.jpg)
.jpg)
ក្រសួងពាណិជ្ជកម្ម ឱ្យពាណិជ្ជករដំណាំកាកាវ ចូលរួមពិព័រណ៍កាកាវនៅម៉ាឡេស៊ី
- ថ្ងៃចន្ទ ទី២៨ ខែមេសា ឆ្នាំ២០២៥ ម៉ោង ៨:៥៩ នាទី ព្រឹក
អ្នកផលិតសូកូឡាកំពុងបង្ហាញសកម្មភាពការផលិតសូកូឡា ក្នុងពិធីមុនការបើកពិព័រណ៍កាកាវអន្តរជាតិម៉ាឡេស៊ី ឆ្នាំ២០២៥។ ពិធីមុនព្រឹត្តិការណ៍នេះ ត្រូវបានធ្វើឡើងកាលពីខែមករា ឆ្នាំ២០២៥កន្លងទៅ។ រូបភាព៖ Malaysian International Cocoa Fair 2025
ក្រសួងពាណិជ្ជកម្ម បានជូនដំណឹងដល់សាធារណជន និងពាណិជ្ជករ ចាប់អារម្មណ៍លើដំណាំកាកាវ ឱ្យចូលរួម «ពិព័រណ៍កាកាវអន្តរជាតិម៉ាឡេស៊ី ឆ្នាំ២០២៥»។ ក្រុមប្រឹក្សាកាកាវម៉ាឡេស៊ី នឹងរៀបចំពិព័រណ៍នេះនៅថ្ងៃទី២៤ ដល់ថ្ងៃទី២៧ ខែឧសភា ឆ្នាំ២០២៥ខាងមុខនេះ នៅមជ្ឈមណ្ឌលសន្និបាតអន្តរជាតិសាបា ទីក្រុង Kota Kinabalu រដ្ឋ Saban ប្រទេសម៉ាឡេស៊ី។
ផលិតផលកាកាវ ជាវត្ថុដើមសំខាន់មួយ ក្នុងផលិតកម្មសូកូឡា ជាគ្រឿងផ្សំក្នុងគ្រឿងសម្អាង និងត្រូវបានយកទៅប្រើប្រាស់ក្នុងគោលបំណងផ្សេងៗទៀត។ប្រទេសម៉ាឡេស៊ី ជាប្រទេសដែលត្រូវបានគេស្គាល់ថាជាប្រទេសកែច្នៃ និងនាំចេញផលិតផលកាកាវសំខាន់មួយផងដែរ។
បើតាមក្រសួងពាណិជ្ជកម្មកម្ពុជា ព្រឹត្តិការណ៍ពិព័រណ៍អន្តរជាតិនេះ ជាវេទិកាសំខាន់មួយ ដែលប្រមូលផ្ដុំនូវអ្នកផលិតកាកាវ អ្នកកែច្នៃសូកូឡា និងអ្នកពាក់ព័ន្ធក្នុងអាជីវកម្មកាកាវ និងសូកូឡាទាំងក្នុង និងក្រុងប្រទេស ដើម្បីបង្កើតបង្កើតបណ្ដាញទំនាក់ទំនង និងស្វែងរកឱកាសអាជីវកម្មថ្មីៗក្នុងវិស័យកាកាវ។
ដើម្បីចូលរួមវេទិកានេះ សូមទំនាក់ទំនងបំពេញបែបបទចូលរួម តាមរយៈនាយកដ្ឋានកិច្ចការពិព័រណ៍ អគ្គនាយកដ្ឋានជំរុញពាណិជ្ជកម្ម នៃក្រសួងពាណិជ្ជកម្ម ដែលមានអាស័យដ្ឋានឡូត៍លេខ១៩-៦១ មហាវិថីសហព័ន្ធរុស្ស៊ី ភូមិទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ។
សម្រាប់ព័ត៌មានបន្ថែម សូមទំនាក់ទំនងទៅលេខទូរស័ព្ទ ០១២ ៧៧៧ ៩៥៩, ០១៧ ២៩៦ ៩៩២ ឬអ៊ីម៉ែល [email protected], [email protected]៕
© រក្សាសិទ្ធិដោយ thmeythmey.com
Tag:
.gif)