របបសឹកភូមាដែលបាន​សន្យា​ផ្អាក​ការវាយប្រហារបណ្តោះអាសន្ន​ ទៅលើក្រុមឧទ្ទាម បន្ទាប់ពីប្រទេស​បានជួប​គ្រោះរញ្ជួយដីនោះ គឺនៅតែ​បន្តការវាយ​ប្រហារដដែលទេ​។ នេះ​បើផ្អែកតាម​ព័ត៌មាន ​ប្រមូល​បានដោយ​ទីភ្នាក់ងារព័ត៌មាន​Reuters ចេញផ្សាយ​កាលពីថ្ងៃទី​២៥មេសា។ គ្រោះរញ្ជួយដីកាលពីថ្ងៃទី​២៨មីនា បាន​ផ្តាច់ជីវិតមនុស្ស​ប្រមាណ​៣៧០០នាក់នៅភូមា ហើយ​បច្ចុប្បន្ន​ ប្រជាជនភូមា​​​ប្រមាណ​៦ម៉ឺននាក់ ត្រូវរស់នៅក្នុងជំរកបណ្ដោះអាសន្ន​ ដោយសារផ្ទះសម្បែង​ត្រូវបាក់បែកអស់​។

កាលពីថ្ងៃទី​២​មេសា ពោលគឺ​៥ថ្ងៃ​ក្រោយរញ្ជួយដី របបសឹកភូមាបានប្រកាស​ផ្អាកការវាយប្រហារជាបណ្តោះអាសន្ន​ទៅលើ​ក្រុមឧទ្ទាម​ រយៈពេល​២០ថ្ងៃ​​ ដើម្បី​សម្រួល​ដល់​ការ​ជួយសង្គ្រោះ ក៏ដូចជាការ​ដឹកជញ្ជូនជំនួយ​មនុស្ស​ធម៌ ដល់ជនរងគ្រោះ​ដោយមហន្តរាយរញ្ជួយដី។ ហើយ​បន្ទាប់ពី​មាន​អន្តរាគមន៍ ពីលោកនាយករដ្ឋមន្ត្រី​​ម៉ាឡេស៊ី របបសឹកភូមា បានសុខចិត្ត​ពន្យារការ​ផ្អាក​ការវាយប្រហារនេះ ដល់ថ្ងៃទី​៣០មេសា​។

ក៏ប៉ុន្តែ ផ្អែកតាម​ព័ត៌មានប្រមូលបានដោយ​ទីផ្នាក់ងារព័ត៌មានReuters ដោយ​ផ្អែក​លើ​ការទិន្នន័យ​ផ្តល់​ឲ្យ​ដោយ Armed Conflict Location & Event Data Project (ACLED) គឺរបបសឹកភូមាបានបន្តវាយ​ប្រហារ​លើ​ក្រុមឧទ្ទាមដដែល ដោយ​មិនគោរពការសន្យារបស់ខ្លួនទេ​។ ទីភ្នាក់ងារព័ត៌មានReuters បានព្យាយាមទាក់ទងទៅកាន់​អ្នកនាំពាក្យ​របបសឹកភូមា ដើម្បីសុំការបំភ្លឺទៅនឹង​បញ្ហានេះ តែមិន​បានទទួលការឆ្លើយតបអ្វីទាំងអស់​។

របាយការណ៍ របស់​ACLED បានបង្ហាញថា ​រវាងពីថ្ងៃទី​២៨មីនា ថ្ងៃ​ដែលមានគ្រោះរញ្ជួយដី រហូតដល់ថ្ងៃទី​២៤មេសា គឺកងទ័ពនៃរបបសឹកភូមា​ បានបើកការវាយប្រហារ​ចំនួន​យ៉ាងហោច ២០៧លើក ដែលក្នុងនោះ មាន​១៤០លើកជាការវាយប្រហារបាញ់ប្លោងគ្រាប់ពីលើអាកាស និង​២៤លើក ជាការវាយប្រហារ​ដោយ​គ្រាប់កាំភ្លើងធំ។

