ភ្នំពេញ៖  គណៈកម្មការគ្រប់គ្រង និងអភិវឌ្ឍន៍ទេសចរណ៍សៀមរាប-អង្គរ (គ.អ.ទ.ស.) បន្តពង្រីកសកម្មភាពអភិវឌ្ឍន៍គោលដៅទេសចរណ៍ទាំង៦របស់ខេត្តសៀមរាប​ឱ្យកាន់តែមានភាពទាក់ទាញ និងរស់រវើក។ គោលទេសចរណ៍ទាំង៦របស់ខេត្តសៀមរាបនោះមាន តំបន់បេតិកភណ្ឌអង្គរ, ក្រុងសៀមរាប,​ តំបន់ទន្លេសាប, តំបន់ឧទ្យានភ្នំគូលែន និងតំបនទេសចរណ៍សៀមរាបថ្មី​-ក្រុងរុនតាឯកតេជោសែនជ័យ។​

លោក ថោង ខុន ទេសរដ្ឋមន្ត្រី និងជាប្រធាន គ.អ.ទ.ស. បានដឹកនាំកិច្ចប្រជុំគណៈកម្មការគ្រប់គ្រង និងអភិវឌ្ឍន៍ទេសចរណ៍សៀមរាប-អង្គរ ដើម្បីផ្សព្វផ្សាយ «សេចក្តីសម្រេចស្តីពីការអនុវត្តវិធានការគន្លឹះអភិវឌ្ឍន៍ទេសចរណ៍ខេត្តសៀមរាបឆ្នាំ២០២៥» នៅទីស្ដីការគណៈរដ្ឋមន្រ្តី នាព្រឹកថ្ងៃទី១១ ខែមិថុនា នេះ។  កិច្ចប្រជុំនេះ ធ្វើឡើងក្នុងគោលដៅប្រមូលធាតុចូលពីគ្រប់ភាគីពាក់ព័ន្ធទាំងអស់ ក្នុងការអនុវត្តវិធានការគន្លឹះអភិវឌ្ឍន៍ទេសចរណ៍ខេត្តសៀមរាបឆ្នាំ២០២៥។

បើតាមលោក ថោង ខុន ក្នុងចំណោមវិធានការគន្លឹះទាំង២៤ នៃការអភិវឌ្ឍទេសចរណ៍ខេត្តសៀមរាបឆ្នាំ២០២៥ គឺមានវិធានមួយសំដៅលើការធ្វើពិពិធកម្មគោលដៅទេសចរណ៍នៅតាមតំបន់អាទិភាពទាំង៦របស់ខេត្តសៀមរាប។​ រួមមាន៖  តំបន់បេតិកភណ្ឌអង្គរ, ក្រុងសៀមរាប,​ តំបន់ទន្លេសាប, តំបន់ឧទ្យានភ្នំគូលែន និងតំបនទេសចរណ៍សៀមរាបថ្មី​-ក្រុងរុនតាឯកតេជោសែនជ័យ។​ ការធ្វើពិពិធកម្មគោលដៅទេសចរណ៍ទាំងនេះ ត្រូវបានបង្ហាញដោយលោក អាំង សុវណ្ណរ័ត្ន អនុប្រធានលេខាធិការដ្ឋាននៃ គ.អ.ទ.ស.។​

លោក ថោង ខុន ទេសរដ្ឋមន្ត្រី និងជាប្រធាន គ.អ.ទ.ស.

