.png)
.png)
.jpg)
.jpg)
«មានហូប មានប្រើ មានបាន និងមានរហូត»! រដ្ឋសភា និងព្រឹទ្ធសភា ប្រកាសពីជោគជ័យនៃសមាជស្តីពីកសិកម្ម
- ថ្ងៃអង្គារ ទី៣ ខែមិថុនា ឆ្នាំ២០២៥ ម៉ោង ១១:០៧ នាទី យប់
អគ្គលេខាធិការដ្ឋានសមាជរដ្ឋសភា និងព្រឹទ្ធសភា បានប្រកាសពីលទ្ធផលដ៏ជោគជ័យនៃកិច្ចពិភាក្សាពេញមួយថ្ងៃ ក្នុងអង្គសមាជលើកដំបូងរបស់ស្ថាប័ននីតិបញ្ញតិទាំងពីរ លើរបៀបវារៈទី៣ ស្តីពីវិស័យកសិកម្ម នៅវិមានរដ្ឋសភា នាថ្ងៃទី៣ ខែមិថុនា។
កិច្ចពិភាក្សាក្រោមការដឹកនាំរបស់សម្តេច ហ៊ុន សែន ប្រធានព្រឹទ្ធសភា មានការចូលរួមពីសមាជិកអង្គសមាជ១៧៩រូប ដែលជាសមាជិករដ្ឋសភា និងព្រឹទ្ធសភា ដោយភាគច្រើនបំផុតពីគណបក្សប្រជាជនកម្ពុជា រីឯគណបក្សហ៊្វុនស៊ិនប៉ិច មានសមាជិកសភា៣អង្គរូប និងគណបក្សឆន្ទៈខ្មែរ មានសមាជិកព្រឹទ្ធសភា៣រូប។
ក្រោយ លោក ឡូយ សុផាត តំណាងក្រុមជំនួយការគណៈកម្មាធិការសមាជរដ្ឋសភា និង ព្រឹទ្ធសភា ទទួលបន្ទុក ប្រធានបទអំពីវិស័យកសិកម្ម ជាអ្នករាយការណ៍អំពីលទ្ធផលនៃការពិនិត្យសិក្សាប្រធានបទជូនអង្គប្រជុំសមាជ សមាជិកអង្គសមាជ ចំនួន ២៣រូប បានឡើងមានមតិ បញ្ចេញយោបល់។
អង្គសមាជ បានពិភាក្សាអំពីគោលនយោបាយ ផែនការសកម្មភាព ស្ថានភាព ជាក់ស្តែង បញ្ហាប្រឈម និងដំណោះស្រាយពាក់ព័ន្ធនឹងវិស័យកសិកម្ម ដែលរដ្ឋាភិបាលកំពុងអនុវត្ត ហើយបានគាំទ្រទាំងស្រុងនូវ ផែនការយុទ្ធសាស្ត្រ ផែនការសកម្មភាព និងវិធានការទាំងឡាយដែលបានអនុវត្តកន្លង។
សេចក្តីប្រកាសព័ត៌មានបានរៀបរាប់ពីតួលេខទាក់ទងនឹងវិស័យកសិកម្មដែលលោក ឡូយ សុផាត បានអាន ជាពិសេសគោលនយោបាយនយោបាយយុទ្ធសាស្ត្របញ្ចកោណ-ដំណាក់កាលទី១ និងកម្មវិធីគោលនយោបាយ អាទិភាពរបស់រាជរដ្ឋាភិបាលក្នុងវិស័យកសិកម្ម ។
គិតត្រឹមឆ្នាំ២០២៤ វិស័យកសិកម្មបន្តចូលរួមចំណែកប្រមាណ ១៦,៧% ក្នុងផលិតផលសរុបក្នុងស្រុក ហើយតម្លៃបន្ថែមសរុបនៃវិស័យកសិកម្ម (Gross Value Added in Agriculture) បន្តកើនឡើងជារៀងរាល់ឆ្នាំ ហើយការចូលរួមចំណែករបស់អនុវិស័យនានាក្នុងវិស័យកសិកម្ម រួមមានផ្នែកដំណាំ ៦១,៣% ផ្នែកផលិតកម្មសត្វ ១៥,៤% ផ្នែកជលផល ២០% និងផ្នែកព្រៃឈើ ៣,៣%។
គោលនយោបាយអាទិភាពរួមមាន ការលើកស្ទួយផលិតកម្មកសិកម្ម រកទីផ្សារ, រក្សាលំនឹងថ្លៃកសិផលតាមរយៈ កម្ម វិធីហិរញ្ញប្បទាន និងការដាក់ពង្រាយមន្ត្រីកសិកម្មឃុំ-សង្កាត់ និងការអភិវឌ្ឍ សហគមន៍កសិកម្មទំនើប។
រដ្ឋាភិបាលបានអះអាងថា គោលនយោបាយវិស័យកសិកម្ម បានផ្តល់ផលប្រយោជន៍ដល់ប្រជាជនកម្ពុជាគ្រប់រូប ដែលរួមមានទាំងអ្នករកទទួលទាន និងប្រជាកសិករ អ្នកបង្កបង្កើនផល តាមរយៈការអនុវត្ត គោលនយោបាយ សាមញ្ញ ៤ ចំណុច គឺ «មានហូប មានប្រើ មានបាន និងមានរហូត»។
សេចក្តីប្រកាសព័ត៌មាន បានបញ្ជាក់ថា អង្គសមាជរដ្ឋសភានិងព្រឹទ្ធសភា បានលើកទឹកចិត្តដល់ រដ្ឋាភិបាលឱ្យបន្ត អនុវត្ត គោលនយោបាយទូទៅ យុទ្ធសាស្ត្របញ្ចកោណ ដំណាក់កាលទី១ កម្មវិធីគោលនយោបាយអាទិភាពរបស់ រាជរដ្ឋាភិបាលក្នុងវិស័យកសិកម្ម និងយុទ្ធសាស្ត្រដែលបានដាក់ចេញចាប់តាំងពីឆ្នាំ១៩៨៧។
បន្ទាប់ពីការពិភាក្សាលើប្រធានបទអំពីវិស័យកសិកម្ម និងការបកស្រាយរបស់រដ្ឋាភិបាលទៅលើមតិ ពិភាក្សា អង្គប្រជុំសមាជបានអនុម័តសេចក្តីព្រាងសេចក្តីសម្រេចស្តីពីវិស័យកសិកម្ម ជាមួយនឹងសំឡេងគាំទ្រ១៧៩សំឡេង នៃចំនួនសមាជិក សមាជរដ្ឋសភា និងព្រឹទ្ធសភាទាំងមូល។
តាមខ្លឹមសារក្នុងសេចក្តីប្រកាសព័ត៌មាន សេចក្តីសម្រេចស្តីពីវិស័យកសិកម្ម នឹងក្លាយជាត្រីវិស័យចូលរួមគាំទ្រ លើកទឹកចិត្តដល់រដ្ឋាភិបាលក្នុងការអនុវត្តកម្មវិធី នយោបាយកាន់តែមានប្រសិទ្ធភាព៕
© រក្សាសិទ្ធិដោយ thmeythmey.com
Tag:
