សៀមរាប៖ អង្គការស្លាបព្រាកម្ពុជា (SPOONS) កំពុងធ្វើនវានុវត្តន៍មុខម្ហូបខ្មែរ​បែបប្រពៃណី ៣០មុខ ដើម្បីផ្សារភ្ជាប់ទំនាក់ទំនងកម្ពុជា-បារាំង តាមរយៈអាហារ និងចូលរួមលើកកម្ពស់​ការប្រើប្រាស់ផលិតផលក្នុងស្រុក។ នវានុវត្តន៍នៃម្ហូបប្រពៃណី ផ្ដោតទៅលើសោភ័ណភាព រសជាតិ ក្នុងន័យលើកកម្ពស់មុខម្ហូបខ្មែរ សម្រាប់ទេសចរបរទេសផងដែរ។

ដើម្បីជ្រាបច្បាស់ សូមអញ្ជើញលោកអ្នកនាង ស្តាប់កិច្ចសម្ភាស រវាង​លោក ស៊ុល រ៉វី និងអ្នកស្រី អ្នកស្រី ម៉ៅ សុផានី នាយិកាអង្គការស្លាបព្រាកម្ពុជា ដូចតទៅ៖ 

បដិសណ្ឋារកិច្ច ក្នុងវិស័យទេសចរណ៍ ក៏មានទំនាក់ទំនងយ៉ាងជិតស្និទ្ធជាមួយ ការ​ស្នាក់​នៅ និងការទទួលទានផងដែរ។ ​មនុស្សប្រើប្រាស់ភាសាទីទៃពីគ្នា វប្បធម៌ដោយឡែកពីគ្នា រស​និយមក៏ខុសគ្នាដែរ។ បើនិយាយពីម្ហូបអាហារទៀត ក៏រឹតតែខុសគ្នាថែមទៀត។ 

ម្ហូបអាហារខ្មែរសម្បូរបែបណាស់ រាប់ចាប់ពីសម្លស្ងោរ ចៀន ឆា ចំហុយ ញាំជាដើម។

ទោះជាយ៉ាងណា ម្ហូបខ្មែរមានលក្ខណៈពិសេស គឺមានក្លិន និងរសជាតិដិតៗ និងប្រើប្រាស់​នូវប្រហុក និងគ្រឿងទេសចម្រុះច្រើនប្រភេទក្នុងសម្ល ឬមុខម្ហូបមួយមុខៗ។ 

សម្រាប់ប្រជាជនកម្ពុជា ក្លិនប្រហុក និងរសជាតិដិតៗទាំងអស់នេះ ជារឿងធម្មតាទេ ហើយ​វាក៏ជារសជាតិពិសេសផងដែរ នៅពេលបាន​បង់ប្រហុកក្នុងមុខម្ហូប។ ប៉ុន្តែសម្រាប់ជនជាតិ បរទេស ពួកគេអាចសាកបាន តែប្រហែលជាពួកគេមិនអាចបរិភោគរសជាតិដើមនៃម្ហូបខ្មែរ ពេញមួយអាទិត្យ ឬពេញមួយដំណើរកម្សាន្តពួកគេ នៅកម្ពុជាទេ។

ដូច្នេះដើម្បីរក្សានូវតម្លៃប្រពៃណី និងលើកតម្លៃម្ហូបខ្មែរ ការកែច្នៃ និងធ្វើ​នវានុវត្តន៍​ម្ហូប​អាហារ​ គឺមានសារៈសំខាន់ណាស់។

អង្គការ​ស្លាបព្រាកម្ពុជា បានជើងមួយជំហាន ក្នុងកិច្ចការនេះនាពេលបច្ចុប្បន្ន។ បច្ចុប្បន្ន អង្គការស្លាបព្រា កំពុងធ្វើទំនើបកម្ម មុខម្ហូបខ្មែរចំនួន៣០មុខ សម្រាប់ភោជនីយ ដ្ឋាន​របស់​ខ្លួន ស្ថិតក្នុងខេត្តសៀមរាប។ គម្រោងនេះ ទទួលបាន ​គាំទ្រ​ផ្នែកហិរញ្ញវ​ត្ថុ​ពី​អង្គការ​អន្តរជាតិ La Francophonie ប្រទេសបារាំង។ 