លោក អាំង សុវណ្ណរ័ត្ន បានរៀបរាប់ថា សម្រាប់តំបន់បេតិកភណ្ឌអង្គរ គ.អ.ទ.ស. គឺបន្តលើកទឹកចិត្ត និងសម្រួលនូវលក្ខខណ្ឌតម្រូវថ្មីពាក់ព័ន្ធនឹងការថតវីដេអូ ឬរូបភាពសន្លឹក ក្នុងតំបន់រមណីយដ្ឋានអង្គរ។ សិក្សាបង្កើនវង្សទស្សនាប្រាសាទឱ្យមានច្រើនជម្រើសសម្រាប់អ្នកទេសចរ និងរៀបចំផែនការសេវាកម្មដឹកជញ្ជូនទេសចរក្នុងតំបន់អង្គរ។ សិក្សារៀបចំឱ្យមានសេវាកម្មម្ហូបអាហារ និងភេសជ្ជៈ នៅតាមទីតាំងជាក់លាក់មួយចំនួនក្នុងតំបន់អង្គរ ដោយត្រូវអនុលោមតាមសៀវភៅបន្ទុកច្បាស់លាស់ពីអាជ្ញាធរជាតិអប្សរា។  ចំពោះតំបន់នេះ ត្រូវបង្កើនការថែរក្សាភាពស្អាត អនាម័យ សន្តិសុខ និងសណ្តាប់ធ្នាប់ ជាពិសេសភាគីពាកព័ន្ធត្រូវបង្កើនការផ្សព្វផ្សាយពីប្រភេទប្រាសាទ ឬក្រុមប្រាសាទ​ ដែលអនុញ្ញាតឱ្យរៀបចំព្រឹត្តិការណ៍ទេសចរណ៍​ និងវប្បធម៌។ 

សម្រាប់តំបន់ក្រុងសៀមរាប គឺត្រូវកែលម្អស្ទឹងសៀមរាប (ផ្នែកកណ្តាល) ជាកន្លែងកម្សាន្តទេសចរណ៍។ រៀបចំ«សង្កាត់ទេសចរណ៍គំរូ» នៅក្រុងសៀមរាប ផ្សារភ្ជាប់នឹងការរៀបចំវត្តទេសចរណ៍ និងរៀបចំវិថីម្ហូបអាហារ និងផ្សាររាត្រីឱ្យកាន់តែមានភាពទាក់ទាញ។ តំបន់នេះ ត្រូវពង្រឹងភាពស្អាត បៃតង ពង្រឹងសណ្តាប់ធ្លាប់តាមផ្លូវក្នុងទីក្រុង ចំណតរថយន្ត និងចំណតរ៉ឺម៉កកង់បី។ លើសពីនេះ អាជ្ញាធរត្រូវតុបតែងលម្អក្នុងទីក្រុង ធ្វើទំនើបកម្មសេវាមណ្ឌលព័ត៌មានទេសចរណ៍ និងពង្រីកគុណភាពសេវាហាងលក់ទំនិញ វត្ថុអនុស្សាវរីយ៍ ពីសេសត្បូងមានតម្លៃ តាមរយៈបង្កើតយន្តការគ្រប់គ្រងច្បាស់លាស់ ដើម្បីធានាទំនុកចិត្តភ្ញៀវទេសចរ។​

អាជ្ញាធរគ្រប់រូបត្រូវគិតគូរលើសម្បទាទាក់ទាញប្រភេទទេសចរណ៍ Digital Nomad ( Co-Working Spaces) និងប្រភេទទិដ្ឋាការពិសេស។ ជាមួយគ្នានេះ គឺត្រូវសិក្សា និងកំណត់ទីតាំងរៀបចំតំបន់ (Zoning) សេវាកម្មមណ្ឌលកម្សាន្តមនុស្សពេញវ័យ។ 

លោក អាំង សុវណ្ណរ័ត្ន អនុប្រធានលេខាធិការដ្ឋាននៃ គ.អ.ទ.ស.

តំបន់ទន្លេសាប (ពិសេសនៅចុងឃ្នៀស កំពង់ភ្លុក កំពង់ឃ្លាំង និងបឹងពារាំង) ត្រូវមានការសិក្សាគម្រោងកែលម្អផ្លូវចូលទៅសហគមន៍ទាំង៤នេះ។ ក្រៅពីនេះ ត្រូវកែលម្អទូកទេសចរណ៍ នៅតំបន់ទន្លេសាប ជាជំហានៗស្របតាមតម្រូវការ និងសំណូមពរជាច្រើនពីភ្ញៀវទេសចរ ក៏ដូចជាសហគមន៍ដែលជាអ្នកផ្គត់ផ្គង់សេវាទូកទេសចរណ៍នេះផ្ទាល់តែម្តង។ 

