ជាតិ  
ចុងភៅកម្ពុជាឈ្នះមេដាយមាស ប្រាក់ និងសំរឹទ្ធ ក្នុងកម្មវិធីប្រកួតម្ហូបអន្តរជាតិនៅថៃ
  • ថ្ងៃសៅរ៍ ទី៣១ ខែឧសភា ឆ្នាំ២០២៥ ​​ ម៉ោង ១០:៤០ នាទី ព្រឹក
ចុងភៅកម្ពុជាឈ្នះមេដាយមាស ប្រាក់ និងសំរឹទ្ធ ក្នុងកម្មវិធីប្រកួតម្ហូបអន្តរជាតិនៅថៃ
លោក ឈឿន ឈប់ ឈ្នះមេដាយមាសក្នុងការប្រកួតធ្វើម្ហូបអន្តរជាតិនៅថៃ។ រូបភាព៖ CCA

សៀមរាប៖ ចុងភៅកម្ពុជាលោក ឈឿន ឈប់ បានឈ្នះមេដាយមាសលើការប្រកួតម្ហូបលក្ខណៈអន្តរជាតិ ឈ្មោះថា Thailand Ultimate Chef Challenge ២០២៥។ ក្រៅពីនេះ មានចុងភៅផ្សេងទៀតក៏បាន​ឈ្នះមេដាយប្រាក់ និងសំរឹទ្ធ ពីព្រឹត្តិការណ៍ធ្វើម្ហូបជាលក្ខណៈអន្តរជាតិនេះដែរ។

TTN-Free-Banner-In-Article-PC

នៅថ្ងៃទី២៨ ខែឧសភា មេចុងភៅកម្ពុជា និងជាសមាជិកសមាគមចុងភៅកម្ពុជាំ (CCA) លោក ឈឿន ឈប់ បានឈ្នះមេដាយមាសលើវិញ្ញាសា Asian Modern Freshwater Fish and Prawn Culinary ក្នុងកម្មវិធី Thailand Ultimate Chef Challenge 2025 ក្នុងចំណោមបេក្ខជនប្រមាណ៧០០នាក់ មកពី៩ប្រទេស។ បើតាមសមាគមចុងភៅកម្ពុជា (CCA) ក្រៅពីលោក ឈឿន ឈប់ ក្នុងនោះចុងភៅម្នាក់ទៀតគឺលោក ​ឡេង វាសនា ទទួលបានមេដាយសំរឹទ្ធ លើវិញ្ញាសា ​Asian Curry ដែលការប្រកួតនេះធ្វើឡើងនៅថ្ងៃទី២៧ ឧសភា។ 

ដោយឡែកនៅថ្ងៃទី២៩ ឧសភា ចុងភៅកម្ពុជា៤រូបទៀត បានដណ្ដើមមេដាយប្រាក់ និងសំរឹទ្ធ លើវិញ្ញាសាផ្សេងៗគ្នា។ ទី១ ចុងភៅ ព្រហ្ម រដ្ឋា ទទួលបានមេដាយសំរឹទ្ធ លើវិញ្ញាសា Asian Rice and Noodle ទី២ ចុងភៅ ឌុក ដា មេដាយសំរឹទ្ធ លើវិញ្ញាសា Asian Modern Freshwater Fish & Prawn

ទី៣ ចុងភៅ ម៉ម ម៉ាញ មេដាយប្រាក់ លើវិញ្ញាសា Asian Curry និងទី៤ ចុងភៅ ដន ឆុង មេដាយសំរឹទ្ធ លើវិញ្ញាសា Asian Rice and Noodle។ 

សកម្មភាពចុងភៅកម្ពុជាកំពុងចូលរួមប្រកួត។ រូបភាព៖ CCA

នៅថ្ងៃទី៣០ ឧសភា ចុងភៅ ដន ឆុង ទទួលបានមេដាយសំរឹទ្ធ លើវិញ្ញាសា Asian Cuisine Culinary។ ដូច្នេះសរុបមេដាយដែលចុងភៅកម្ពុជាទទួលជាបណ្ដោះអាសន្នគិតត្រឹមថ្ងៃទី៣០ ឧសភា មានចំនួន៧គ្រឿង ក្នុងនោះមាស១ ប្រាក់១ និងសំរឹទ្ធ៥។ នៅថ្ងៃទី៣១ ឧសភា គឺការប្រកួតចុងក្រោយ និងជាការប្រកួតជាក្រុមៗ។ 

សមាគមចុងភៅកម្ពុជា​ បានបង្ហាញការសាទរ និងអបអរចំពោះលទ្ធផលនៃការប្រកួតនេះ។ បើតាមក្រុមការងារនៃសមាគមចុងភៅកម្ពុជាបានប្រាប់សារព័ត៌មានឌីជីថលថ្មីៗថា ចុងភៅពីកម្ពុជា​ចំនួន១៤រូប បានចូលរួមក្នុងកម្មវិធីប្រកួត​មុខម្ហូបអន្តរជាតិ​នៅប្រទេសថៃនេះ។ កម្មវិធីនេះចាប់ផ្តើម​ពីថ្ងៃទី២៧ ដល់ថ្ងៃទី៣១ ឧសភា ដោយចូលរួមប្រកួតនៅលើ៦ វិញ្ញាសាផ្សេងៗគ្នា។  

ក្រៅពីចុងភៅដែលតំណាងកម្ពុជា ក្នុងនោះប្រធានសមាគម និងអនុប្រធានសមាគមចុងភៅកម្ពុជា៤រូប ផ្សេងទៀតក៏ចូលរួមក្នុងនាមជាសមាជិកនៃក្រុមគណៈកម្មការវាយតម្លៃ (Rookie Judge) ក្នុងកម្មវិធីជា​លក្ខណៈអន្តរជាតិនេះដែរ៕ 

រូបភាព៖ CCA

រូបភាព៖ CCA
អ្នកសរសេរអត្ថបទ

អ៊ី​សា រ៉​ហា​នី (Isa Rohany) មាន​ស្រុកកំណើត​នៅ​ស្រុក​ក្រូចឆ្មារ ខេត្តត្បូងឃ្មុំ ។ នាង​បាន​ចូលធ្វើការ​ជា​អ្នក​សារព័ត៌មាន​នៅ​គេហទំព័រ​សារព័ត៌មាន​ថ្មីៗ​នៅ​ដើមឆ្នាំ​២០១៣ ក្រោយ​ទទួល​ការបណ្តុះបណ្តាល​វគ្គ​ខ្លី​លើ​ជំនាញ​សារព័ត៌មាន​ពី​អ្នកកាសែត​ជើងចាស់​។ ចាប់ពី​ឆ្នាំ​២០១៤​មក អ៊ី​សា រ៉​ហា​នី គឺជា​សហការី​របស់​សារព័ត៌មាន​ថ្មីៗ​ប្រចាំខេត្ត​សៀមរាប ដោយ​ផ្តោតលើ​ព័ត៌មាន​ចម្រុះ​។ អ៊ី​សា រ៉​ហា​នី បញ្ចប់​ថ្នាក់​បរិញ្ញាបត្រ​លើ​ជំនាញ សេដ្ឋកិច្ច នៅ​ឆ្នាំ​២០១១៕

Cambodianess.com
© រក្សាសិទ្ធិដោយ thmeythmey.com
Tag:

អុីសា រ៉ហានី