ភ្នំពេញ៖ «អង្គរវត្ត» គឺមានន័យដូចទៅនឹង «រានទេវតា» ដែលគេតែងតែឃើញមាននៅខាងមុខផ្ទះអ្នកស្រុកដែរ។ លោកសាស្ត្រាចារ្យ ថាច់ ត្វាន់ បានលើកឡើងបែបនេះនៅក្នុងការធ្វើបទបាឋកថា កាលពីថ្ងៃទី២៤ ខែកុម្ភៈ ឆ្នាំ២០១៦ នៅពុទ្ធសាសនបណ្ឌិត្យ លើប្រធានបទ «ដើម្បីស្គាល់អង្គរ»កន្លងទៅនេះ។
សំណង់អង្គរគឺជា សំណង់អច្ឆរិយរបស់ប្រជាជនខ្មែរ រួមទាំងពិភពលោកផងដែរ។ ប៉ុន្តែសំណួរសួរថា មូលហេតុអ្វីបានជាព្រះមហាក្សត្រខ្មែរព្រះអង្គកសាងអង្គរ? លោក សាស្ត្រាចារ្យ ថាច់ ត្វាន់ បានបញ្ជាក់ថា ដើម្បីឲ្យយល់អំពីសំណួរនេះ យើងត្រូវដឹងថាក្នុងសម័យដែលព្រះមហាក្សត្រខ្មែរសាងសង់អង្គរ គឺព្រះអង្គគោរពប្រណិប័តន៍ព្រហ្មញ្ញសាសនា។ សាសនានេះ គឺជាសាសនាមួយដែលអត់មានវត្ត គ្មានវិហារសម្រាប់ទៅថ្ងៃសីលដើម្បីជួបជុំគ្នា ដូចក្នុងព្រះពុទ្ធសាសនាទេ។
លោកសាស្ត្រាចារ្យ បានពន្យល់បន្ថែមថា នៅក្នុងសាសនានេះគឺមានតែអាស្រម ដែលមានន័យថា ផ្ទះរបស់ព្រាហ្មណ៍។ នៅក្នុងអាស្រមគឺមានព្រះ សម្រាប់គោរពប្រណិប័តន៍ ប៉ុន្តែគឺអាស្រ័យ ទៅលើអ្នកគោរពប្រណិប័តន៍ថាជ្រើសរើសយក ព្រះអង្គណាមកគោរព។ ព្រោះថានៅក្នុងព្រហ្មញ្ញសាសនា មានព្រះបីព្រះអង្គ គឺព្រះព្រហ្មណ៍ ព្រះនរាយណ៍ និងព្រះឥសូរ។ ហេតុនេះហើយ ទើបអ្នកគោរពព្រហ្មញ្ញសាសនា គេត្រូវរៀបចំកន្លែងមួយ សម្រាប់ដាក់ព្រះរបស់គេដើម្បីគោរពប្រណិប័តន៍។
ចំណែកការគោរពប្រណិប័តន៍ គេត្រូវបែងចែករវាងរាស្ត្រសាមញ្ញ មន្ត្រី និងក្សត្រ។ លោកសាស្ត្រាចារ្យក៏បានបន្ថែមថា កន្លងទៅគេតែងតែឃើញ រានទេវតា នៅមុខផ្ទះអ្នកស្រុក នោះហើយ គឺជាកន្លែងតំណាងឲ្យកន្លែងព្រះដែលគេគោរពក្នុងព្រហ្មញ្ញសាសនានោះឯង ប៉ុន្តែអាចមានព្រះសម្រាប់គោរពផ្សេងៗគ្នា។ សម្រាប់ព្រះមហាក្សត្រ សម័យនោះដោយសារព្រះអង្គមានទ្រព្យច្រើន ព្រះអង្គក៏សង់ជាអង្គរវត្ត តែម្ដងសម្រាប់តម្កល់ព្រះដែលព្រះអង្គគោរពប្រណិប័តន៍។
ហេតុនេះ «អង្គរវត្ត» គឺមានន័យដូចគ្នាទៅនឹង «រានទេវតា» ដែលអ្នកស្រុកធ្វើនៅមុខផ្ទះរបស់ខ្លួនដែរ គឺជាទីកន្លែងសម្រាប់អាទិទេពដែលព្រះមហាក្សត្រគោរពបូជា។ «អង្គរវត្ត» នេះគឺជាកន្លែងសម្រាប់ព្រះពិស្ណុការ ព្រោះព្រះមហាក្សត្រ ព្រះអង្គសម័យនោះ គោរពព្រះវិស្ណុ ឬព្រះពិស្ណុ។ លោកសាស្ត្រាចារ្យ ថាច់ ត្វាន់ ក៏បានបញ្ជាក់ថា ការសាងសង់អង្គរវត្ត មិនមែនជាកន្លែងសម្រាប់ស្ដេចគង់នៅទេ ប៉ុន្តែគឺជាកន្លែងរបស់ព្រះ ដែលព្រះមហាក្សត្រគោរពដល់ព្រះអាទិទេពរបស់ព្រះអង្គ៕