ត្រូវពង្រីកសហគមន៍ទាំងធនធាន និងសមត្ថភាពក្នុងការទទួលស្វាគមន៍អ្នកទេសចរ, បញ្ចុះតម្លៃទូកសម្រាប់អ្នកទេសចរក្នុងស្រុកនៅចុងឃ្នៀស និងជំរុញសកម្មភាពសិប្បកម្មងាយៗនៅតាមសហគមន៍​​, សិក្សារៀបចំប្រព័ន្ធបង់រំលស់ទូកទេសចរណ៍នៅក្នុងសហគមន៍ទេសចរណ៍ក្នុងតំបន់បឹងទន្លេសាប​។ លោក អាំង សុវណ្ណរ័ត្ន បានបញ្ជាក់ថា ប្រព័ន្ធនេះផ្តល់ការធានាដោយរដ្ឋ អមជាមួយការកំណត់លក្ខខណ្ឌបែបបទ និងនីតិវិធីនៃការធានាច្បាស់លាស់។ 

តំបន់មួយនេះ ក៏ត្រូវរៀបចំឱ្យមានទីតាំងថតរូបអនុស្សាវរីយ៍ ជាមួយទេសភាពស្អាតៗ, ពង្រឹងការគ្រប់គ្រងសំរាម សំណល់រឹង - រាង និងរៀបចំឱ្យមានការសម្តែងទស្សនីយភាពផ្សេងៗ ឬបុណ្យប្រពៃណីប្រចាំតំបន់ ឬព្រឹត្តិការណ៍ផ្សេងៗ។ 

ដោយឡែកសម្រាប់តំបន់ឧទ្យានជាតិភ្នំគូលែនវិញ លោក អាំង សុវណ្ណរ័ត្ន បានលើកឡើងថា  គ.អ.ទ.ស. ត្រូវដាក់ឱ្យដំណើរការអង្គភាពគ្រប់គ្រងគោលដៅទេសចរណ៍ភ្នំគូលែនឱ្យច្បាស់លាស់ ដើម្បីរៀបចំសណ្តាប់ធ្នាប់។ ត្រូវកែលម្អផ្លូវឡើង និងហេដ្ឋារចនាសម្ព័ន្ធគាំទ្រ (ដូចជា៖ ខ្យូស តូបអាហារ រៀបចំមណ្ឌលព័ត៌មានទេសចរណ៍នៅជើងភ្នំ កែលម្អបន្ទប់ទឹកនៅលើភ្នំ និងគ្រប់គ្រងសំរាម), រៀបចំផ្លូវទស្សនាចរបន្ថែម ទៅកាន់ទីតាំងធម្មជាតិ និងវប្បធម៌។​

ត្រូវធ្វើពិពិធកម្មផលិតផល និងសេវាទេសចរណ៍ រួមទាំងសហគមន៍ព្រៃធំអន្លង់ធំ និងសហគមន៍ព្រៃធំពពេល, រៀបចំបង្កើតមណ្ឌលវិបស្សនា ឬសមាធិ ឱ្យមានមាត្រដ្ឋានជាទីជ្រះថ្លា នៅតំបន់ភ្នំគូលែន, ពង្រឹងសមត្ថភាពសហគមន៍ ជាពិសេសគុណភាពសេវាកម្ម និងត្រូវសិក្សាសម្រួលថ្លៃសំបុត្រចូលទស្សនា រួមទាំងការបំពាក់សេវាទូរគមនាគមន៍ផងដែរ។ 

ចំពោះ តំបន់ទេសចរណ៍សៀមរាបថ្មី នៅក្រុងរុនតាឯកតេជោសែនវិញ គឺ គ.អ.ទ.ស. កំពុងសិក្សាសមាហរណកម្មទៅជាតំបន់ទេសចរណ៍សៀមរាបថ្មី ដែលស្ថិតក្នុងគម្រោងអភិវឌ្ឍន៍ក្រុងរុនតាឯកនេះតែម្តង។ បើតាមលោកអនុប្រធានលេខាធិការដ្ឋាននៃ គ.អ.ទ.ស. បច្ចុប្បន្នក្រុមការងារកំពុងរៀបចំគម្រោងសាកល្បងលើការរៀបចំភូមិទេសចរណ៍នៅក្នុងស្រុករុនតាឯងតេជោសែននេះ។ 

