនទុក​ឱ្យមានភាពចន្លោះប្រហោងនោះឡើយ ក្នុងនោះ​នគរបាល​ទេសចរណ៍​ត្រូវ​សហការជាមួយភ្នាក់ងារទេសចរណ៍ ម្ចាស់​សណ្ឋាគារ​ អាផាតមិន ផ្ទះសំណាក់ ផ្ទះជួល ភោជនីយដ្ឋាន ខារ៉ាអូខេ ក្លឹបរាត្រី PUB បៀហ្គាដិន ហាងម៉ាស្សា អាជីវកម្មផ្លូវទឹក ព្រមទាំងទីកន្លែងកម្សាន្តសប្បាយផ្សេងៗទៀតដើម្បីក្តាប់សភាពការណ៍សន្តិសុខ សណ្តាប់ធ្នាប់ គ្រប់ទីកន្លែង។

ការ​រៀបចំប្រព័ន្ធ​កត់ត្រាវត្តមាន​ជន​បរទេស​តាម​បច្ចេកវិទ្យាទំនើប, ការគ្រប់គ្រងក្រុមហ៊ុន និងអ្នកធ្វើអាជីវកម្មដឹកអ្នកទេសចរណ៍, ការពង្រឹងវិធានការ​ការពារសន្តិសុខតាមបណ្តាកាស៊ីណូស្របច្បាប់, ការបំផុស​ចលនាពលរដ្ឋឱ្យចូលរួមការពារ សន្តិសុខ និងសុវត្ថិភាព ជូនភ្ញៀវទេសចរ, សណ្តាប់ធ្នាប់​តាម​បណ្តាអាកាសយានដ្ឋានអន្តរជាតិ កំពង់ផែអន្តរជាតិ ច្រកទ្វារ ព្រំដែនអន្តរជាតិ និងច្រកទ្វារព្រំដែនទ្វេភាគីសំខាន់ៗ, ការរៀបចំប្រព័ន្ធ Hotline, យន្តការសង្គ្រោះ សុទ្ធតែជាចំណុចដែល​លោក ស សុខា បាន​លើកឡើង។

ក្នុង​ផែនការណែនាំ លោក ស សុខា តម្រូវឱ្យគណៈបញ្ជាការឯកភាពរដ្ឋបាលរាជធានី ខេត្ត អគ្គស្នងការដ្ឋាននគរបាលជាតិ និង អគ្គនាយកដ្ឋានដែលមានការពាក់ព័ន្ធ ធ្វើរបាយការណ៍បូកសរុបជារៀងរាល់ខែ ជូនក្រសួងមហាផ្ទៃ ហើយ​ប្រគល់ភារកិច្ចជូនរដ្ឋលេខាធិការដែលទទួលកិច្ចការនេះ ដឹកនាំប្រជុំបូកសរុប ដកពិសោធន៍ លទ្ធផល នៃការអនុវត្តក្នុងក្របខណ្ឌទូទាំងប្រទេសរៀងរាល់ ៦ខែម្តង៕