ដោយឡែក ចន្លោះពីថ្ងៃទី​២ដល់ថ្ងៃ​១៨​មេសា គឺកងទ័ពជាតិភូមាបានបើកការវាយប្រហារជាមធ្យម ៩,៧ដង ហើយសម្លាប់ជីវិតមនុស្ស​ជាមធ្យម​ ៦នាក់​ក្នុងមួយថ្ងៃ​។ ចំណែក​ក្រុមឧទ្ទាម​ប្រឆាំងរបបសឹកវិញ បានវាយប្រហារតមវិញចំនួន​៣លើក តាមរយៈការប្រើដ្រូន ដោយសារតែគ្មានមធ្យោបាយធំដុំដូចកងទ័ពរបបសឹក ដូចជាយន្តហោះចម្បាំង ឬកាំភ្លើងធំជាដើម​។ ភាគច្រើននៃការវាយប្រហាររបស់​របបសឹកភូមា គឺកើតមាននៅ​តំបន់ Sagaing នៅ​រដ្ឋស្ហាន រដ្ឋរ៉ាឃីន និង​កាឈីនជាដើម​។ នេះបើផ្អែកតាម លោក Su Mon អ្នកវិភាគនៅ​ក្រុមការងារ ACLED។

យ៉ាងហោចណាស់ ការវាយប្រហារចំនួន​១៧២លើក បាន​កើតឡើងបន្ទាប់ពី​បទឈប់បាញ់​បណ្តោះអាសន្នចូលជាធរមាន ក្នុងនោះមាន​៧៣លើក ដែល​កងទ័ពរបបសឹកភូមាបានវាយប្រហារទៅលើតំបន់ដែលរងគ្រោះ​ដោយមហន្តរាយរញ្ជួយដី​។ លោក James Rodehaver មន្ត្រីទទួលបន្ទុក​ការិយាល័យសិទ្ធិមនុស្ស​នៃអង្គការសហប្រជាជាតិប្រចាំភូមា បាន​លើកឡើងថា របបសឹកភូមា​គ្មានធម៌មេត្តា បន្តវាយប្រហារ​ធ្វើ​ដូចជាគ្មានរឿងអ្វីកើតឡើង ទាំងដែលប្រជាជនខ្លួន​កំពុងរងទុក្ខវេទនា​ដោយសារគ្រោះរញ្ជួយដី។

សូមរំលឹកថា គ្រោះរញ្ជួយដី​កម្រិត៧,៧នៃកម្រិត​រិឆទឺ បានផ្តាច់ជីវិតប្រជាជន​ភូមា ប្រមាណ​៣៧០០នាក់ និងរបួសជាច្រើនពាន់នាក់ទៀត។ គិតត្រឹមថ្ងៃទី២៥មេសា មាន​មនុស្សយ៉ាងហោច​៦ម៉ឺននាក់ ដែល​រស់នៅក្រោមជំរកបណ្តោះអាសន្ន​ ខណៈរដូវភ្លៀងបានចាប់ផ្តើម​មកដល់​។ អង្គការសហប្រជាជាតិ​បានអំពាវនាវប្រមូលប្រាក់ ចំនួន​២៧៥លានដុល្លារបន្ថែមទៀត ដើម្បីជួយដល់ប្រជាជនភូមា។ 

អង្គការសហប្រជាជាតិអះអាងថា មុនមានគ្រោះរញ្ជួយដី ប្រជាជនភូមាប្រមាណ​៤លាន៣សែននាក់ ដែលត្រូវ​ការ​ជំនួយឧបត្ថម្ភបន្ទាន់ ដោយសារតែ​សង្គ្រាមស៊ីវីល។ តែចំនួននេះ បានកើនឡើង ២លាននាក់បន្ថែមទៀត បន្ទាប់មានគ្រោះរញ្ជួយដី​៕

ដោយ៖ ម៉ម ពិសី (RFI ខេមរភាសា)