គួរជម្រាបថា វិធានការគន្លឹះអភិវឌ្ឍន៍ទេសចរណ៍ខេត្តសៀមរាប ឆ្នាំ២០២៥ ត្រូវបានរដ្ឋាភិបាលសម្រេចដាក់ឱ្យអនុវត្តនៅថ្ងៃទី៤ ខែមីនា​ ឆ្នាំ២០២៥​ ក្នុងគោលដៅទាក់ទាញកំណើន​ភ្ញៀវ​ទេសចរ​​មកខេត្ត​សៀមរាប កាន់តែច្រើន​បន្ថែម​​ទៀត។ វិធានការគន្លឹះអភិវឌ្ឍន៍ទេសចរណ៍ខេត្តសៀមរាប ឆ្នាំ២០២៥  គឺមានចំនួន៧ធំៗ ក្នុងនោះមាន គន្លឹះទី១. ការផ្សព្វផ្សាយឱ្យស្គាល់ និងទាក់ទាញភ្ញៀវទេសចរ​អន្តរជាតិឱ្យមកទស្សនា​ខេត្ត​សៀមរាប ដោយលើកកម្ពស់ខេត្តសៀមរាបជាគោលដៅទេសចរណ៍វប្បធ៌ម និងធម្មជាតិ តាមរយៈ​ការរៀបចំការប្រកួតប្រជែងថតរូបទេសចរណ៍ឆ្នើមក្នុងព្រឹត្តិការណ៍សំខាន់ៗ។

គន្លឹះទី២. គឺការបង្កលក្ខណៈងាយស្រួល ដល់ការសម្រេចចិត្ត និងការរៀបចំដំណើរទេស​ចរណ៍​មកខេត្តសៀមរាប ដោយពង្រឹងការផ្ដល់ព័ត៌មានគោលដៅទេសចរណ៍​ខេត្តសៀមរាបដល់​ភ្ញៀវ​ទេស​ចរបរទេស តាមរយៈការបង្ករលក្ខណៈងាយស្រួលក្នុងការធ្វើការកក់ តាមរយៈថ្នាល​អន​ឡាញ ការីទេសចរណ៍ជាដើម។ គន្លឹះទី៣. បង្កលក្ខណៈងាយស្រួល​ក្នុងការមកដល់ភ្ញៀវទេសចរនៅតាម​ច្រកទ្វារអន្តរ​ជាតិ​ ដូចជានៅក្នុងអាកាស​យានដ្ឋានអន្តរជាតិសៀមរាបអង្គរ។

គន្លឹះទី៤.  គឺសម្រួលដល់ដំណើរកម្សាន្តក្នុងខេត្តសៀមរាប ស្រតាមទិសស្លោក សៀមរាប៖​ តារារះទិសឧត្តរ, គន្លឹះទី៥. ដំណើរវិលត្រឡប់ទៅវិញប្រកបដោយការចងចាំល្អ។  គន្លឹះទី៦ ទាក់ទាញភ្ញៀវទេសចរក្នុងស្រុកមកទស្សនាខេត្តសៀមរាប និងគន្លឹះទី៧ បង្កើនភាពទាក់ទាញភ្ញៀវទេសចរបរទេសផ្ទៃក្នុង។

ទី៣). អង្គប្រជុំបានកត់សម្គាល់ និងកោតសរសើរចំពោះរបាយការណ៍វឌ្ឍនភាពផែនការអភិវឌ្ឍន៍ទេសចរណ៍នៅចុងឃ្នៀស និងក្រុងសៀមរាប។ អង្គប្រជុំស្នើឱ្យអង្គភាពគ្រប់គ្រងគោលដៅតាមតំបន់នីមួយៗ ឬស្ថាប័នមានសមត្ថកិច្ច ជាពិសេស គ្រឹះស្ថានអង្គរ ដែលជាអង្គភាពគ្រប់គ្រងគោលដៅទេសចរណ៍នៅតំបន់បឹងទន្លេសាប (Sub-DMO) បន្តខិតខំជំរុញការងាររបស់ខ្លួនឱ្យស្របតាមទិសដៅដែលបានគ្រោងទុក។

កាលឆ្នាំ២០២៤  ខេត្តសៀមរាបបានទទួលទេសចរអន្តរជាតិចំនួន ១ ០២៣ ៦៨៨ នាក់ កើនឡើង ២៨,២៧ភាគរយ​។​ ដោយឡែកសម្រាប់រយៈពេល ៥ខែ ឆ្នាំ២០២៥  ខេត្តសៀមរាប ទទួលបាន ៥២ ម៉ឺននាក់  កើនឡើង  ១១,៧១ភាគរយ ធៀបនឹងរយៈពេលដូចគ្នាក្នុងឆ្នាំ២០២៤។ បើតាមលោក ថោង ខុន​​​ តាមការព្យាករ ខេត្តសៀ​មរាប​អាចនឹងទទួលបានភ្ញៀវទេសចរអន្តរជាតិប្រមាណ ១,២ ទៅ ១,៣ លាននា​ក់ សម្រាប់ឆ្នាំ២០២៥។​

