.png)
.png)
.jpg)
.jpg)
រឿងព្រំដែន៖ សម្តេច ហ៊ុន សែន ប្រាប់មិត្តបរទេសឱ្យលើកទឹកចិត្តថៃ តទល់កម្ពុជាតាមផ្លូវ ICJ
- ថ្ងៃសុក្រ ទី១៣ ខែមិថុនា ឆ្នាំ២០២៥ ម៉ោង ១០:២៧ នាទី យប់
សម្តេច ហ៊ុន សែន អតីតនាយករដ្ឋមន្ត្រី ដែលបច្ចុប្បន្នជាប្រធានព្រឹទ្ធសភា
ប្រធានព្រឹទ្ធសភា សម្តេច ហ៊ុន ប្រាប់មិត្តបរទេសអំពីការសម្រេចចិត្តរបស់កម្ពុជាលើការបោះឆ្នោតប្រឆាំងរុស្ស៊ីដែលវាយលុកអ៊ុយក្រែន និងជំហរកម្ពុជាក្នុងការតទល់ជាមួយថៃតាមផ្លូវតុលាការ ICJ។ ជុំវិញរឿងព្រំដែនរវាងកម្ពុជា និងថៃ ដែលកំពុងកើតឡើងនាពេលនេះ សម្តេច ប្រាប់មិត្តបរទេសឱ្យលើកទឹកចិត្តថៃ តទល់កម្ពុជាតាមផ្លូវ ICJ។
« ខ្ញុំគិតថាថ្ងៃណាមួយ ថៃនឹងធ្វើសកម្មភាពដូចកាលពីឆ្នាំ២០០៨ ដល់ឆ្នាំ២០១១ទៀតហើយ»។ សម្តេច ហ៊ុន សែន បានសរសេរបែបនេះនៅលើបណ្តាញសង្គមហ្វេសប៊ុក នាយប់ថ្ងៃទី១៣ ខែមិថុនា នេះ ដែលពេលនេះភាពគឃ្លើនមិនគោរពច្បាប់របស់ថៃបានបង្ហាញចេញមកហើយ។ ការណ៍នេះបង្ហាញឱ្យពីការគិតរបស់អតីតនាយករដ្ឋមន្ត្រី សម្រាប់ពិភពលោក ដែលគោរពច្បាប់ផង និងសម្រាប់អនាគតកម្ពុជា ជាមួយប្រទេសថៃផង។
« កម្ពុជាអំពាវនាវដល់បណ្តារដ្ឋដែលអនុវត្តនយោបាយការបរទេសផ្អែកលើច្បាប់ លើកទឹកចិត្តដល់ភាគីទាំងពីរដោះស្រាយបញ្ហាដោយសន្តិវិធី និងគោរពតាមច្បាប់»។ នេះជាការអំពាវនាវរបស់សម្តេច ហ៊ុន សែន ដែលសំណូមពររបស់កម្ពុជា គឺស្នើសុំឲ្យបណ្តារដ្ឋ ដែលគោរពច្បាប់ លើកទឹកចិត្តភាគីថៃ ដំណើរការក្តីតាមផ្លូវតុលាការយុត្តិធម៌អន្តរជាតិ ICJ លើសំណុំរឿងព្រំដែនជាមួយកម្ពុជាលើ៤ចំណុច។ នោះគឺ តំបន់មុំបីនៃព្រំដែនកម្ពុជា-ឡាវ-ថៃ, ប្រាសាទតាមាន់ធំ, ប្រាសាទតាមាន់តូច និងប្រាសាទតាក្របី។
បើតាមសម្តេច ហ៊ុន សែន កម្ពុជាមិនស្នើសុំអាវុធ-គ្រាប់ ដើម្បីវាយប្រយុទ្ធបង្ហូរឈាមគ្នារវាងកម្ពុជានិងថៃនោះទេ តែកម្ពុជាស្នើសុំឲ្យលើកទឹកចិត្តដោះស្រាយដោយសន្តិវិធីតាមរយៈការចរចា តាមយន្តការទ្វេភាគីផង និងតាមផ្លូវតុលាការផង។ សម្តេចបានអះអាងថា ៖ « ព្រំដែនកម្ពុជា-ថៃមានប្រវែងជាង៨០០គីឡូម៉ែត្រ កម្ពុជាលើកតែ៤ចំណុច ដែលជាចំណុចក្តៅ និងរសើប ដែលងាយនឹងផ្ទុះអាវុធវាយប្រហារគ្នាប្តឹងទៅតុលាការដោះស្រាយជាមុន។ ៤ចំណុចដូចបានរៀបរាប់ខាងលើ មិនអាចរកការស្រុះស្រួលគ្នាតាមយន្តការទ្វេភាគីបានឡើយ សូម្បីតែ១០០ឆ្នាំទៀតក៏មិនអាចដោះស្រាយបានដែរ។ ដូចនេះ មានតែតុលាការយុត្តិធម៌អន្តរជាតិ ICJ ប៉ុណ្ណោះ ទើបអាចដោះស្រាយបាន»។
អតីតនាយករដ្ឋមន្ត្រី ដែលបច្ចុប្បន្នជាប្រធានព្រឹទ្ធសភា បានបញ្ជាក់ថា ការដោះស្រាយតាមផ្លូវតុលាការមិនមែនជាការបង្កហេតុបង្កសង្រ្គាមនោះឡើយ តែជាការដោះស្រាយដោយសន្តិវិធីតាមផ្លូវច្បាប់បញ្ជៀសការបង្ហូរឈាមនាពេលអនាគត។ សម្រាប់រដ្ឋាភិបាល ក៏ងាយស្រួលក្នុងការបកស្រាយជាមួយប្រជាជនខ្លួនផងដែរ ក្នុងករណីចាញ់ក្តីនៅតុលាការ។
ក្នុងចំណោមប្រទេសអាស៊ានមានឧទាហរណ៍ដ៏ល្អ ដែលឥណ្ឌូណេស៊ី និង ម៉ាឡេស៊ី, សឹង្ហបុរី និងម៉ាឡេស៊ី នាំយកជម្លោះទឹកដី ទៅឲ្យតុលាការយុត្តិធម៌អន្តរជាតិ ICJ ដោះស្រាយដោយភាគីនីមួយៗ គោរពតាមការសម្រេចរបស់តុលាការ។ ជាលទ្ធផលទំនាក់ទំនងរវាង ឥណ្ឌូណេស៊ី និងម៉ាឡេស៊ី និងទំនាក់ទំនងម៉ាឡេស៊ីជាមួយសឹង្ហបុរី នៅតែល្អនិងគ្មានជម្លោះតកូនតចៅ។ សម្រាប់សម្តេច ហ៊ុន សែន ការគេចវេសណាមួយមិនហ៊ានចូលតាមផ្លូវតុលាការ វាមានន័យស្មើជាមួយការប្រព្រឹត្តបទល្មើស និងការមិនគោរពច្បាប់ ក្នុងសណ្តាប់ធ្នាប់ពិភពលោកមួយដែលគោរពច្បាប់៕
© រក្សាសិទ្ធិដោយ thmeythmey.com
