.png)
.png)
.jpg)
.jpg)
អ៊ុយក្រែននិងរុស្ស៊ី ដោះដូរឈ្លើយសឹកនិងសពទាហាន ៤លើក ក្នុង១សប្តាហ៍
- ថ្ងៃចន្ទ ទី១៦ ខែមិថុនា ឆ្នាំ២០២៥ ម៉ោង ៣:៤៤ នាទី រសៀល
សប្តាហ៍ទី២ នៃខែមិថុនា រុស្ស៊ីនិងអ៊ុយក្រែនដោះដូរឈ្លើយសឹក និងសាកសពទាហាន ចំនួន ៤លើក។ via REUTERS - SECURITY SERVICE OF UKRAINE
ក្នុង១សប្តាហ៍កន្លងទៅនេះ អ៊ុយក្រែន និង រុស្ស៊ី បានដោះដូរអ្នកទោស និងសាកសពទាហាន ចំនួន ៤ ដង។ ភាគីអ៊ុយក្រែន បានទទួលខ្មោចទាហាន ក្នុងម្តងៗ ជាង១ ២០០ នាក់ ហើយជាសរុប ជិត ៥ ពាន់សាកសព។ ចំណែក រុស្ស៊ី គ្មានបង្ហាញតួលេខទេ ព្រោះម៉ូស្គូចាត់ទុកជាការសម្ងាត់ជាតិ។
គ្រាន់តែក្នុងសប្តាហ៍ទី ២ នៃ ខែមិថុនា ឆ្នាំ២០២៥ រុស្ស៊ីនិងអ៊ុយក្រែនបានដោះដូរឈ្លើយសឹកនិងសាកសពទាហាន ចំនួន ៤ លើក។ អាជ្ញាធរអ៊ុយក្រែន ដែលទទួលបន្ទុកសម្របសម្រួលដោះដូរឈ្លើយសឹកនិងសាកសពទាហាន បានបញ្ជាក់ថា អ៊ុយក្រែន បានទទួលសាកសព សរុបចំនួន ៤ ៨១២ នាក់។ ពោលគឺ ថ្ងៃអាទិត្យ ជាង១២០០នាក់ ថ្ងៃសៅរ៍ ជាង១២០០នាក់ ថ្ងៃសុក្រ ជាង១២០០នាក់ និង ថ្ងៃពុធ ១២១២នាក់។
ភាគីរុស្ស៊ីវិញ វិមានក្រេមឡាំង បានប្រកាសតែម្តងប៉ុណ្ណោះ ថា រុស្ស៊ីបានទទួលសពទាហានរុស្ស៊ី ចំនួន ២៧នាក់ កាលពីថ្ងៃពុធ ទី១១មិថុនា។ រដ្ឋាភិបាលក្រុងម៉ូស្គូ គ្មានទម្លាយព័ត៌មានបន្ថែមពីចំនួនឈ្លើយសឹកនិងសាកសពទាហានរុស្ស៊ី ដែលទទួលបានជាបន្តបន្ទាប់ សម្រាប់ថ្ងៃសុក្រ សៅរ៍ និងអាទិត្យ។ ត្រង់ចំណុចនេះ ទំនងជាការធម្មតា ដែលរដ្ឋអំណាចក្រុងម៉ូស្គូចង់បំបិទព័ត៌មាន។ ចូរកុំភ្លេចថា តាំងពីផ្ទុះសង្គ្រាមឈ្លានពានលើអ៊ុយក្រែន រយៈពេលជាង៣ឆ្នាំមក រុស្ស៊ីតែងតែប្រុងប្រយ័ត្នណាស់ចំពោះចំនួនយោធា និងការបាត់បង់ជីវិតទាហាន ហើយរុស្ស៊ីក៏ចាត់ទុកតួលេខទាំងនេះ ជាការសម្ងាត់របស់ជាតិ។ ជាក់ស្តែង ទីភ្នាក់ងារព័ត៌មានរដ្ឋរុស្ស៊ី TASS បានផ្សាយថា អ៊ុយក្រែនគ្មានបានប្រគល់សពទាហានរុស្ស៊ីទេ នៅថ្ងៃអាទិត្យ ទី១៥មិថុនា។
