.png)
.png)
.jpg)
.jpg)
សម្តេច ហ៊ុន សែន នឹងទៅចូលរួមខួបលើកទី៥០នៃទិវាបង្រួបបង្រួមជាតិវៀតណាម
- ថ្ងៃចន្ទ ទី២៨ ខែមេសា ឆ្នាំ២០២៥ ម៉ោង ២:២៨ នាទី រសៀល
នៅថ្ងៃទី២៩-៣០ ខែមេសា សម្តេច ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា នឹងទៅប្រទេសវៀតណាម ដើម្បីចូលរួមខួបលើកទី៥០ នៃទិវារំដោះភាគខាងត្បូង និងការបង្រួបបង្រួមជាតិរបស់វៀតណាម តបតាមការអញ្ជើញរបស់ លោក តូ ឡឺម អគ្គលេខាធិការ នៃគណៈកម្មាធិការមជ្ឈិមបក្សកុម្មុយនីស្តវៀតណាម។
បើយោងតាមសេចក្តីប្រកាសព័ត៌មានរបស់អគ្គលេខាធិការដ្ឋានព្រឹទ្ធសភា ចុះថ្ងៃទី២៨ ខែមេសា ប្រតិភូអមដំណើរសម្តេច ហ៊ុន សែន ក្នុងទស្សនកិច្ចទៅកាន់ទីក្រុងហូជីមិញ ប្រទេសវៀតណាមនេះ រួមមានសម្តេច ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ អនុប្រធានគណបក្ស និងជាប្រធានក្រុមប្រឹក្សាជាតិរណសិរ្សសាមគ្គីអភិវឌ្ឍន៍មាតុភូមិកម្ពុជា និងថ្នាក់ដឹកនាំជាន់ខ្ពស់មួយចំនួននៃស្ថាប័នព្រឹទ្ធសភា និងរាជរដ្ឋាភិបាលកម្ពុជា។
នៅក្នុងអំឡុងទស្សនកិច្ចនេះ សម្តេចប្រធានព្រឹទ្ធសភាកម្ពុជា នឹងមានជំនួបពិភាក្សាការងារដាច់ដោយឡែកពីគ្នា ជាមួយ លោក តូ ឡឺម អគ្គលេខាធិការបក្សកុម្មុយនីស្តវៀតណាម , លោក ជិន ថាញ់មិន ប្រធានរដ្ឋសភាវៀតណាម និង លោក ផាម មិញជិញ នាយករដ្ឋមន្ត្រី វៀតណាម។ នេះបើតាមអគ្គលេខាធិការដ្ឋានព្រឹទ្ធសភា ដែលបានបញ្ជាក់ទៀតថា សម្តេច ហ៊ុន សែន ក៏គ្រោងនឹងជួបពិភាក្សាការងារ ជាមួយថ្នាក់ដឹកនាំបរទេស ដែលចូលរួមពិធីរំលឹកខួបនេះដែរ។
ព្រឹទ្ធសភាកម្ពុជា ចាត់ទុកទស្សនកិច្ចរបស់ សម្តេច ហ៊ុន សែន ក្នុងខួបលើកទី៥០នៃទិវារំដោះភាគខាងត្បូង និងការ បង្រួបបង្រួមជាតិវៀតណាមនេះ សបញ្ជាក់យ៉ាងច្បាស់ អំពីការបន្តរឹតចំណង និងលើកកម្ពស់ មិត្តភាពជាប្រពៃណី សាមគ្គីភាព និងកិច្ចសហប្រតិបត្តិការឈ្នះ-ឈ្នះ ឱ្យកាន់តែរីកចម្រើនបន្ថែមទៀត ស្រប តាមស្មារតី ភាពជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ ស្ថិរភាពយូរអង្វែង៕
© រក្សាសិទ្ធិដោយ thmeythmey.com
.gif)