នារាត្រីនៃការដឹងគុណ ដែលរៀបចំដោយអង្គស្លាបព្រាកម្ពុជា កាលពីថ្ងៃទី២៦ ខែមេសា អ្នក​ស្រី ម៉ៅ សុផានី នាយិកាអង្គការស្លាបព្រាកម្ពុជា លើកឡើងថា ការចាក់បញ្ចូល​គ្នា​នៃ​អាហារប្រពៃណីខ្មែរ និងអាហារបារាំង ក្នុងន័យទំនាក់ទំនងវប្បធម៌គ្នានឹងគ្នា តាមរយៈម្ហូប​អាហារ។ 

អ្នកស្រី ម៉ៅ សុផានី ពន្យល់បន្ថែម៖ «គម្រោងមួយទៀត គឺការrenovate (នវកម្ម) ផលិត ផលទាក់ទងនឹងម្ហូបខ្មែរ, ម្ហូបខ្មែរកាត់បារាំង ឬលាយគ្នាជាដើម ដើម្បី ឱ្យពួកយើង មាន ទំនាក់ទំនង culture exchange (ការផ្លាស់ប្ដូរវប្បធម៌) ជាមួយខ្មែរ និងបារាំងយើងហៅថា Khmer – French Cuisine»។ 

តាមរយៈគម្រោងនេះ បច្ចុប្បន្នអង្គការ​ SPOONS បានជ្រើសរើសមុខម្ហូបខ្មែរចំនួន៣០មុខ។ នាយិកាអង្គការ ពន្យល់ថា គម្រោងនវានុវត្តន៍ម្ហូបអាហារនេះ គឺជាការរៀបចំតុបតែងម្ហូបអាហារ ខ្មែរ ឱ្យកាន់តែទាន់សម័យ​ ឬទំនើបបន្ថែមទៀត ដោយរក្សានៅរសជាតិ និងវត្ថុធាតុដើម ប្រើ​ប្រាស់ជារបស់ខ្មែរដដែល ពោលធ្វើយ៉ាងណាឱ្យរសជាតិអាចឱ្យខ្មែរ និងបរទេស ទទួល យកបានដូចគ្នា។

 បើតាមអ្នកស្រី សុផានី ចំណុចសំខាន់នៃការនវានុវត្តន៍ម្ហូបអាហារនេះ គឺការច្នៃម្ហូប ដោយ​ប្រើ ប្រាស់វត្ថុធាតុដើម ឬគ្រឿងផ្សំទាំងអស់ជាផលិតផល​ក្នុងស្រុករាប់​ចាប់ពីគ្រឿង​ទេស, សាច់ និងបន្លែជាដើម។ ការណ៍នេះ ដើម្បីចូលរួមលើកកម្ពស់ការប្រើប្រាស់​នូវផលិតផល​ក្នុង​ស្រុក។ 

អ្នកស្រី ម៉ៅ សុផានី បញ្ជាក់ទៀតថា ក្រៅពីការកែច្នៃ ការរក្សានូវមុខម្ហូបប្រពៃណី នៅតែ​ត្រូវ រក្សាដដែល តែមានការកែប្រែថ្មីបន្ថែម ឱ្យស័ក្តិសមទៅនឹងការទទួលរបស់ជនបរទេស។ អ្នកស្រី ម៉ៅ សុផានី សង្កត់ធ្ងន់ដូច្នេះ៖«សម្លកកូរក៏យើងមាន ហហ្មុកត្រីក៏យើងមាន ប៉ុន្តែ យើងត្រូវបន្ថយប្រហុក ឬកុំឱ្យវាក្លិនពេក ហើយយើងប្រើប្រាស់ចានសេរ៉ាមិច របស់ខ្មែរ យើងជាដើម»។ 

បច្ចុប្បន្ននេះម្ហូបទាំង៣០មុខ ដែលអង្គការបានសម្រេចជ្រើសរើស កំពុងស្ថិតក្នុងដំណាក់ កាល នៃការឆ្លងកាត់សាកល្បង ដើម្បីឈានដល់ការសម្រេចចុងក្រោយ៕