តែយ៉ាងណាក៏ដោយ ចំពោះរុស្ស៊ី ការដោះដូរឈ្លើយសង្គ្រាមនិងខ្មោចទាហាន ពីពេលថ្មីៗនេះ ឋិតក្រោមការសម្រុះសម្រួលរបស់ប្រធានាធិបតីអាមេរិក ដូណាល់ ត្រាំ។ តាំងពីលោក ត្រាំ ឡើងកាន់អំណាចជាថ្មីនៅវ៉ាស៊ីនតោន សហរដ្ឋអាមេរិកនិងរុស្ស៊ីបានខិតជិតគ្នា ហើយប្រធានាធិបតីទាំង២បានហៅទូរស័ព្ទរកគ្នា ជាផ្លូវការ ចំនួន ៥ ដង រួចមកហើយ។
ក្នុងកិច្ចសន្ទនាតាមទូរស័ព្ទ កាលពីថ្ងៃសៅរ៍ ទី១៤មិថុនា ប្រធានាធិបតីរុស្ស៊ី វ្ល៉ាឌីមៀរ ពូទីន បានបញ្ជាក់ប្រាប់ប្រធានាធិបតីអាមេរិក ដូណាល់ ត្រាំ ថាការដោះដូរអ្នកទោសនិងសាកសពទាហានជាច្រើនលើកមកនេះ អនុលោមទៅតាមលក្ខខណ្ឌចែងនៅក្នុងកិច្ចព្រមព្រៀងរវាងរុស្ស៊ីនិងអ៊ុយក្រែន ដែលភាគីទាំង២បានចុះហត្ថលេខានៅក្រុងអ៊ីស្តង់ប៊ូល ប្រទេសតួកគី កាលពីថ្ងៃទី២ ដើមខែមិថុនា។ ថ្លែងទៅកាន់សមភាគីអាមេរិក ចៅហ្វាយវិមានក្រេមឡាំង ថែមទាំងអះអាងថា រុស្ស៊ីបានត្រៀមខ្លួនជាស្រេចសម្រាប់កិច្ចចរចាជំហានបន្ទាប់។ ជំនួបចរចាបន្ទាប់ គ្រោងធ្វើនៅថ្ងៃទី២២មិថុនាខាងមុខ ដែលលោក ដូណាល់ ត្រាំ បានត្រួសត្រាយផ្លូវថាដើម្បីបិទបញ្ចប់ភ្លើងសង្គ្រាមឲ្យបានឆាប់។
ក្រៅពីការដោះដូរអ្នកទោសនិងសាកសពទាហាន កិច្ចចរចាសន្តិភាពដែលឋិតក្រោមសម្ពាធក្រុងវ៉ាស៊ីនតោន ហាក់ដូចជាមិនសូវជឿនលឿនទៅមុខ ឬគ្មានសម្រេចផ្លែផ្កែសោះ។ ជាក់ស្តែង សូម្បីតែបទឈប់បាញ់ ក៏គ្មាន ពីព្រោះថា ការបាញ់ប្លោងដាក់គ្នា នៅតែបន្តជាហូរហែ។
ជុំវិញការទាមទាររបស់រុស្ស៊ីវិញ ជាថ្មីម្តងទៀត ប្រធានាធិបតីអ៊ុយក្រែន វ៉ូឡូឌីមៀរ ហ្សេឡេនស្គី បានបដិសេធមិនធ្វើអត្ថាធិប្បាយអ្វីទេ ក្នុងសន្និសីទសារព័ត៌មាន កាលពីថ្ងៃសៅរ៍ ទី១៤មិថុនា។ គួររម្លឹកថា រុស្ស៊ីទាមទារតំបន់ខេត្តក្រុងទាំង៤ដែលខ្លួនកំពុងតែកាន់កាប់ និងទឹកដីដែលបានដាក់ចូលឧបសម្ព័ន្ធរុស្ស៊ី ហើយហាមកុំឲ្យអ៊ុយក្រែនចូលជាសមាជិកសម្ព័ន្ធយោធាអូតង់។ ក្រៅពីមិនឆ្លើយនឹងការទាមទាររបស់រុស្ស៊ី លោក ហ្សេឡេនស្គី បែរជាស្តីបន្ទោសដោយចោទប្រកាន់ថា រុស្ស៊ីគ្រាន់តែចង់កេងចំណេញពេលវេលាតែប៉ុណ្ណោះ ដ្បិតរុស្ស៊ីអាងថាខ្លួនមានកងទ័ពនិងគ្រឿងសព្វាវុធច្រើន ហើយចេះតែរំកិលខិតចូលដីអ៊ុយក្រែន នៅប៉ែកខាងកើត ឥតដាច់រយៈ៕
ដោយ៖ហេង ឧត្តម/RFI ខេមរភាសា
© រក្សាសិទ្ធិដោយ thmeythmey.com
