.jpg)
.jpg)
សមាជិកគ្រួសារ៧នាក់ដែលពុលផ្សិតនៅស្រុកស្រែអំបិល ត្រូវបានបញ្ជូនមកព្យាបាលនៅភ្នំពេញ
- ថ្ងៃសុក្រ ទី២៥ ខែមេសា ឆ្នាំ២០២៥ ម៉ោង ៧:២៨ នាទី ល្ងាច
ភ្នំពេញ៖ សមាជិកគ្រួសារ៧នាក់ ដែលពុលផ្សិតនៅស្រុកស្រែអំបិល ខេត្តកោះកុង ត្រូវបានបញ្ជូនមកព្យាបាលនៅភ្នំពេញ។ ការសម្រេចបញ្ជូនមកព្យាបាលនៅភ្នំពេញនេះ ក៏ព្រោះតែពួកគេមានអាការៈពុលធ្ងន់ធ្ងរ រហូតមានអ្នកខ្លះសន្លប់ និងវង្វេងស្មារតី។ នេះបើតាមការលើកឡើងរបស់លោក សៅ សូនី ប្រធានការិយាល័យសុខាភិបាលស្រុកស្រែអំបិល។
គ្រួសារដែលពុលផ្សិតនៅស្រុកស្រែអំបិលនោះ រួមមានឪពុក ម្ដាយ និងកូន៥នាក់។ លោក សៅ សូនី បញ្ជាក់ថា ជនរងគ្រោះទាំង៧នាក់នេះ គឺបានបរិភោគសម្លរ ដែលមានផ្សិតពុល តាំងពីម៉ោង១១ព្រឹក អំឡុងពេលអាហារថ្ងៃត្រង់។ ២ម៉ោងបន្ទាប់មក ពោលនៅម៉ោង១រសៀល មួយគ្រួសារនេះ ត្រូវបានបញ្ជូនមកមន្ទីរពេទ្យបង្អែកស្រុកស្រែអំបិល។
បើតាមប្រធានការិយាល័យសុខាភិបាលស្រុកស្រែអំបិលរូបនេះ អាការៈអ្នកជំងឺទាំងនោះ គឺមានសភាពធ្ងន់ធ្ងរ ដោយឪពុកសន្លប់បាត់ស្មារតី ខណៈម្ដាយ និងកូនៗ៥នាក់ទៀត មានអាការៈវង្វេង និងក្អួត។ លោក សូនី បានរៀបរាប់ពីអាការៈដែលគ្រួសារខាងលើបានពុលផ្សិតមកកាន់សារព័ត៌មានឌីជីថលថ្មីៗ នាល្ងាចថ្ងៃទី២៥ ខែមេសា យ៉ាងដូច្នេះ៖ « ដោយសារគាត់ធ្ងន់ពេក ពុលដល់ថ្នាក់អត់ដឹងខ្លួន។ ស្ថានភាពប្ដីប្រពន្ធហ្នឹង ប្រពន្ធដឹងខ្លួន តែគាត់វង្វេង និយាយទៅគាត់ដូចអត់ដឹងអី។ កូនៗគាត់ចេញក្អួត ពុលដល់ថ្នាក់អត់ដឹងដូចគ្នា។ បើឪពុក គឺសន្លប់អត់ដឹងខ្លួនតែម្តង»។
យ៉ាងណាមិញ លោកប្រធានការិយាល័យសុខាភិបាលស្រុកស្រែអំបិលរូបនេះ ក៏មិនទាន់ដឹងច្បាស់ផ្សិតដែលគ្រួសារខាងលើបានបរិភោគពុលនោះ ជាប្រភេទផ្សិតអ្វីដែរ។ ប៉ុន្តែតាមការលើកឡើងរបស់អ្នកស្រុក ទំនងជាផ្សិតក្ងោក។
បើតាមលោក សូនី បច្ចុប្បន្នគ្រួសាររងគ្រោះបានបញ្ជូនមកសង្រ្គោះនៅភ្នំពេញហើយ ដោយឪពុក និងម្ដាយ បញ្ជូនទៅសង្រ្គោះនៅមន្ទីរពេទ្យសម្ដេច តេជោ និងកូនៗ៥នាក់ បញ្ជូនទៅព្យាបាលនៅមន្ទីរពេទ្យគន្ធបុប្ផា។ ក្នុងចំណោមគ្រួសារ៧នាក់ មានឪពុកអាយុ២៩ឆ្នាំ,ម្ដាយអាយុ២៧ឆ្នាំ,កូនស្រីអាយុ១២,កូនប្រុសអាយុ១១ឆ្នាំ,កូនប្រុសអាយុ១០ឆ្នាំ,កូនស្រីអាយុ៧ឆ្នាំ និងកូនប្រុសអាយុ៣ឆ្នាំផងដែរ៕
© រក្សាសិទ្ធិដោយ thmeythmey.com