ប្រធាន គ.អ.ទ.ស. បានបញ្ជាក់ថា កំណើននេះ បានមកពីប្រសិទ្ធភាពនៃការដាក់ចេញវិធានការបន្ទាន់មួយចំនួនរបស់រដ្ឋាភិបាលនាពេលកន្លងមក។ ក្នុងនោះ មានការកាត់បន្ថយកម្រៃសិទ្ធិហោះហើរតែម្ខាងដល់ក្រុមហ៊ុនអាកាសចរណ៍ ដែលប្រតិបត្តិការជើងហោះហើរអន្តរជាតិនៅអាកាសយានដ្ឋានអន្តរជាតិសៀមរាប-អង្គរ, ការដាក់ឱ្យដំណើការប្រព័ន្ធ E-Arrival, ការបញ្ចុះថ្លៃទិដ្ឋាការអេឡិចត្រូនិក (E-Visa), ការសម្រួលការធ្វើដំណើរនៅតាមច្រកទ្វារអន្តរជាតិ និងការកែសម្រួលប្រព័ន្ធលក់សំបុត្រអង្គរ។ 

ការកែសម្រួលម៉ោងបើក-បិទចូលទស្សនាប្រាសាទ, ការកែសម្រួលលក្ខខណ្ឌតម្រូវនៃការថតវីដេអូ និងរូបភាពសន្លឹកនៅអង្គរ, ការកែលម្អដងស្ទឹងសៀមរាប និងការកសាងផ្លូវទៅសហគមន៍ទេសចរណ៍កំពង់ភ្លុក, ការបន្តការលើកលែងការបង់ពន្ធប្រចាំខែគ្រប់ប្រភេទ។ ការលើកលែងតែអាករលើតម្លៃបន្ថែម និងអាករលើការស្នាក់នៅ (ចំពោះសណ្ឋាគារ ផ្ទះសំណាក់ ក្រុមហ៊ុនភ្នាក់ងារទេសចរណ៍ និងភោជនីយដ្ឋាន ដែលបានចុះបញ្ជីជាមួយអគ្គនាយកដ្ឋានពន្ធដារ និងមានអាជីវកម្មនៅខេត្តសៀមរាប) លើកលែងពន្ធលើប្រាក់ចំណូល  មិនចុះធ្វើសវនកម្មលើអាជីវកម្មក្នុងវិស័យទេសចរណ៍រហូតដល់ដំណាច់ខែមិថុនា ឆ្នាំ២០២៥, ការផ្តល់ថវិកាចំនួន ៥០លានដុល្លារ តាមរយៈធនាគារ SME សម្រាប់ត្រៀមផ្តល់ឥណទាន ជាពិសេសជូនប្រតិបត្តិករទេសចរណ៍ខេត្តសៀមរាប ដើម្បីសម្រួលដល់អាជីវកម្មទេសចរណ៍ សម្រួលការធ្វើដំណើរ និងទស្សនារបស់ទេសចរ ក៏ដូចជា បង្កើនភាពទាក់ទាញដល់វិស័យទេសចរណ៍កម្ពុជា រួមនឹងការខិតខំរបស់ក្រសួង/ស្ថាប័នពាក់ព័ន្ធ។ 

ជាមួយគ្នានេះ ព្រឹត្តិការណ៍កីឡានានា ព្រឹត្តិការណ៍អង្គរសង្ក្រាន្ត ក៏ដូចជាព្រឹត្តិការណ៍នានារៀបចំដោយផ្នែករដ្ឋ និងឯកជន  នាពេលកន្លងមក ក៏បានចូលរួមទាក់ទាញទេសចរជាតិ និងអន្តរជាតិ ឱ្យធ្វើដំណើរទស្សនាក្នុងខេត្តសៀមរាប ក៏ដូចជាក្នុងប្រទេសទាំងមូលផងដែរ៕​