.png)
.png)
.jpg)
.jpg)
៤ឆ្នាំចុងក្រោយនេះ និស្សិតកម្ពុជា៥៥៥នាក់បានជ្រើសរើសបន្តការសិក្សានៅប្រទេសបារាំង
- ថ្ងៃសុក្រ ទី៦ ខែមិថុនា ឆ្នាំ២០២៥ ម៉ោង ១០:២៩ នាទី យប់
តាមរយៈកម្មវិធីអាហារូបករណ៍ និងសហហិរញ្ញប្បទានសាធារណៈ និងឯកជននានា និស្សិតកម្ពុជា៥៥៥នាក់ បានជ្រើសរើសបន្តការសិក្សានៅប្រទេសបារាំង ដោយគិតចាប់តាំងពីឆ្នាំ២០២១មក។ នេះបើតាមសេចក្តីប្រកាស ព័ត៌មាន របស់ស្ថានទូតបារាំងប្រចាំកម្ពុជា នាទិវាអតីតនិស្សិតកម្ពុជា ដែលធ្លាប់សិក្សានៅបារាំង ឬតាមគ្រឹះស្ថាន ឧត្តមសិក្សាបារាំង លើកទីបី នាល្ងាចថ្ងៃទី៥ ខែមិថុនា។
ទិវាអតីតនិស្សិតកម្ពុជាដែលធ្លាប់សិក្សានៅប្រទេសបារាំង ឬតាមបណ្តាគ្រឹះស្ថានឧត្តមសិក្សាបារាំងលើកទីបីនេះ ធ្វើឡើងស្ថិតក្រោមប្រធានបទ «អ្នកមានទេពកោសល្យដើម្បីផ្លាស់ប្តូរពិភពលោក» ដោយមានអ្នកចូលរួមជាង ៦០០ នាក់នៅ «ភូមិអតីតនិស្សិត» ក្នុងបរិវេណស្ថានទូត។
ក្នុងសុន្ទរកថាស្វាគមន៍ ឯកអគ្គរដ្ឋទូតបារាំងប្រចាំកម្ពុជា លោក ហ្សាក់ ប៉ឺឡេ បានវាយតម្លៃខ្ពស់ចំពោះការសិក្សាដ៏ល្អរបស់អតីតនិស្សិតកម្ពុជា ក៏ដូចជាការរួមចំណែកដ៏ធំធេងរបស់ពួកគេក្នុងការអភិវឌ្ឍប្រទេសកម្ពុជា និងការពង្រឹងចំណងទាក់ទងបារាំង-កម្ពុជា។
«ដោយជ្រើសរើសឧត្តមសិក្សាបារាំង លោកអ្នកទទួលបានចំណេះដឹងផ្នែកភាសា ជំនាញ ផ្នត់គំនិតទូលំទូលាយ និង បទពិសោធន៍ ដែលនាំទៅកាន់ចក្ខុវិស័យការងារ និងអាជីព ទាំងនៅកម្ពុជា និងនៅបរទេស»។ លោកទូតបាន អះអាងយ៉ាងដូច្នេះ ដោយបន្ថែមថា ភាសាបារាំង និងការសិក្សានៅប្រទេសបារាំង គឺជាកម្លាំងចលករដ៏ខ្លាំងនៃឱកាសទទួលបានការងារ។
បារាំងស្ថិតក្នុងលំដាប់ទី៤លើពិភពលោកដែលទទួលនិស្សិតបរទេសឱ្យទៅសិក្សាច្រើនជាងគេ ហើយក៏ជាប្រទេស គោលដៅទី៤សម្រាប់និស្សិតកម្ពុជាផងដែរ។ របាយការណ៍បានបង្ហាញថា ចាប់តាំងពីឆ្នាំ២០២១មក និស្សិតកម្ពុជា ៥៥៥នាក់បានជ្រើសរើសបន្តការសិក្សានៅប្រទេសបារាំងតាមរយៈកម្មវិធីអាហារូបករណ៍ France Excellence អាហារូបករណ៍ Eiffel កម្មវិធី DFMS (សញ្ញាប័ត្រវេជ្ជសាស្រ្តជំនាញ) និង DFMSA (សញ្ញាបត្រវេជ្ជសាស្រ្ត ជំនាញជាន់ខ្ពស់) ក៏ដូចជាតាមរយៈសហហិរញ្ញប្បទានសាធារណៈ និងឯកជន។
ស្របពេលជាមួយគ្នា និស្សិតកម្ពុជាជាច្រើននាក់ទៀតបន្តការសិក្សានៅប្រទេសបារាំងតាមរយៈហិរញ្ញវត្ថុផ្ទាល់ខ្លួន ផងដែរ។ នៅឆ្នាំនេះ និស្សិត១៧នាក់ ក្នុងនោះស្រី៨នាក់ នឹងចាកចេញទៅសិក្សានៅបារាំងក្នុងបវេសនកាលមុខតាមអាហារូបករណ៍ France Excellence ដោយ១២នាក់បន្តការសិក្សាថ្នាក់បរិញ្ញាបត្រជាន់ខ្ពស់ និង៥នាក់សិក្សាថ្នាក់បណ្ឌិត តាមរយៈការគាំទ្ររបស់ស្ថានទូតបារាំង និងកិច្ចខិតខំប្រឹងប្រែងរបស់គ្រឹះស្ថានឧត្តមសិក្សាកម្ពុជា។
ជំនួបនៅ «ភូមិអតីតនិស្សិត» ដែលត្រូវបានរៀបចំជាពិសេសក្នុងបរិវេណស្ថានទូតបារាំងនេះ ជួយសម្រួល ដល់ការពិភាក្សាផ្លាស់ប្តូរយោបល់ បើកចក្ខុវិស័យការងារ និងពង្រឹងបណ្តាញ អតីតនិស្សិតកម្ពុជាមកពីបារាំង ដែលបច្ចុប្បន្នមានសមាជិកជាង១ ២០០នាក់។
ស្របពេលជាមួយគ្នាផងដែរ ស្ថានទូតបារាំង បានបញ្ជាក់ថា ទិវាអតីតនិស្សិតកម្ពុជាដែលធ្លាប់ទៅសិក្សានៅបារាំង គឺជាពេលវេលានៃការកៀគរបណ្តាញអ្នកប្រើប្រាស់ភាសាបារាំង ក្នុងពេលដែលកិច្ចប្រជុំកំពូលហ្វ្រង់ កូហ្វូនីលើកទី២០ ឆ្នាំ២០២៦នៅកម្ពុជា កាន់តែខិតជិតមកដល់៕
© រក្សាសិទ្ធិដោយ thmeythmey.com
Tag:
