.png)
.png)
.jpg)
.jpg)
លោក ហ៊ុន ម៉ានី៖«កូនខ្មែរទាំងអស់ ត្រូវចងចាំថ្ងៃទី២៨ ខែឧសភា ឆ្នាំ២០២៥»
- ថ្ងៃព្រហស្បតិ៍ ទី១២ ខែមិថុនា ឆ្នាំ២០២៥ ម៉ោង ៣:០៩ នាទី រសៀល
លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា នាពិធីសំណេះសំណាលជាមួយកងទ័ពជួរមុខ នាស្រុកជាំក្សាន្ត ខេត្តព្រះវិហារ កាលពីថ្ងៃទី១១ ខែមិថុនា។ រូបភាពពីUYCF
ព្រះវិហារ៖ «ថ្ងៃទី២៨ ខែឧសភា ឆ្នាំ២០២៥ កូនខ្មែរទាំងអស់ ត្រូវចងចាំ ហើយផ្សារភ្ជាប់ទៅលើករណីភាពតានតឹងសារជាថ្មី ក្នុងក្របខណ្ឌបន្ទាត់ព្រំដែនកម្ពុជា-ថៃ»។ នេះជាការលើកឡើងរបស់លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា ក្នុងពិធីសំណេះសំណាលជាមួយកងទ័ពជួរមុខ នាស្រុកជាំក្សាន្ត ខេត្តព្រះវិហារ ដែលរំឭកពីហេតុការណ៍កាលពីឆ្នាំ២០០៨,ឆ្នាំ២០១១ និងពេលថ្មីៗនេះ។
បញ្ហាព្រំដែនរវាងកម្ពុជា-ថៃ បន្តអូសបន្លាយមកដល់បច្ចុប្បន្ន និងបណ្ដាលឱ្យយុទ្ធជនកម្ពុជាម្នាក់បានស្លាប់ ក្នុងហេតុការណ៍ផ្ទុះអាវុធកាលពីថ្ងៃទី២៨ ឧសភាកន្លងទៅ។ ជុំវិញហេតុការណ៍ដ៏អាក្រក់នេះ លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា ចាត់ទុកថ្ងៃទី២៨ ខែឧសភា ឆ្នាំ២០២៥ ជាថ្ងៃដែលមិនអាចបំភ្លេចបាននូវសកម្មភាំពប៉ុនប៉ងឈ្លានពានទឹកដីខ្មែរសារជាថ្មី។
ក្នុងពិធីសំណេះសំណាលជាមួយកងទ័ពជួរមុខ នាស្រុកជាំក្សាន្ត ខេត្តព្រះវិហារ នៅថ្ងៃទី១១ មិថុនា លោ ហ៊ុន ម៉ានី សង្កត់ធ្ងន់ថា សកម្មភាពរបស់កងទ័ពថៃ បង្កមកលើកងទ័ពកម្ពុជា គឺជាវាយឆ្មក់ មានចេតនាក្នុងការបង្ករឿង ដែលឈានចូលមកទឹកដីកម្ពុជា។ ប្រធានសហភាពសហព័ន្ធកម្ពុជារូបនេះ ក៏រំលេចពីការឈរជើងរបស់កងទ័ពកម្ពុជា នាតំបន់មុំបី ជាពិសេសសាលារួមចិត្តតាំងពីយូរណាស់មកហើយ។
រូបភាពពីUYCF
ថ្លែងចំពោះមុខកងទ័ពជួរមុខ លោក ហ៊ុន ម៉ានី ផ្ញើសារទៅកូនទាំងអស់ដូច្នេះ៖«ថ្ងៃទី២៨ ខែឧសភា ឆ្នាំ២០២៥ កូនខ្មែរទាំងអស់ ត្រូវចងចាំ ហើយផ្សារភ្ជាប់ទៅលើករណីភាពតានតឹងសារជាថ្មី ក្នុងក្របខណ្ឌបន្ទាត់ព្រំដែនកម្ពុជា-ថៃ»។ ការកើតឡើងនូវភាពតានតឹងសារជាថ្មីនៅឆ្នាំ២០២៥នេះ លោក ហ៊ុន ម៉ានី បានអំពាវនាវឱ្យប្រជាពលរដ្ឋខ្មែរគ្រប់រូប បន្តចូលរួម និងគាំទ្រវិធានការដែលដាក់ចេញដោយរាជរដ្ឋាភិបាលកម្ពុជា ជាពិសេសផ្ដល់កម្លាំងចិត្តដល់កងកម្លាំងនៅជួរមុខគ្រប់ពេលវេលា។
សូមបញ្ជាក់ថា ក្រោយកើតហេតុការណ៍ផ្ទុះអាវុធនៅតំបន់មុំបី រដ្ឋាភិបាលកម្ពុជា បានសម្រេចបង្កើតគណៈកម្មការរៀបចំ ឯកសារដើម្បីប្តឹងទៅតុលាការយុត្តិធម៌អន្តរជាតិ (ICJ) ករណីតំបន់រសើប ទាំង ៤ គឺតំបន់មុំបី, ប្រាសាទតាមាន់ធំ, ប្រាសាទតាមាន់តូច និងប្រាសាទតាក្របីផងដែរ។ លើសពីនេះ នៅថ្ងៃទី១៤ មិថុនាខាងមុខ កម្ពុជា នឹងដឹកនាំកិច្ចប្រជុំគណៈកម្មាធិការព្រំដែនចម្រុះ(JBC) ជាមួយថៃ នៅរាជធានីភ្នំពេញ៕
អត្ថបទទាក់ទង
រូបភាពពីUYCF
រូបភាពពីUYCF
© រក្សាសិទ្ធិដោយ thmeythmey.com
Tag:
