.png)
.png)
.jpg)
.jpg)
គ្រោះថ្នាក់ធ្លាក់យន្តហោះ 787 Dreamliner ធ្វើឲ្យក្រុមហ៊ុនអាមេរិក Boeing ជួបវិបត្តិធំបន្ថែម
- ថ្ងៃអាទិត្យ ទី១៥ ខែមិថុនា ឆ្នាំ២០២៥ ម៉ោង ៨:២៩ នាទី ព្រឹក
គ្រោះថ្នាក់ធ្លាក់យន្តហោះ 787 Dreamliner ធ្វើក្រុមហ៊ុន អាមេរិក Boeing ជួបវិបត្តិធំបន្ថែម។ REUTERS - Adnan Abidi
យន្តហោះ Boeing 787 របស់ក្រុមហ៊ុនអាកាសចរណ៍ Air India បានធ្លាក់នៅថ្ងៃព្រហស្បតិ៍ ទី១២ មិថុនា សម្លាប់ជីវិតមនុស្សសរុបជាង ២៦០នាក់។ អាជ្ញាធរឥណ្ឌាបានប្រកាសរកឃើញប្រអប់ខ្មៅ ដែលអាចពន្យល់ពីដើមហេតុបណ្តាលឲ្យមានគ្រោះថ្នាក់នេះកើតឡើង។ សោកនាដកម្មនេះ បានធ្វើឲ្យក្រុមហ៊ុនផលិតយន្តហោះ Boeing របស់អាមេរិក ជួបវិបត្តិផ្ទួនៗគ្នា និងបានធ្វើក្រុមហ៊ុនមួយនេះ កាន់តែធ្លាក់ចុះដុនដាប។
ទុក្ខជាន់ទុក្ខ! កាលពីប៉ុន្មានសប្តាហ៍ កន្លងទៅ ក្រុមហ៊ុនផលិតយន្តហោះ Boeing របស់អាមេរិក ទើបតែបង់សំណងសរុបប្រមាណជាង ១ពាន់លានដុល្លារ ជូនដល់គ្រួសារជនរងគ្រោះធ្លាក់យន្តហោះប្រភេទ Boeing 737 Max នៅប្រទេសឥណ្ឌូណេស៊ី ឆ្នាំ ២០១៨ និង នៅប្រទេសអេត្យូពី ឆ្នាំ២០១៩។ ឧបទ្ទវហេតុទាំង២កន្លែងនេះ បានសម្លាប់ជីវិតមនុស្ស ៣៤៦នាក់។ ឥឡូវនេះ ក្រុមហ៊ុន Boeing ត្រូវដោះស្រាយបញ្ហាគ្រោះថ្នាក់ធ្លាក់យន្តហោះប្រភេទBoeing 787 Dreamliner នៅប្រទេសឥណ្ឌា កាលពីថ្ងៃព្រហស្បតិ៍ ទី១២ មិថុនា ដែលធ្វើបាត់បង់ជីវិតមនុស្សសរុបជាង ២៦០នាក់។ ដាក់ឲ្យដំណើរការ កាលពីឆ្នាំ ២០១១ យន្តហោះ Boeing 787 Dreamliner ទើបតែជួបគ្រោះថ្នាក់លើកទី១ សម្រាប់យន្តហោះប្រភេទថ្មីនេះ។
តាមលោក លោក Gérard Feldzer អតីតអ្នកបើកបរយន្តហោះ ទីប្រឹក្សាអាកាសចរណ៍ និងជាប្រធានអង្គការអាកាសចរណ៍គ្មានព្រំដែនអង់គ្លេស បានបញ្ជាក់ថាការឃើញប្រអប់ខ្មៅរបស់អាជ្ញាធរឥណ្ឌា អាចជួយផ្តល់ព័ត៌មានសំខាន់ៗ អំពីដំណើរការហោះហើររបស់យន្តហោះ និង កិច្ចសន្ទនា រវាងអ្នកបើកបរយន្តហោះ និង អ្នកគ្រប់គ្រងចរាចរណ៍ផ្លូវអាកាស។ លោក Gérard Feldzer បានសំណូមពរឲ្យអាជ្ញាធរពាក់ព័ន្ធ ជួយស្វែងរកមូលហេតុឲ្យបានឆាប់រហ័ស ដែលបានបណ្តាលឲ្យមានឧបទ្ទវហេតុគ្រោះថ្នាក់នេះកើតឡើង ពីព្រោះថាយន្តហោះ Boeing 787 Dreamliner ជាយន្តហោះដ៏ល្បីឈ្មោះមួយរបស់អាមេរិក ទើបតែដំណើរការបានជាង ១០ឆ្នាំ ប៉ុណ្ណោះ។ ជួនកាល ក៏អាចបណ្តាលមកពីការប្រើប្រាស់ប្រេងឥន្ធនៈគុណភាពអន់ ដែលធ្វើឲ្យម៉ាស៊ីនទាំងពីរគាំងដំណើរការ ឬ សត្វស្លាបហោះបុកចូលម៉ាស៊ីន ឬក៏ មកពីបញ្ហាគ្រប់គ្រងចរាចរណ៍ផ្លូវអាកាសមិនបានល្អ។ បើសិនជារកឃើញមូលហេតុ អាជ្ញាធរត្រូវផ្តល់ព័ត៌មាននេះភ្លាមដល់បណ្តាក្រុមហ៊ុនអាកាសចរណ៍ទាំងអស់ដែលកំពុងប្រើប្រាស់យន្តហោះប្រភេទនេះ។
យន្តហោះ Boeing 787 Dreamliner ជាប្រភេទយន្តហោះមានទំហំធំ និងសន្សំសំចៃប្រេងជាងម៉ូដែលយន្តហោះមុនៗរបស់អាមេរិក។ យន្តហោះប្រភេទនេះទទួលបានចំនួននៃការបញ្ជាទិញដ៏ច្រើនលើបលុប រហូតដល់ជាង ២៥០០គ្រឿង ពីក្រុមហ៊ុនអាកាសចរណ៍ចំនួនប្រមាណ ៨០ នៅទូទាំងពិភពលោក។
សូមបញ្ជាក់ថា Boeing 787 Dreamliner ជួបសោកនាដនាកម្ម នៅប្រទេសឥណ្ឌា ជាគ្រោះថ្នាក់ធ្លាក់យន្តហោះ ជាលើកទី១ តែពីមុនមក យន្តហោះប្រភេទនេះក៏មានបញ្ហាបច្ចេកទេសច្រើនមកហើយដែរ។ ជាក់ស្តែង នៅប៉ុន្មានឆ្នាំចុងក្រោយនេះ យន្តហោះប្រភេទនេះបានជួបបញ្ហាជាបន្តបន្ទាប់។ នៅឆ្នាំ ២០២១ គេរកឃើញថាយន្តហោះ Boeing 787 Dreamliner ជាច្រើនគ្រឿងមានបញ្ហានៅលើតួយន្តហោះ ដែលធ្វើក្រុមហ៊ុន Boeing បានផ្អាកដំណើរការផលិតកម្ម រយៈពេល ២ឆ្នាំ។ នៅឆ្នាំ ២០២៤ យន្តហោះ Boeing 787 Dreamliner បានធ្វើដំណើរពីទីក្រុងស៊ីដនី ទៅទីក្រុង Aucklan ត្រូវគេរកឃើញថាមានប្រហោងខ្យល់។ អ្នកដំណើរ១២នាក់ ត្រូវបញ្ជូនទៅសង្គ្រោះនៅមន្ទីរពេទ្យ។ ចំណែកឯ ក្រុមហ៊ុនអាកាសចរណ៍ឈីលី ក៏ធ្លាប់បានលើកឡើងបញ្ហាបច្ចេកទេស នៅលើយន្តហោះប្រភេទនេះដែរ៕
ដោយ៖ទន់ ពុទ្ធពិសិដ្ឋ/ ខេមរភាសា RFI
© រក្សាសិទ្ធិដោយ thmeythmey.com
