ភ្នំពេញ៖ ៤ឆ្នាំ នៃការអនុវត្តគម្រោង «បង្កើតការងារ ជាសេដ្ឋកិច្ចវិលជុំ របស់សហគមន៍នេសាទ នៅបឹងទន្លេសាបខាងលិច ក្នុងតំបន់១» បានឈានដល់ទីបញ្ចប់ ដែលបានផ្លាស់ប្ដូរវិជ្ជមានច្រើនយ៉ាង លើកំណើនសេដ្ឋកិច្ច ផ្នែកអប់រំ អនាម័យ ទឹកស្អាតជាដើម សម្រាប់សហគមន៍នេសាទ នៅជុំវិញតំបន់ឋមនីយជីវមណ្ឌលបឹងទន្លេសាប។ គម្រោងនេះ មានការគាំទ្រមូលនិធិដោយសហភាពអឺរ៉ុប។

នៅថ្ងៃទី១៣មិថុនានេះ អង្គការអុកស្វាម សហភាពអឺរ៉ុប ក្រសួងកសិកម្ម រុក្ខាប្រមាញ់ និងនេសាទ ពលរដ្ឋសហគមន៍បឹងទន្លេសាប រួមទាំងអង្គការដៃគូអនុវត្តកម្រោងផ្សេងទៀត ប្រមាណ១០០នាក់ បានរៀបចំកម្មវិធី បង្ហាញពីលទ្ធផល និងបិទបញ្ចប់គម្រោង។ 

គម្រោង «បង្កើតការងារ ជាសេដ្ឋកិច្ចវិលជុំ របស់សហគមន៍នេសាទ នៅបឹងទន្លេសាបខាងលិច ក្នុងតំបន់១» បានជួយឱ្យពលរដ្ឋនៅតំបន់បឹងទន្លេសាប២ពាន់នាក់ និងសិស្សជាង៣ពាន់នាក់ ទទួលបានទឹកស្អាត់ប្រើប្រាស់។ ជាមួយគ្នាដែរ បានរៀបចំឱ្យមានភាពប្រសើរឡើងនូវអនាម័យ ដល់សិស្សជាង២ម៉ឺននាក់។ 

រយៈពេល៤ឆ្នាំ​នេះ ក្រុមអង្គការសង្គមស៊ីវិល និងរដ្ឋ ក៏បានអនុវត្តគំនិតផ្តួចផ្ដើមឥដ្ឋអេកូ តាមរយៈការកែច្នៃប្លាស្ទិកទម្ងន់ បង្កើតប្រាក់ចំណូលសម្រាប់សហគមន៍នេសាទ។ ចំណែក ជំនួយផ្នែកអប់រំ មានសិស្ស១ម៉ឺននាក់ ទទួលបានអត្ថប្រយោជន៍ដូចជា អាហារូបករណ៍ និងសម្ភារៈសិក្សាក្នុងថ្នាក់ជាដើម។ ក្រៅពីនេះ គឺការជំរុញការផលិតទឹកឃ្មុំ ទេសចរណ៍ធម្មជាតិ ថាមពលក្រៅបណ្តាញ និងការទទួលបានទីផ្សារសម្រាប់ក្រុមដែលដឹកនាំដោយស្ត្រី។ 

តាមរយៈគម្រោង «បង្កើតការងារ ជាសេដ្ឋកិច្ចវិលជុំ របស់សហគមន៍នេសាទ នៅបឹងទន្លេសាបខាងលិច ក្នុងតំបន់១» លោកស្រី ភាណ សោភ័ណ នាយិកាអង្គការអុកស្វាម មើលឃើញនូវភាពច្នៃប្រឌិត និងភាពធន់គួរឱ្យកត់សម្គាល់របស់សហគមន៍នេសាទក្នុងតំបន់ឋបនីយជីវមណ្ឌលបឹងទន្លេសាប។ លោកស្រី សោភ័ណ បានបន្ថែមថា៖ «ដោយមានការបញ្ចូលការអនុវត្តប្រកបដោយនិរន្តរភាព គំរូសេដ្ឋកិច្ចវិលជុំ និងការអប់រំប្រកបដោយបរិយាបន្ន យើងមិនត្រឹមតែពង្រឹងជីវភាពរស់នៅ របស់សហគមន៍ប៉ុណ្ណោះទេ ប៉ុន្តែថែមទាំងបានលើកកម្ពស់និរន្តរភាពបរិស្ថានទៀតផង»។ នាយិកាអង្គការអុកស្វាម សាទរនូវសមិទ្ធផលនេះ ហើយអំពាវនាវដល់អង្គការដៃគូ អ្នកបង្កើតគោលនយោបាយ និងសហគមន៍ បន្តវិនិយោគលើរាល់ដំណោះស្រាយទាំងឡាយណា ដែលគាំទ្រសហគមន៍ និងការពារធនធានធម្មជាតិ។ 

លោក Koen EVERAERT អនុប្រធានកិច្ចសហប្រតិបត្តិការនៅសហភាពអឺរ៉ុបប្រចាំកម្ពុជា។ រូបដោយ ឡាយ សុភាវតី

រីឯ លោក Koen EVERAERT អនុប្រធានកិច្ចសហប្រតិបត្តិការនៅសហភាពអឺរ៉ុបប្រចាំកម្ពុជា បានទុកគម្រោងខាងលើ ជាការឆ្លុះបញ្ចាំងពីការប្តេជ្ញាចិត្តរបស់សហភាពអឺរ៉ុបឆ្ពោះ ទៅរកការអភិវឌ្ឍប្រកបដោយចីរភាព។ ក្នុងកម្មវិធី លោកបានលើកឡើងបន្ដែម យ៉ាងដូច្នេះ៖ «គម្រោងនេះ ក៏បង្ហាញពីកិច្ចសហប្រតិបត្តិការដ៏រឹងមាំរបស់សហភាពអឺរ៉ុបជាមួយនិងរាជរដ្ឋាភិបាលកម្ពុជា ដែលជាផ្នែកមួយនៃកិច្ចខិតខំប្រឹងតាមរយៈ Global Gateway ក្នុងការគាំទ្រដល់ការប្រកបជីវិត ដែលមានភាពធន់ និងការជួយគាំទ្រកម្ពុជាក្នុងដំណើរឆ្ពោះទៅកាន់ការចាកចេញ ពីប្រទេសអភិវឌ្ឍន៍តិចតូចដែរ»។ ជាមួយគ្នាដែរ លោក បន្ថែមថា តាមរយៈគម្រោង «បង្កើតការងារ ជាសេដ្ឋកិច្ចវិលជុំ របស់សហគមន៍នេសាទ នៅបឹងទន្លេសាបខាងលិច ក្នុងតំបន់១» បានជួយជួយពង្រឹងនូវសេវាកម្មដែលចាំបាច់ និងការបង្កើតឱ្យចរន្តសេដ្ឋកិច្ចនៅក្នុងសហគមន៍បឹងទន្លេសាប៕