.jpg)
.jpg)
សោកស្តាយ! សាលមហោស្រពខេត្តតាកែវដ៏ចំណាស់ រងការឆាបឆេះស្ទើរទាំងស្រុង
- ថ្ងៃអាទិត្យ ទី២៧ ខែមេសា ឆ្នាំ២០២៥ ម៉ោង ៤:១២ នាទី រសៀល
ភ្នំពេញ៖ សាលមហោស្រពតាកែវ ដែលមានអាយុកាលរាប់សិបឆ្នាំហើយនោះ បានរងការឆាបឆេះ នៅព្រឹកថ្ងៃទី២៧ ខែមេសា ឆ្នាំ២០២៥។ អគារដ៏ចំណាស់នេះ ស្ថិតក្នុងភូមិ១ សង្កាត់រកាក្នុង ក្រុងដូនកែវ ខេត្តតាកែវ។ បើតាមស្នងការដ្ឋាននគរបាលខេត្តតាកែវ អគិ្គភ័យឆេះសាលមហោស្រពនេះ បណ្ដាលមកពីទុស្សេខ្សែភ្លើង ហើយមិនបង្កឱ្យមានមនុស្សរងរបួសឡើយ។
បើតាមស្នងការដ្ឋាននគរបាលខេត្តតាកែវ ករណីអគ្គភ័យឆេះសាលមហោស្រពតាកែវនេះ បានកើតឡើងអំឡុងម៉ោង៨ព្រឹក ដោយសារទុស្សេខ្សែភ្លើង ស្របពេលដែលកំពុងរៀបចំកម្មវិធីប្រគល់សញ្ញាបត្រដល់សិស្សរបស់សាលាឯកជនមួយ។
អមដោយវីដេអូនៃអន្តរាគមន៍របស់កងកម្លាំងក្នុងការពន្លត់អគ្គិភ័យនេះ ទំព័រហ្វេសប៊ុកស្នងការដ្ឋាននគរបាលខេត្តតាកែវ បានរៀបរាប់ដូច្នេះ៖«សូមចូលរួមសោកស្ដាយផង កងកម្លាំងសមត្ថកិច្ចនគរបាលយើងខំប្រឹងហើយ តែស្ថានភាពភ្លើងឆាបឆេះលឿនពេក ដោយសារខាងក្នុងមហោស្រពតាកែវ មានអេប៉ុងបិតជុំវិញផ្ទៃជញ្ជាំង កៅអីពូក នឹងតំបូលពិដានសុទ្ធតែធ្វើអំពីឈើ។»។
យ៉ាងណា មនុស្សក្នុងសាលមានសិស្ស និងអាណាព្យាបាលសរុបជាង៥០០នាក់ ត្រូវបានសង្រ្គោះ និងជម្លៀសចេញពីសាលទាន់ពេលវេលា ហើយពុំមានបង្ករបួស ឬគ្រោះថ្នាក់ណាមួយឡើយ។ នេះបើតាមស្នងការដ្ឋាននគរបាលខេត្តតាកែវ។ ចំពោះសាលមហាស្រព ត្រូវបានឆេះស្ទើរទាំងស្រុង៕
© រក្សាសិទ្ធិដោយ thmeythmey.com
Tag:
